ކޮވިޑް-19 ގެ ބަލިމަޑުކަމުގެ ސަބަބުން ކަސްޓަމަރުންނަށް ކުރިމަތިވި މާލީ ދަތިކަމަށް ލުޔެއް ދިނުމަށް އެމްޑަބްލިއުއެސްސީން ކުރިއަށް ގެންދާ ފެން ބިލުގެ ޖޫރިމަނާ މައާފުކޮށްދިނުމުގެ ޕްރޮގުރާމުގެ މުއްދަތު މި އަހަރުގެ ނިޔަލަށް ހަމަވާނެ ކަމަށް އެ ކުންފުނިން މިއަދު ބުނެފި އެވެ.
ކަސްޓަމަރުންނަށް ބިލްތައް ދެއްކުމަށް ލުއިފަސޭހަތަކެއް ހޯދައިދިނުމުގެ ގޮތުން ފެން ބިލު މައާފުކޮށްދޭން އެ ކުންފުނިން ފެށީ 2019 ވަނަ އަހަރެވެ.
އެ ޕްރޮގުރާމުގެ ދަށުން ބިލަށް ދައްކަންޖެހޭ ޖުމްލަ ފައިސާ މިއަންނަ ޑިސެމްބަރު 31، ގެ ކުރިން އެއްފަހަރާ ދެއްކުމުން އެބިލެއްގެ ޖޫރިމަނާ ފައިސާ އެއްކޮށް މައާފުކުރާނެ އެވެ. އަދި އެއްފަހަރާ ފެން ބިލަށް ފައިސާ ނުދެއްކޭ ނަމަ، އެ މުއްދަތުގެ ތެރޭގައި ބިލަށް ފައިސާ ދައްކާ އިންސައްތައިގެ ނިސްބަތުން ޖޫރިމަނާ މައާފު ކުރެވިގެން ދާނެއެވެ.
އޭގެ އިތުރުން ކަސްޓަމަރުން އެދޭ ނަމަ، މި މުއްދަތުގެ ތެރޭގައި އިންސްޓޯލްމަންޓު އުސޫލުން ބިލްތަކަށް ފައިސާ ދައްކައި ހަލާސްކުރުމުގެ ފުރުސަތު ވެސް ލިބޭނެ އެވެ. އެހެންކަމުން، މި ފުރުސަތުގެ ބޭނުން މި އަހަރު ނިމުމުގެ ކުރިން ހިފައި، މުސްތަގުބަލުގައި ޖޫރިމަނާ އެރިޔަނުދީ ބިލްތަކަށް ގަވާއިދުން ފައިސާ ދައްކަމުން ގެންދިޔުމަށް ކަސްޓަމަރުންގެ ކިބައިން އެދޭކަމަށް އެ ކުންފުނިން ބުނެ އެވެ.
އެ ޕްރޮގުރާމާއި ބެހޭ އިތުރު މައުލޫމާތު އެމްޑަބްލިއުއެސްސީގެ ހޮޓްލައިން، 105، އިން ލިބޭނެ އެވެ. އެމްޑަބްލިއުއެސްސީގެ އަމާޒަކީ އެ ކުންފުނިން ފޯރުކޮށްދޭ ހިދުމަތްތައް ވީހާވެސް ލުއިފަސޭހަކޮށް ކަސްޓަމަރުންނަށް ލިބިގެންދާން މަގު ފަހިކޮށްދިނުން ކަމަށް އެ ކުންފުނިން ބުނެއެވެ.
