މިއުނިކް (އޮކްޓޫބަރު 30) - ޖަރުމަނު ލީގުގައި ރޭ މައިންޒް އަތުން 6-2 އިން މޮޅުވެ، ބަޔާން މިއުނިކުން ފުރުސަތުގެ ބޭނުންހިފައި ލީގުގެ އެއް ވަނަ އަށް ޖެހިލައިފި އެވެ.
ބަޔާން ލީގުގެ އެއް ވަނަ އަށް އެރީ ދެ ވަނައިގައި އޮތް ޔޫނިއަން ބާލިން އަށް ވުރެން އެއް މެޗު އިތުރަށް ކުޅެގެންނެވެ. ބަޔާނަށް 12 މެޗުން 25 ޕޮއިންޓް ލިބިފައިވާއިރު، ޔޫނިއަން ބާލިން އަށް ވަނީ 11 މެޗުން 23 ޕޮއިންޓް ލިބިފަ އެވެ. މިރޭ ބޮރޫޝިއާ މުންޗެންގްލަޑްބެކް އަތުން މޮޅުވެގެން، ޔޫނިއަން ބާލިން އަށް އަލުން އެއް ވަަނަ އަށް އެރޭނެ އެވެ.
ރޭގެ މެޗުގެ ފަސް ވަނަ މިނިޓްގައި ބަޔާނުން ލީޑުނެގީ އޭރިއާތެރެއިން ސަޑިއޯ މާނޭ ނެގި ހުރަހަކުން ސާޖް ގްނަބްރީ ޖެހި ގޯލުންނެވެ. މެޗުގެ 27 ވަނަ މިނިޓްގައި ޖަމާލް މުސިއާލާ އޭރިއާބޭރުން ޖެހި ގޯލަކުން ބަޔާން ލީޑުފުޅާކުރި އެވެ. މެޗުގެ 43 ވަނަ މިނިޓްގައި މާނޭ ވަނީ ބަޔާންގެ ތިން ވަނަ ގޯލު ޖަހައިފަ އެވެ. ޕެނަލްޓީ އަކުން މާނޭ ފޮނުވާލި ބޯޅަ މައިންޒް ކީޕަރު ރޮބިން ޒެންޓްނާ މަތަކުރި ނަމަވެސް މާނޭ ވަނީ ރީބައުންސް ގޯލަށް ވައްދާލައިފަ އެވެ.
ފުރަަތަމަ ހާފުގެ އިތުރު ވަގުުތުގައި މައިންޒްގެ ސިލްވަން ވިޑްމެއާ ވަނީ ލަނޑެއް ޖަހައި އުންމީދެއް ހޯދައިދީފަ އެވެ.
މެޗުގެ 57 ވަނަ މިނިޓްގައި މާނޭ ނެގި ހުރަހަކުން ބަޔާންގެ ހަތަރު ވަނަ ލަނޑު ޖެހީ ލެއޯން ގޮރެޓްޒްކާ ބޮލުންނެވެ. މެޗުގެ 77 ވަނަ މިނިޓްގައި ބަޔާންގެ ޒުވާން ކުޅުންތެރިޔާ، މަތީސް ޓެލް، 17، އޭރިއާބޭރުން ޖެހި ބޯޅަ މައިންޒް ކުޅުންތެރިއަކު ފައިގައި ޖެހިފައި ވަނީ ގޯލަށެވެ. އޭގެ ފަސް މިނިޓް ފަހުން މައިންޒްގެ މާކަސް އިންގްވާޓްސަން ގޯލެއް ޖެހި އެވެ. ބަޔާންގެ ފަހު ގޯލު ޖެހީ މެޗުގެ 86 ވަނަ މިނިޓްގައި އެރިކް މެކްސިމް ޗޮޕޫ-މޯޓިން އެވެ. މިއީ ކިންގްސްލީ ކޯމަން އާއި ޗޮޕޫ-މޯޓިންގެ ކޮމްބިނޭޝަނުން ޖެހި ލަނޑެކެވެ.
މެޗަށް ފަހު ބަޔާންގެ ކޯޗު ހޫލިއަން ނާގަލްސްމަން ބުނީ ޓީމުގެ ކުޅުން މެޗަކަށް ފަހު މެޗެއް ރަނގަޅުވަމުން އަންނައިރު، އެންމެ ބޮޑު އުފަލަކީ ބޭނުންވާ ފުޓްބޯޅަ ކުޅެގެން ސަޕޯޓަރުން ވެސް ހިތްހަމަޖައްސައިދެވޭތީ ކަމަށެެވެ.
ރޭ އައިންޓްރަކްޓް ފްރޭންކްފާޓް ދަނޑުގައި 2-1 އިން މޮޅުވެ ބޮރޫޝިއާ ޑޯޓްމަންޑް ވަނީ ލީގުގެ ތިން ވަނަ އަށް ޖެހިލައިފަ އެެވެ. ޑޯޓްމަންޑަށް ވަނީ 12 މެޗުން 22 ޕޮއިންޓް ލިބިފަ އެވެ.
ފްރޭންކްފާޓްގައި ރޭ ކުޅުނު މެޗުގެ 21 ވަަނަ މިނިޓްގައި ޑޮންޔެލް މާލެން ދިން ބޯޅައަކުން ހޫލިއަން ބްރަންޑްޓް ވަނީ ލަނޑެއް ޖަހައި، ޑޯޓްމަންޑަށް ލީޑުނަގައިދީފަ އެވެ. އެކަަމަކު، އޭގެ ހަތަރު މިނިޓް ފަހުން ޑައިޗީ ކަމާޑާ ވަނީ ލަނޑެއް ޖަހައި ނަތީޖާ ހަމަހަަމަ ކޮށްދީފަ އެވެ. ދެ ވަނަ ހާފުގައި ޑޯޓްމަންޑް މޮޅުކޮށްދިން ލަނޑު ޖެހީ މި ވަގުތު ތަފާތު ފޯމެއްގައި ކުޅެމުން އަންނަ ޖޫޑް ބެލިންހަމް އެވެ.
