ޓައިޓަންސް ބާސްކެޓްބޯޅަ އެކެޑަމީގައި ތަމްރީން ހަދަމުން އަންނަ ކުދިންނަށް ވާދަވެރި މެޗުތަކެއް ހޯދައިދިނުމުގެ ކުރިއަށް ގެންދިޔަ ބާސްކެޓްބޯޅަ ފެސްޓިވަލް ކާމިޔާބުކަމާ އެކު ނިންމާލައިފި އެވެ.
މިދިޔަ ބުދަ ދުވަހުން ފެށިގެން ހޮނިހިރު ދުވަހުގެ ނިޔަލަށް ކުރިއަށް ގެންދިޔަ ބާސްކެޓްބޯޅަ ފެސްޓިވަލްގައި ފަސް އުމުރުފުރައަކުން 400 އަށް ވުރެ ގިނަ ކުދިން ވާދަކުރި އެވެ. އެ ގޮތުން ޕްރީ ސްކޫލުން ފެށިގެން ގޮސް ގްރޭޑް 10ގެ ކުދިން ވެސް މި ފެސްޓިވަލްގައި ވާދަކުރި އެވެ.
މުބާރާތުގެ ފުރަތަމަ ދެ އުމުރުފުރާ ކަމަށްވާ ކެޓަގަރީ އޭ (ގްރޭޑު އެކަކުން ފެށިގެން ދަށް ގްރޭޑްތައް) އަދި ކެޓަގަރީ ބީ (ގްރޭޑް ދޭއް)ގެ މެޗުތައް ކުރިއަށްދިޔައީ ވަނަ ހޮވާ ގޮތަކަށް ނޫނެވެ. މި އިވެންޓު ކުރިއަށް ގެންދިޔައީ "މަޖާ މާހައުލެއް" ގައި މެޗުތަކެއް ކުޅެލަން ކުދިންނަށް ފުރުސަތުދޭ އުސޫލުންނެވެ.
ޓައިޓަންސް އެކެޑަމީގެ ބާސްކެޓްބޯޅަ ފެސްޓިވަލްގެ ތެރެއިން.--- ފޮޓޯ: އަބްދުﷲ އިޔާން/ އަދަދު
ގްރޭޑު ތިނަކުން ފެށިގެން 10 އަށް ކުރިއަށް ގެންދިޔައީ ވާދަވެރި މެޗުތަކެވެ. އެ ގޮތުން މި ބައިގެ އެއް ވަނަ އަށް ރަން މެޑަލް އަދި ދެ ވަނަ އަށް ރިހި މެޑަލް ދިނެވެ. އެހެން ހުރިހާ ޓީމުތަކަށް ވާނީ ބައިވެރިވުމުގެ ޓޯކެން އެއްގެ ގޮތުގައިވެސް މެޑަލް ދީފަ އެވެ.
މުބާރާތް ބޭއްވުމުގެ މައިގަނޑު މަގުސަދަކީ ޒުވާން އެތުލީޓުންނަށް ކުޅިވަރުގެ އަހުލާގު ދަސްކޮށްދީ، ވާދަވެރި މާހައުލެއްގައި މެޗުތަކެއް ކުޅެން ފުރުސަތުދީ އެ ކުދިންގެ ހުނަރު ދައްކާލަން މަގުފަހި ކޮށްދިނުމެވެ. ކުދިންގެ މެދުގައި ގުޅުން ބަދަހިކޮށް އެކުވެރި މާހާއުލެއްގައި މުބާރާތް ކުރިއަށް ގެންދިޔުމުގެ މަގުސަދުގައި މެޗުތައް ކުޅެފައިވަނީ ވަކި ވަކި ޓީމުތަކެއް ހަދައިގެންނެވެ. އެ ގޮތުން ޓީމްތައް ހަދާފައިވަނީ އެކި ސްކޫލުތަކުގެ ކުދިން މިކްސްކޮށެވެ.
ޓައިޓަންސް ބާސްކެޓްބޯޅަ އެކެޑަމީ އަކީ ގައުމީ ޓީމްގެ ކުރީގެ ކުޅުންތެރިޔާ އަދި ކެޕްޓަން އިލްޔާސް އިބްރާހިމް (އިއްލެ)ގެ ކުރީ ސަފުގައި ހުރެގެން ކުރިއަށްގެންދާ އެެކަޑެމީ އެކެވެ. އޭނާ އަކީ ކޯޗިންގެ އެންމެ މަތީ ފާސްކަމަށްވާ ފީބާ ލައިސަންސް އޮތް ކޯޗެކެވެ.
މި އެކެޑަމީގައި އިއްލެގެ އިތުރުން މަސައްކަތްކުރާ ކޯޗުންގެ ތެރޭގައި ގައުމީ އަންހެން ޓީމްގެ އެސިސްޓަންޓް ކޯޗު މޫސާ އަލީ، ގައުމީ ޓީމްގެ ކުރީގެ ކުޅުންތެރިޔާ އަލީ ފަޒްލީ (އޮލިމްޕިކް)، އަހުމަދު ފިރާޝް، ޒަކަރިއްޔާ ޝިޔާމް، ރިޝްވާން ޝިޔާމް، އިސްމާއިލް ފަރުހާން، ހުސެއިން ހަލީމް، އަބްދުﷲ ޒިޔާއު، އާދިލް ޝަހީދު، އަދި ބިދޭސީ ތިން ކޯޗެއްވެސް ހިމެނެ އެވެ.
މި ހުރިހާ ކޯޗުންނަކީ ވެސް ކޯޗިންގެ ޖޫނިއާ ލެވެލް އިން ފެށިގެން ލެވެލް 3ގެ ކޯޗުން ސެޓިފިކެޓު އޮތް ކޯޗުންނެވެ. ޓައިޓަންސް ބާސްކެޓްބޯޅަ އެކެޑަމީގެ އަމާޒަކީ ކޮންމެ އަހަރެއްގައި ވެސް މަދުވެގެން ދެ ފެސްޓިވަލް އެ އެކަޑެމީގެ ކުދިންނަށް އަމާޒުކޮށް ބޭއްވުމެވެ.
