ނޫކުލައިގެ ގަމީހުގެ މޭމަތިން ގޮށެއް ނައްޓާލައިގެން، ކުރު ސޯޓު ބުރިއެއްގައި، ޖޯލިފަތީގައި އެ އިންނެވީ ރާއްޖޭގެ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު އެވެ. އުމުރުފުޅުން އޭރު ދިހަ ވަރަކަށް އަހަރުގެ، އާންމު ނަމުންނަމަ އިބޫ އެވެ. އިށީނދެ ވަޑައިގެން އެ އިންނެވީ އާއިލީ ގެ، ޅ. ހިންނަވަރު، ނޫރާނީގޭ އުތުރު ފަރާތުގައި ހުރި ޖޯލިފައްޗެއްގަ އެވެ.
ރާއްޖޭގެ ސަގަފާތާއި ތާރީހު ދިރާސާކޮށް ލިޔުއްވުންތައް ޝާއިޢުކޮށްފައިވާ އެމެރިކާގެ ކްލެރެންސް މެލޯނީގެ ކެމެރާއަށް އެ އާއިލާ އަރާފައި ވަނީ، 1974 އިން 1976 އަށް ރާއްޖެއަށް ކުރެއްވި ދަތުރުތަކުގަ އެވެ. ނަމަވެސް މިހާތަނަށް އެ ފޮޓޯ އޮތީ އާންމު ނުވެ އެވެ.
ދިވެހި ތާރީހު އިލްމުވެރިޔާ ނާޖިހު ދީދީ އަށް ލިބިފައިވާ ކްލެރެންސްގެ ފޮޓޯ އަލްބަމުގެ ފޮޓޯތަކުގެ ތެރެއިން އެންމެ ފަހުން ސޯޝަލް މީޑިއާއަށް ދޫކޮށްލީ މި ފޮޓޯފުޅެވެ.
ފޮޓޯއިން ފެންނަ މީހުން
- ރައީސް ސޯލިހުގެ އެއްފަރާތުގައި މަންމާފުޅު، މުއުމިނާ ހުސައިންފުޅު އަދި އަނެއް ފަރާތުގައި ރައީސް ސޯލިހު އާއި އެ އާއިލާގެ ބޭފުޅުންނަށް ގުރުއާން ކިޔަވައި ދިން އެދުރުބެ. ރައީސް ސޯލިހުގެ އާއިލާގެ ބޭފުޅުން އެދުރުބެ އަށް ކިޔައި އުޅުނީ "ބޮޑު ބައްޕަ" އެވެ. ނަމަވެސް ރައީސް ސޯލިހަށް އެއީ "ކާފަ" އެވެ.
- މަންމާފުޅުގެ އުނގުގައި އިންނެވީ ކޮއްކޯފުޅު، ނާޒު އެވެ. ނާޒު ވަނީ ނިޔާވެފަ އެވެ.
- ކޮއްކޯފުޅު ފާތުމަތު މުހައްމަދު ސޯލިހު (ފާތޭ)؛ ފާތޭ އެ ހުންނެވީ ހުދު ކުލައިގެ ގަމީހެއްގައި ހުރި ކުއްޖާގެ ފަހަތުން މޫނުގެ ބައެއް ފެންނަ ގޮތަށެވެ.
- އަހުމަދު މުހައްމަދު ސޯލިހު؛ ފާތޭގެ ކުރިމަތީގައި ހުދު ގަމީހުގައި އެ ހުންނެވި ކޮއްކޯފުޅު ވަނީ ނިޔާވެފަ އެވެ.
- ނޫކުލައިގެ ދިގު ހެދުމެއްގައި ކޮޅަށް އެ ހުންނެވީ ބޮޑުދައިތަ އެވެ.
މި ފޮޓޯ ފޭސްބުކްގައި ޝެއާ ކުރައްވުމަށް ފަހު، ރައީސް ސޯލިހުގެ ކޮއްކޯފުޅު، މަޖީދިއްޔާ ސްކޫލުގެ ޕްރިންސިޕަލް އައިޝަތު މުހައްމަދު ސޯލިހު ވިދާޅުވެފައިވަނީ އެއީ ބޭފުޅުންނަށް "ޖަވާހިރެއް" ކަމަށެވެ.
ސަބަބަކީ މީގެ ގާތްގަނޑަކަށް 50 އަހަރު ކުރީގެ ފޮޓޯ، އެ ބޭފުޅުންނަށް ވެސް ފެނިވަޑައިގެންފައި ނެތެވެ. އެހެން ނާޖިހު އަށް ވަރަށް ބޮޑަށް ޝުކުރު ދެންނެވި އެވެ.
ރައީސް ސޯލިހު އެހާރާއި މިހާރު
އުމުރުފުޅުން 60 އަހަރުގެ ރައީސް ސޯލިހުގެ ފަރާތްޕުޅުން މިހާރު ވެސް ފެންނަ ބައެއް ކަންކަން 10 އަހަރުގެ ފޮޓޯފުޅުން ވެސް ފެންނަން އެބަ ހުއްޓެވެ. ހިނިތުންވުމާއި އަތްޕުޅުގެ ހަރަކާތް އޭރުވެސް ހުރީ މިހާރު ވެސް ފެންނަ ގޮތަށެވެ.
ހިންނަވަރަށް އުފަންވެވަޑައިގެން، ބޮޑު އާއިލާއާއެކު އުމުރުފުޅުން 10 އަހަރު ވަންދެން ރައީސް ސޯލިހު އުޅުއްވީ ރަށުގެ ސާދާ ވެށީގަ އެވެ. ހިންނަވަރު މަދަރުސަތުއް ނާސިޔާގައި ތައުލީމު ހާސިލު ކުރައްވަމުން ގެންދެވުމަށް ފަހު، މާލެ އަށް ބަދަލުވެ ވަޑައިގަތެވެ.
ބައްޕަ ފަރާތުގެ ބޮޑުބޭބެގެ އަރިހުގައި ހުންނަވައިގެން ފުރަތަމަ ތައުލީމު ހާސިލްކުރެއްވީ އީޕީއެސް ސްކޫލުންނެވެ. ޖޭސީއީ އިމްތިހާނު ހެއްދެވުމަށް ފަހު، އެ އިންތިހާނުގެ އެންމެ ރަނގަޅު ފަސް ދަރިވަރުންގެ ތެރޭގައި ހިމެނިވަޑައިގަތުމުން، މަޖީދިއްޔާ ސްކޫލުގައި ކިޔަވައި ވިދާޅުވުމަށް ފުރުސަތު ލިބިވަޑައިގެންވި އެވެ.
ރައީސްގެ ރަށުގެ ދިރިއުޅުއްވުން ފެންނަ ފޮޓޯ ސޯޝަލް މީޑިއާގައި ވަރަށް ގިނަ މީހުން ދަނީ ޝެއާކޮށް ކޮމެންޓް ކުރަމުންނެވެ.
