މިއީ ކުޅަނދުރުހަތަޔަށް އޮއްގާލުން ކަމުގައި ވުން އެކަށީގެންވެއެވެ. ވަރިހަމައެވެ. ބޮޑުވަރަކަށް ކޮޅުވަށިންދީފައި އިނދަޖައްސާލާނީތާއެވެ. މިއީ ހަމަ އައްސިފިލުވައިލުމެއްކަމަށް ނުދެކެއްޗެވެ. ނުދައްކާ ވާހަކަތަކެއް ދައްކާލުން ކަމަށް ދެކޭށެވެ. ފާޅުގައި ބުނަން ނުކެރިގެން ގަލަމެއް އޮތީތީ ލިޔަނީކަމުގައި ބުންޏަސް ވަރިހަމައެވެ.
މި ނާޗަރަނގީ ބަލައި ބަލައި ވަރުބަލިވެއްޖެއެވެ. މިއީ މޫސުމީ ކަމެކެވެ. ފާލުބަލާ މީހާއެކޭ އެއްފެންވަރަށް އެންމެ އާދައިގެ މީހާއަށްވެސް ލަފާކޮށް އަންދާޒާކުރަން އެނގޭ މުސްތަޤުބަލެކެވެ. މި ފެށުނީ ބޮއްކުރާ ދޮށަށް އޮޑިކަނބާ މޫސުމެވެ. މިންތީގެ މިސާލުންނެއް ނޫނެވެ. ބާރާއި ނުފޫޒުގެ މިސާލުންނެވެ. ފޯރާ މީހުން ނުފޯރާ މީހުންގެ އެހީއަށް އެދެން ފަށައިފިއެވެ. މަޑުމަޑުން ބަނދަރުމަތި އަނދަންފަށައިފިއެވެ. އަމާނާތްތެރިން ބަލަށް އެހެލަން ފަށައިފިއެވެ. އެކަކު އަނެކަކު ބޮލުކަށި ހަފަން ފައްޓައިފިއެވެ. ރަންއިލޮށިން ކަދުރުވިއްކަން ފަށައިފިއެވެ. ހަފައިދިނީމާ ދިރުވާމީހުން ގިނަވެ، މީސްމީހުންގެ ބަނޑަށް ވަންނަން ފަށައިފިއެވެ. ބަނޑުފެޅުމާއި ޅޮސްއުނދޯއްޔަށް އެރުވުން ޢާއްމުވާން ފަށައިފިއެވެ.
ކޮންމެ ކަމަކަށްވެސް އަރުވަނީ ކުރަތްޕެވެ. މަސައްކަތްކުރަނީ ކެރަވަޅުކޮށެވެ. ކަންކޮށް ކުރަލާފައި ތިބޭ މާހިރުންނާއި ތަޖުރިބާކާރުން ވަނީ ބޭލި ކޭމަށްވެފައެވެ. އަންނަ ކުއްލި ރޯޅުތަކުގައި އާރުލާ ނަޒާހަތްތެރިން ގެއްލެން ފަށައިފިއެވެ. މުހިއްމުވަނީ ކަޅާކުރުމެވެ. ކަންކަމަށް އަގުކިޔަން ފަށަނީ ކަނޑުގައި ހުއްޓައެވެ. ގިނަ ވަނީ އައިން ހިފައިގެން ވައިމައްޗަށް އަރާ މީހުންނެވެ. އޮއިކަންކަށީގައި ޖެހޭ މީހުންނެވެ. ޤަދަރާއި އިޙުތިރާމާއި ސުލްޙަ އާއި މަސަލަސްކަން ހޯދަން ޖެހެނީ އަތްފުނާއަޅާށެވެ.
އިސާހިތަކު ފެންނަނީ އުޅުންގުޅުންތައް ވިހަވާން ފަށާތަނެވެ. ބިންގާ އެޅީ ޅޮހުންވިއްޔާއެވެ. ވަރަލިބުނުހާ އަވަހަށް ވަރަބިނދޭކަން ބައެއް މީހުން ހަނދާންވަނީ އިނދަޖެހުނީމައެވެ. ވައިހުސްވެ، ބޮނދުބުޑުން ސައިކީމާ ދެން ވަކި ތޫނުކުރަނީ، އިރެއްގައި ވައިއެޅުވި ބޮޑުން ބޭޒާރުކުރަން ބިތުފަންގިނަގާށެވެ. މަރުގައިމިއްޔާ ގައިމެވެ. މިއީ އަބަދުވެސް ކަންހިނގާ ގޮތެވެ. ދެން އޮންނާނީ މަހާނަމައްޗަށް މަޑިޖެހުމެވެ.
އެއް ދުވަހު މަތިހަށިނަގާފައި ހިނގި މީހާ އަނެއް ދުވަހު ހުންނާނީ ރަށްމެދަށް ނެރެ ހަވަރަށް ދީފައެވެ. އޭނާ ކުރި ހުރިހާ ރަނގަޅުކަމެއްގެ ވަސްވެސް ފިލުވާލާނެއެވެ. ނުވަތަ އެއިން ފޮށިފަޅާނެއެވެ. ބޭޒާރުކޮށް ނިމުނީމާ ދެން އޮންނާނީ އޭނާ ތޮށިނޮޅި ދޮންކެޔޮ އެހެން މީހުން ކެއުމެވެ.
އަހަރެމެން ދުނިޔެއަށް ލޯހުޅުވެން ވެއްޖެއެވެ. އަޅުވާހާ އަނދުނަކުން ވާވެއްދޭ ބަޔަކަށް ނުވާން ވެއްޖެއެވެ. މިއީ އަބަދު ތަކުރާރުވަމުންދާ ބުރެއްކަން ހަނދާންކޮށް، ގަރަހިތަކަން ކަނޑުވާލަން ވެއްޖެއެވެ. ފިކުރަކަށް ވިޔަސް މީހަކަށް ވިޔަސް ތަނަކަށް ވިޔަސް ގިރިޓީ ލޯބި ދިނުން ހުއްޓާލަންވެއްޖެއެވެ. ގޮނޑިކޮއްކޮ ހެދިގެން ނުތިބޭންވެއްޖެއެވެ.
އެހެންނަމަވެސް މިކަން ވާން އޮތީ ސިކުނޑީގައި ހުރި ތެތްކަމަކުން ކަށިތަކުގައި ގިރިސްލައި، މުރާލި، ހިތްވަރު ހުރި ޖީލެއް އުފެއްދިގެންނެވެ. މުޖުތަމަޢު ނެގިމަޑުވެގެން ވާކަށް ނެތެވެ. މިއަދު މި ދަނީ ހަމަ ކިރިޔާ ބޯހިކޭވަރުންނެވެ. އެވަރު އަހަރެމެންނަށް ފުދޭކަށް ނުޖެހެއެވެ. ހަލާކަށް ހުސްނުވަނީސް އަބުޖަހާން ވެއްޖެއެވެ. ލަނޑުދަނޑިތައް ކަނޑައަޅައި އަމާޒުފަތްގަނޑަށް ވާސިލުވާން ކުރާ މަސައްކަތުގައި އެއްގަލަކަށް އަރަންވެއްޖެއެވެ. ހިކުމަތް އިސްކޮށް، ނަޒާހަތްތެރިކަމުގެ ރިޔާނަގައި ސުލްހަ މަސަލަސްކަމުގެ އައްސޭރިއަށް ފަރިދުވެލީގައި ދުއްވާލަމާ ބަހީއެވެ. ފިޔަލަ މީރު މާލިމީންގެ ދުވަސް މާޒީވެ ހިނގައްޖެއެވެ.
***
