އިޒްރޭލުގެ އިންތިހާބުގެ ވަގުތީ ނަތީޖާއިން ކުރި ލިބޭ ކަމަށް ފެންނާތީ، ކުރީގެ ބޮޑު ވަޒީރު ބެންޖަމިން ނަތަންޔާހޫ އެނބުރި ވެރިކަމަށް އައުމުގެ ފުރުސަތު ބޮޑުވެއްޖެ އެވެ.
ބުދަ ދުވަހުގެ ރެއާ ހަމައަށް އާއްމު އިންތިހާބުގެ ވޯޓުގެ 84 ޕަސެންޓު ގުނައި ނިމުނު އިރު، ނަތަންޔާހޫއަށް ތާއީދު ކުރާ ޕާޓީތަކުން ވަނީ 120 ގޮނޑީގެ ތެރެއިން 65 ގޮނޑި ހޯދައިފަ އެވެ.
"އަޅުގަނޑުމެން މި ތިބީ ބޮޑު ކާމިޔާބެއްގެ ތުންފަތް މަތީގައި،" ގުދުސްގައި ސަޕޯޓަރުންނާ މުހާތަބު ކުރައްވަމުން ނަތަންޔާހޫ ވިދާޅުވި އެވެ.
އިންތިހާބުގެ ނަތީޖާއަށް ބަލާ އިރު، ވެރިކަމަށް އައުމަށް ރިލިޖަސް ޒަޔޮނިޒަމް ޕާޓީގެ ސަޕޯޓު ނަތަންޔާހޫއަށް ބޭނުންވެ އެވެ. ރިލިޖަސް ޒަޔޮނިޒަމް ޕާޓީގެ ލީޑަރުންނަކީ އިތަމަރް ބެން ގްވިރް އަދި ބެޒަލެލް ސްމޮޓްރިޗް އެވެ.
އެ ދެ މީހުންނަކީ އަރަބިންނާ ދެކޮޅު ވާހަކަތައް ފަަތުރައި، ޔަހޫދީންނަށް "ބޭވަފާތެރި" އަރަބި ރައްޔިތުންނާއި ސިޔާސީ މީހުން ޑީޕޯޓް ކުރުމަށް ބާރު އަޅާ ބަޔެކެވެ.
ބެން ގްވިރްއަކީ އިޒްރޭލުގައި ކުރިން ހިންގި ނަސްލީ ތަފާތު ކުރުންތަކަށް ހިތްވަރުދޭ ގްރޫޕެއްގެ ލީޑަރު، މެއިރް ކަހަނޭއަށް ތާއީދު ކުރާ މީހެކެވެ.
އިޒްރޭލުން ފަހުން އެ ގްރޫޕް ހިންގުން މަނާކޮށް، އެމެރިކާގައި އެއީ ޓެރަރިސްޓު ޖަމާއަތެއް ކަމަށް ވެސް ކަނޑައެޅި އެވެ. ބެން ގްވިރްގެ މައްޗަށް ވެސް ޓެރަރިސްޓު ޖަމާއަތަކަށް ތާއީދު ކުރުމާއި ނަސްލީ ތަފާތު ކުރުމަށް ހިތްވަރު ދިން ކަމަށް ސާބިތުވެފައިވެ އެވެ.
