މި އަހަރު ލަފާކުރި މިންވަރާ ގާތަށް ވެސް ހިލޭ އެހީގެ ގޮތުގައި ފައިސާ ލިބިފައިނުވާއިރު، އަންނަ އަހަރު 2.46 ބިލިއަން ރުފިޔާ ލިބޭނެ ކަމަށް އަންދާޒާކޮށް 2023 ގެ ބަޖެޓުގައި ހިމަނައިފި އެވެ.
ސަރުކާރުން މި އަހަރަށް ހުށަހެޅި ގާތްގަނޑަކަށް 37 ބިލިއަން ރުފިޔާގެ ބަޖެޓުގައި އާމްދަނީ އާއި ހިލޭ އެހީގެ ގޮތުގައި ލިބޭނެ ކަމަށް އަންދާޒާކޮށްފައިވަނީ 24.28 ބިލިއަން ރުފިޔާ އެވެ.
އޭގެ ތެރެއިން، 2.91 ބިލިއަން ރުފިޔާއަކީ ހިލޭގެ އެހީގެ ގޮތުގައި ލިބޭނެ ކަމަށް އަންދާޒާކުރި އަދަދެވެ.
ނަމަވެސް، ކޮންމެ ހަފުތާއަކު ފިނޭންސް މިނިސްޓްރީން އާންމުކުރަމުންދާ ދައުލަތުގެ އާމްދަނީ އާއި ހަރަދުގެ ހިސާބުތަކުން ދައްކާ ގޮތުގައި، މިދިޔަ އޮކްޓޯބަރު މަހުގެ 20 ވަނަ ދުވަހުގެ ނިޔަލަށް ހިލޭ އެހީގެ ގޮތުގައި ލިބިފައިވަނީ އެންމެ 308.1 މިލިއަން ރުފިޔާ އެވެ.
އަދި މި އަހަރު ނިމޭއިރު ހިލޭ އެހީގެ ގޮތުގައި ލިބޭނެ ކަމަށް ފިނޭންސުން މިހާރު ލަފާކުރާ ޖުމްލަ އަދަދަކީ 592.25 މިލިއަން ރުފިޔާ އެވެ.
ފިނޭންސް މިނިސްޓްރީން ބުނާ ގޮތުގައި، 2020 ވަނަ އަހަރާ އަޅާބަލާއިރު 2021 ވަނަ އަހަރު ހިލޭ އެހީގެ ގޮތުގައި ދައުލަތަށް ލިބިފައިވާ އާމްދަނީ 7.7 ޕަސަންޓު އިތުރެވެ.
ނަމަވެސް، މިދިޔަ އަހަރު ލިބުނު ހިލޭ އެހީގެ މިންވަރާ އަޅާބަލާއިރު، މި އަހަރު ލިބޭނެ ކަމަށް މިހާރު އަންދާޒާކުރާ އަދަދު 42.6 ދަށްވާނެ އެވެ.
ފާއިތުވި އެހެން އަހަރުތަކެކޭ އެއް ފަދައިން މިއަހަރު ވެސް ލަފާކުރި މިންވަރާ ގާތަށް ހިލޭ އެހީ ލިބިފައިނުވި ނަމަވެސް، އަންނަ އަހަރު ވެސް ހިލޭ އެހީގެ ގޮތުގައި ޖުމްލަ 2.46 ބިލިއަން ރުފިޔާ ލިބޭނެ ކަމަށް އަންދާޒާކޮށް، ފިނޭންސުން ވަނީ ބަޖެޓުގައި ހިމަނައިފަ އެވެ.
މީގެ ތެރޭގައި ފައިސާގެ ހިލޭ އެހީގެ ގޮތުގައި 1.54 ބިލިއަން ރުފިޔާ ލިބޭނެ ކަމަށް ލަފާކުރާއިރު، ތަކެތީގެ ގޮތުގައި 12 މިލިއަން ރުފިޔާ އަދި މަޝްރޫއުތައް ހިންގުމަށް 907.3 މިލިއަން ރުފިޔާ ލިބޭނެ ކަމަށް އަންނަ އަހަރަށް ވަނީ ބަޖެޓުކޮށްފަ އެވެ.
