ފޯޅަވައްސަކީ ޑިއަގޯ ގާސިއާ ނޫން ކަމަށާއި އިނގިރޭސިން ޗާގޯސް ޖަޒީރާތަކުން މީހުން ހުސްކުރި އިރު ފޯޅަވަހީގައި މީހުން ނޫޅޭ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ޗާގޯސްގެ ސިޔާދަތީ ބާރު ހޯދަން މޮރިޝަސް އިން ކުރާ މަސައްކަތުގައި އެ ގައުމަށް ތާއީދުކުރަން ސަރުކާރުން ނިންމުމާ ގުޅިގެން އުފެދުނު ބަހުސްގައި ގިނަ ވާހަކަފުޅުތަކެއް ދެއްކެވުމަށް ފަހު ނަޝީދު ރޭ އާއްމުކުރެއްވީ ތާރީހީ ބައެެއް ހެކިތަކުގެ މައްޗަށް ބިނާކުރައްވާފައިވާ ދިގު މަޒުމޫނެކެވެ. އެ މަޒުމޫނުގެ މައިގަނޑު ނުކުތާއަކީ މީލާދީން 17 ވަނަ ގަރުނުގައި ފޯޅަވައްސަކީ [އެމަނިކުފާނު ވިދާޅުވާ ގޮތުން ނަމަ ފޯއްޅަވައްސަކީ] މީހުން ދިރިއުޅުނު ރަށެއް ކަން ފާހަގަކުރެއްވުމެވެ. އަނެއް ނުކުތާއަކީ އެއީ ފޯޅަވަހި ކަމަށް ބައެއް މީހުން ހީކުރާ ޑިއަގޯ ގާސިއާ އަތޮޅަކީ އަދި ފޯޅަވަހި ނޫން ކަމެވެ. އަނެއް ނުކުތާއަކީ އެތަން ހައްގީ ދިވެހިންނަށް ކަމަށް އެމަނިކުފާނު ތަކުރާރުކޮށް ވިދާޅުވާ ވިދާޅުވުމެވެ.
"...ފޯއްޅަވަހި ކަމަށް މިތަނުގައި މި ބުނަނީ ޕެރޮސް ބަނޮސް އަތޮޅެވެ. އިނގިރޭސި ދައުލަތުން ފޯއްޅަވަހި ދޫކޮށްލާ އިރެއްގައި އެރަށުގެ ސިޔާދަތީ ބާރު އެންމެ ފުރަތަމަ އެނބުރޭނީ އެރަށުގެ އަހުލުވެރިންނަށެވެ. ފޯއްޅަވައްސަކު ބަަޔަކު ނެތެވެ. މީހުން ތިބީ ޑިއަގޯ ގާސިއާ އަތޮޅުގަ އެވެ،" ނަޝީދުގެ ލިއުއްވުމުގައި ވިދާޅުވި އެވެ.
ޕެރޮސް ބަނޮސް އަތޮޅުގައި 28 ރަށް އޮވޭ
ޕެރޮސް ބަނޮސް އަތޮޅުގެ ލެ ޕުލޯ. ނަޝީދު ވިދާޅުވާ ގޮތުން ފޯޅަވައްސަކީ މިއީ.
ނަޝީދުގެ ލިއުއްވުމުގައި ފޯޅަވަހި ކަމަށް ވިދާޅުވެފައިވާ ޕެރޮސް ބަނޮސް އަތޮޅަކީ ޗާގޯސްގެ ރަށްތަކުގެ ތެރެއިން، އިނގިރޭސިން އެމެރިކާއަށް ކުއްޔަށް ދީފައިވާ ޑިއަގޯ ގާސިއާގެ ހުޅަނގު އުތުރުން އޮތް ޗާގޯސްގެ އެންމެ ބޮޑު އަތޮޅުގެ ވެސް އުތުރަށް އޮތް އަތޮޅެކެވެ. ޖުމްލަ 28 ރަށަކާއި ފިނޮޅެއް އަދި 12 ކަނޑު އޮޅި އޮންނަ ޕެރޮސް ބަނޮސްގެ އިރު އުތުރުން ވެސް ޗާގޯސްގެ އެހެން ދެ އަތޮޅެއް އޮވެ އެވެ.
އެ ތިން އަތޮޅަކީ ވެސް ޑިއަގޯ ގާސިއާއާ ވަރަށް ދުރުގައި، ޗާގޯސްގެ އަތޮޅުތަކުގެ ތެރެއިން ރާއްޖެއާ އެންމެ ކައިރިއަށް އޮތް ތިން އަތޮޅެވެ.
ފަރަންސޭސި ދަތުރުވެރިއެއް ކަމަށްވާ ވިންސަންޓް ލަބްލޭންކް 1640 ވަނަ އަހަރު ރާއްޖެއާ ބެހޭ ގޮތުން ލިއުއްވާފައިވާ ލިއުއްވުމަކާ ހަވާލާދެއްވައި ނަޝީދުގެ މަޒުމޫނުގައި ވިދާޅުވީ ފޯޅަވައްސަކީ ކުރިން މީހުން އުޅުނު ތިޔާގި ރަށެކެވެ. އެހެން ނަމަވެސް އެތަނުގެ ބާރުވެރިކަން އޭރު އޮތީ އަސޭ ރަސްގެފާނަށެވެ. އަސޭ ރަސްގެފާނުގެ ފަރާތްޕުޅުން އެ ރަށުގައި ހުރި ކަމަށް ބުނާ ވެރިއެއްގެ ނަން ވެސް ލަބްލޭންކާ ހަވާލާދީ އެމަނިކުފާނު ގެންނަވާފައި އެބަ އޮތެވެ.
