އިރާނުގެ އިސްލާމިކް ރިވޮލިއުޝަނަރީ ގާޑުގެ ވެރިޔާގެ އިންޒާރުތަކަށް ބެލުމެއް ނެތި، އެ ގައުމުގެ އެކި ހިސާބުތަކުގައި އަދިވެސް ސަރުކާރާ ދެކޮޅަށް މުޒާހަރާ ކުރަމުން އެބަދެ އެވެ.
ހޮނިހިރު ދުވަހުގެ ރޭ އިރާނުގެ އިސްލާމިކް ރިވޮލިއުޝަނަރީ ގާޑުގެ ވެރިޔާ މޭޖާ ޖެނެރަލް ހުސެއިން ސަލާމީ އިންޒާރު ދެއްވީ އިތުރަށް މަގުތަކަށް ނުނިކުތުމަށެވެ.
އިރާނުގައި ސަރުކާރާ ދެކޮޅަށް މުޒާހަރާ ކުރަން ފެށީ ބުރުގާ ނާޅާ ހުރުމުން ހައްޔަރު ކުރި އުމުރުން 22 އަހަރުގެ އަންހެނަކު ސެޕްޓެމްބަރު 16 ވަނަ ދުވަހު މަރުވި މައްސަލައިގަ އެވެ.
މުޒާހަރާގެ ތެރެއިން ގިނަ އަދަދެއްގެ ޒުވާނުން މަރުވަމުން ދިޔަ ނަމަވެސް، މުޒާހަރާ ހުއްޓައެއް ނުލަ އެވެ. އާދީއްތަ ދުވަހު ސަނަންދާޖް ސިޓީގައި އާއްމުން އެއްވުން ހުއްޓުވުމަށް ބަޑިޖެހި އެވެ.
ސޯޝަލް މީޑިއާގައި އާއްމުވި ވީޑިއޯތަކުން ފެންނަ ގޮތުގައި ވެރިރަށް ތެހްރާނާއި، ދެކުނުގައި އޮންނަ ކެރްމަން އާއި އެހެން ސިޓީތަކުގައި ވެސް މުޒާހަރާކުރި އެވެ.
އިރާން ހިޔުމަން ރައިޓްސް (އައިއެޗްއާރް) ޖަމިއްޔާއިން ބުނީ މުޒާހަރާތަކުގައި މިހާތަނަށް 160 މީހުން މަރުވެފައިވާ އިރު، ކުޑަކުދިން ގިނަ އަަދަދަކަށް ހިމެނޭ ކަމަށެވެ.
އެތައް ސަތޭކަ ބަޔަކު ހައްޔަރުކޮށްފައިވާ އިރު، ނޫސްވެރިން ހައްޔަރުކޮށް ހައްގުތަކުން މަހުރޫމު ކުރަމުން ދާތީ 300 އަށް ވުރެ ގިނަ ނޫސްވެރިން އާދީއްތަ ދުވަހު ޕެޓިޝަނެއްގައި ސޮއިކޮށް ކަންބޮޑުވުން ފާޅުކުރި އެވެ.
އިރާނުގެ ސަރުކާރުން ސިފަކުރާ ގޮތުގައި މުޒާހަރާތަކަކީ ގައުމު ނުތަނަވަސްކަމަށް ވައްޓާލަން އެމެރިކާ އިސްވެ އޮވެގެން ރޭވި ރޭވުމެކެވެ.