ފިނޭންސުން ބުނީ މި އަހަރު ދައުލަތަށް ލިބޭނެކަމަށް އަންދާޒާކޮށްފައިވާ ހިލޭ އެހީގެ ބައެއް، މި އަންނަ އަހަރު ލިބޭނެކަމަށް އަންދާޒާކުރެވޭ ކަމަށެވެ.
އަދި އެހެން އަހަރުތަކެކޭ އެއްފަދައިން، 2023 ގައި ވެސް 100 މިލިއަން ޑޮލަރުގެ ކޭޝް ގްރާންޓް ހޯދުމުގެ މަސައްކަތް ކުރިއަށް ގެންދިއުމަށް ރޭވިފައިވާތީ، އެ އާމްދަނީވެސް ބަޖެޓުގައި ހިމެނިފައިވާ ކަމަށް ފިނޭންސުން އިތުރަށް ބުނެފައިވެ އެވެ.
ބަޖެޓު 2023 ކުރުކޮށް
ރައީސް އިބްރާހިމް މުހައްމަދު ސޯލިހުގެ ދައުރުގެ ފަހު އަހަރަށް ހުށަހަޅާފައިމިވަނީ 42.6 ބިލިއަން ރުފިޔާގެ ބަޖެޓެކެވެ.
ބަޖެޓުގެ 40.557 ބިލިއަން ރުފިޔާ ހަރަދުގެ ގޮތުގައި ހިނގާނެ ކަމަށް ބެލެވޭއިރު އޭގެ ތެރެއިން އެންމެ ގިނަ ބޮޑު ބައެއް ހިއްސާކުރަނީ މުވައްޒަފުންގެ މުސާރަ ހަރަދެވެ. އެގޮތުން، ސިއްހީ ދާއިރާގެ މުވައްޒަފުންގެ މުސާރަ އަންނަ އަހަރު ބޮޑުކުރުމަށް ނިންމައި، އެކަމަށް 493.2 މިލިއަން ރުފިޔާ ވަނީ ހިމަނާފަ އެވެ.
ސަބްސިޑީ ސިޔާސަތަށް ގެންނަ ބަދަލާ އެކު އާސަންދައަށް ކުރާ އިސްރާފާއި ދައުލަތުން ދޭ އެހެން ސަބްސިޑީތަކުން ސަލާމަތްކުރެވޭ ފައިސާއާ އެކު ހަރަދުތައް ކުޑަވާނެ ކަމަށް ވަނީ ލަފާކޮށްފަ އެވެ. އެއާ އެކު، ރައީސްގެ ވައުދުތައް ފުއްދުމަށް ކުރިއަށްގެންދާ ޕީއެސްއައިޕީ މަޝްރޫއުތަކަށް 8.427 ބިލިއަން ރުފިޔާ ދާނެ ކަމަށް ވަނީ އަންދާޒާކޮށްފަ އެވެ.
ހިލޭ އެހީ ހިމެނޭހެން 2023 ގައި 32.098 ބިލިއަން ރުފިޔާ އާމްދަނީގެ ގޮތުގައި ލިބޭނެ ކަމަށް ވަނީ އަންދާޒާކޮށްފަ އެވެ. ޓެކްސް ރޭޓުތައް ބޮޑުކުރުމާ އެކު އަންނަ ބަދަލުތަކުގެ ސަބަބުން 3.6 ބިލިއަނުގެ އާމްދަނީ އިތުރުވާނެ ކަމަށް ބެލެވެ އެވެ. އެގޮތުން، ޓެކްސް އާމްދަނީގެ ގޮތުގައި އަންނަ އަހަރު 23.539 ބިލިއަން ލިބޭނެ ކަމަށް ވަނީ ލަފާކޮށްފަ އެވެ. އަދި، އެހެނިހެން އާމްދަނީގެ ގޮތުގައި 6.352 ބިލިއަން ލިބޭނެ ކަމަށް ބެލެވެ އެވެ.
