ޖެނިން، ފަލަސްތީން (ނޮވެމްބަރު 3) - ބުރާސްފަތި ދުވަހު އިޒްރޭލުން ދިން ހަމަލާތަކުގައި ފަލަސްތީނުގެ ހަތަރު މީހުން މަރާލައިފި އެވެ.
ދެ މީހުން މަރުވީ ޖެނިންގައި އިޒްރޭލްގެ ފައުޖުން ބަޑި ޖެހުމުންނެވެ. އެ ސިޓީގައި އިތުރު ހަތަރު މީހުންނަށް އަނިޔާވި ކަމަށް ފަލަސްތީނުގެ ހެލްތު މިނިސްޓްރީން ބުންޏެވެ.
ޖެނިންގައި ބަޔަކު މަރުވިކަން އިއުލާން ކުރި އިރު، އިޒްރޭލް ސިފައިން ބުނީ ހުޅަނގު އައްސޭރީގެ އުތުރުގައި އޮންނަ އެ ސިޓީގައި އޮޕަރޭޝަަނެއް ކުރިއަށްދާ ކަމަށެވެ.
އޭގެ ކުރިން ގުދުސްގެ އޯލްޑް ސިޓީ ސަރަހައްދުގައި ފަލަސްތީނުގެ މީހަކު އިޒްރޭލް އޮފިސަރެއްގެ ގަޔަށް ވަޅި ހެރި ކަމަށް ތުހުމަތު ކުރި އެވެ. އެ ހަމަލާގެ ތުހުމަތު ކުރެވުނު މީހާ ވެސް މަރާލި އެވެ.
ބުރާސްފަތި ދުވަހު މަރުވި ފަލަސްތީނުގެ ހަތަރު ވަނަ މީހާއަށް ހަމަލާ ދިނީ އިރުމަތީ ގުދުސްގަ އެވެ. އެ ތަނުގައި އިޒްރޭލުގެ ފައުޖުން ހަރަކާތްތެރިވި އެވެ.
އެއް ދުވަސް ތެރޭ ފަލަސްތީނުގެ ހަތަރު މީހުން މަރާލި އިރު، ދާދި ފަހުން އިޒްރޭލުގެ އާއްމު އިންތިހާބުގެ ވޯޓުލުން ކުރިއަށް ދިޔަ އެވެ.
އދ. އިން ބުނީ މިއީ ފަހުގެ ތާރީހުގައި ހުޅަނގު އައްސޭރީގައި އެންމެ ހަމަނުޖެހުން ބޮޑު ދުވަސްވަރު ކަމަށެވެ. އިޒްރޭލުން ކޮންމެ ދުވަހަކު ވެސް އޮޕަރޭޝަންތައް ހިންގާ އިރު، ފަލަސްތީނު މީހުންނާ ކުރިމަތިލުންތައް ހިނގަ އެވެ.
