ފ. ނިލަންދޫގައި ނަރުދަމާ އިން ނަޖިސް ބޭރުވާ މައްސަލަ ހައްލު ކުރެވޭނީ ނަރުދަމާގެ މުޅިން އާ ނިޒާމެއް ގާއިމުކޮށްގެން ކަމަށާއި އެކަން އެންމެ އަވަހަށް ވެސް ކުރެވޭނީ އަންނަ އަހަރު ފަހުކޮޅު ކަމަށް އެމްޑަބްލިއުއެސްސީގެ އެމްޑީ އަބްދުލްމަތީން މުހައްމަދު ވިދާޅުވެއްޖެ އެވެ.
ނިލަންދޫގައި ނަރުދަމާ އިން ނަޖިސް ބޭރުވާތީ އެ ރަށުގެ ރައްޔިތުން ކަންބޮޑުވުން ފާޅުކުރުމުން އެކްސް ގައި މަތީނު ކުރެއްވި ޕޯސްޓެއްގައި ވިދާޅުވީ މިހާރު ބޭނުން ކުރާ ނަރުދަމާގެ ނިޒާމު ހުއްޓުމަކަށް ނުގެނެސް އެހެން ނިޒާމެއް ގާއިމް ކުރެވޭނީ އަންނަ އަހަރުގެ ފަހުކޮޅު ކަމަށެވެ.
"މިހާރު ރަށުގައި އަޅާފައިވާ ވެކިއުމް ނިޒާމުގެ ހިދުމަތް މެދުނުކެނޑޭނެ ގޮތަކަށް މުޅިން އައު ގްރެވިޓީ ނިޒާމެއް ގާއިމްކުރުމަކީ ގޮން ޖެހުންތަކަކާއި ކުރިމަތިވާނެ މަސައްކަތެއް ކަމަށް ވުމާއެކު އައު ނަރުދަމާ ނިޒާމުގެ މަސައްކަތް މުޅިން ނިންމާލެވޭނެ ކަމަށް ލަފާކުރެވެނީ 2026 ގެ ފަހުކޮޅު،" މަތީނު ވިދާޅުވި އެވެ.
ވެކިއުމް ނަރުދަމާގެ ނިޒާމުތަކުގައި ބޭނުންވާ ހިސާބަކަށް ނަޖިސް ދުއްވަނީ ވައިގެ ޕްރެޝަރު ބޭނުންކޮށްގެންނެވެ. އެއާ ހިލާފަށް ގްރެވިޓީ ނިޒާމެއްގައި އެ މަސައްކަތް ކުރާނީ ގްރެވިޓީގެ ބާރު ބޭނުންކޮށްގެންނެވެ.
މަތީނު ވިދާޅުވީ ނިލަންދޫގައި މިހާރު ގާއިމުކޮށްފައިވާ ނަރުދަމާ ޑިޒައިން ކުރީ 15 އަހަރަށް ބަލާފައި ކަމަށެވެ. އެކަމަކު މިހާރު ވެސް އެ ނިޒާމަށް 18 އަހަރުވެފައިވާ ކަމަށް އޭނާ ވިދާޅުވި އެވެ. އާ ނަރުދަމާ ނިޒާމުގެ މަސައްކަތް މި އަހަރު ފެށޭނެ ކަމަށް ވެސް މަތީނު ވިދާޅުވި އެވެ.
"ޑިޒައިން މަސައްކަތް ކުރުމަށްޓަކައި ބޭނުންވާ ބިންތައް ކަނޑައެޅުމާއި، ލޭންޑް ސާވޭ ހެދުމާއި، ޓޮޕޮގްރަފިކް ސާވޭގެ މަސައްކަތް މިހާރުވަނީ ނިމިފަ. ޑިޒައިން ނިންމުމަށްފަހު ޔުޓިލިޓީ ރެގިޔުލޭޓަރީ އޮތޯރިޓީގެ ހުއްދަތަކާއި އީއައިއޭ ނިންމާ ޢަމަލީ މަސައްކަތް ރަށުގައި ފެށުމަށް ޝެޑިއުލްކުރެވިފައިވަނީ މެއި މަހުގެ ތެރޭގައި،" އޭނާ ވިދާޅުވި އެވެ.
މަތީނު ވިދާޅުވީ އެމްޑަބްލިޔުއެސްސީގެ ސްކޯޕުގެ ތެރޭގައި ހިމެނެނީ ގްރެވިޓީ ނިޒާމު ގާއިމްކުރުމުގެ މަސައްކަތް ކަމަށާއި އެ މަސައްކަތް ކުރިއަށްދާ މުއްދަތުގެ ތެރޭގައި ވެކިޔުމް ސިސްޓަމް މަރާމާތުކޮށް ހިންގާ ބެލެހެއްޓުން ކުރިއަށް ގެންދާނީ ނިލަންދޫގައި މިހާރު ވެސް ޔުޓިލިޓީގެ ހިދުމަތް ފޯރުކޮށްދޭ އިދާރާތަކުން ކަމަށެވެ.
ނިލަންދޫގެ ނަރުދަމާ ނިޒާމު ބެލެހެއްޓުމުގެ މަސައްކަތް މިހާރު ކުރަމުން އަންނަނީ ފެނަކަ ކޯޕަރޭޝަނުންނެވެ. އެ ކުންފުންޏާ އެ ޒިންމާ ހަވާލުކުރީ 2019 ގަ އެވެ. ނިލަންދޫގެ ނަރުދަމާގެ ނިޒާމު އަޕްގްރޭޑް ކުރުމުގެ މަސައްކަތް 2023 ގައި އޭރު އޮތް އެމްޑީޕީ ސަރުކާރުން 42.3 މިލިއަން ރުފިޔާއަށް ފެނަކައާ ހަވާލުކުރި އެވެ.
ނަމަވެސް މި ސަރުކާރުން ނިލަންދޫ ނަރުދަމާއަށް ދާއިމީ ހައްލެއް ހޯދުމަށް މިދިޔަ ނޮވެމްބަރު 16، ގައި އެ މަސައްކަތް 540 ދުވަސް ތެރޭގައި ނިންމުމަށް ކަމަށް ބުނެ އެމްޑަބްލިއުއެސްސީއާ ވަނީ ހަވާލުކޮށްފަ އެވެ.