ފޯޅަވައްސަކީ ރާއްޖޭގެ ރަށެއް ކަމަށް އެމަނިކުފާނު ދައުވާ ކުރައްވާ ބައެއް ސަބަބުތައް ލިއުމުގައި ހިމަނުއްވާފައި ވެ އެވެ. އޭގެ އެއް ސަބަބަކީ ފުވައްމުލަކުގެ ނަމާއި ޕެރޮސް ބަނޮސް އަތޮޅުގެ ރަށެއް ކަމަށްވާ "ލެ ޕުލޯ"ނަމުގައި އެއްގޮތްކަމެއް ހުރުމެވެ. ރާއްޖޭގެ ތާރީޚު ދިރާސާކުރެއްވި މުއައްރިޚު އެޗްސީޕީ ބެލް އާ ހަވާލާ ދެއްވައި ނަޝީދު ވިދާޅުވީ "ޕުލޯ" އަކީ މެލޭ ބަހުން ކިޔާފައިވާ ނަމެއް ކަމަށެވެ.
ފޯޅަވައްސަށް އެނަން ކިޔާ ސަބަބެއް ކަމަށް ވެދާނެ ކަމަށް އެމަނިކުފާނު ލަފާކުރައްްވާ ގޮތަކީ އެފްރިކާ ވަށާލައި އިންޑިއާ ކަނޑަށް އަންނަ މީހުން ފުރަތަމަ އެތެރެވާނީ ފޯޅަވައްސަށެވެ. އަސޭއަށް ދާނީ ފޯޅަވަހިން ފުވައްމުލަކަށް ދަތުރުކުރުމަށް ފަހުގައި ކަމަށް ވެދާނެ ކަމަށް ވެސް އެމަނިކުފާނު ލަފާކުރައްވާފައި ވެ އެވެ.
"...ދެކުނު އެފްރިކާ ވަށާލައި އިންޑިއާކަނޑަަށް ވަދެ، އެ ކަނޑު ހުރަސްކޮށް އިރުމައްޗަށްދާ އެއް މަގަކީ ފޯއްޅަވަހިން، ފުވައްމުލަކުން އަސޭއަށެވެ. މި ދެންނެވި ވަޔަށް ކިޔާ ނަމަކީ ފޯއްޅަވައި ކަމު ވުން ގާތެވެ،" މަޒުމޫނުގައި ނަޝީދު ވިދާޅުވި އެވެ.
"ހައްގީ ދިވެހީންނަށް"
މަޒުމޫނު ނިންމަވައިލައްވަމުން ނަޝީދު ވިދާޅުވެފައިވާ ގޮތުގައި އިނގިރޭސިން މޮރިޝަސްއަށް ގެންދިޔައީ ފޯޅަވަހީ މީހުންނެއް ނޫނެވެ. އެ ތަނުގައި ބަނޑަހަޖަހައިގެން ކުރިން އުޅުނީ ދިވެހިން ކަމަށް ވެސް އެމަނިކުފާނު ދައުވާ ކުރައްވަ އެވެ.
"...މޮރިޝަސްއަށް ގެންދިޔައީ ފޯއްޅަވަހީގެ މީހުންނެއް ނޫނެވެ. އެތަނުގައި ބަނޑަހަޖަހައިގެން މަސްވެރިކަމު އުޅުނީ ދިވެހިންނެވެ. ހާއްސަގޮތެއްގައި ފުވައްމުލަކު މީހުންނެވެ. އިނގިރޭސި ދައުލަތުން ޗާގޯސް ރިޖްގެ ރަށްރަށުން ފައިބާ އިރެއްގައި ޑިއޭގޯ ގާސިއާއާއި އަދި އެހެން ބައެއް އަތޮޅުތައް މޮރިޝަސްގެ ސިޔާދަތީ ބާރުގެ ދަށަށް ފުރޮޅުނު ނަމަވެސް ފޯއްޅަވަހީގެ ސިޔާދަތީ ބާރުވެރިކަން ލިބުން އެންމެ ހައްގީ ދިވެހިންނަށެވެ," މަޒުމޫނުގައި ނަޝީދު ވިދާޅުވި އެވެ.
"ފޯޅަވައްސަކީ ކުރިން މީހުން އުޅުނު ތިޔާގި ރަށެއް" ކަމަށް މަޒުމޫނުގެ ކުރީ ބައިގައި، ފަރަންސޭސި ދަތުރުވެރިޔާ ވިންސަންޓް ލަބްލޭންކާ ހަވާލާ ދެއްވައި ވިދާޅުވި ނަމަވެސް ފަހުބައިގައި އެމަނިކުފާނު ވިދާޅުވީ "ފޯއްޅަވައްސަކު ބަޔަކު ނެތް" ކަމަށެވެ. އެހެން ނަމަވެސް އެރަށް ފަޅުވީ ގޮތާ ބެހޭ ގޮތުން އެއްޗެއް ވިދާޅުވެފައެއް ނެތެވެ.
