ލަންޑަން (އޮކްޓޫބަރު 30) - އިނގިރޭސި ޕްރިމިއާ ލީގުގައި ރޭ ޗެލްސީ އާއި ލިވަޕޫލް ކުޅުނު މެޗުތަކުން ބަލިވިއިރު، މެންޗެސްޓާ ސިޓީ މުހިންމު މޮޅެއް ހޯދައި ލީގުގެ އެއް ވަނަ އަށް ޖެހިލައިފި އެވެ.
ސިޓީ ވަނީ ރަށުންބޭރުގައި 1-0 އިން ލެސްޓާ ސިޓީ ބަލިކޮށްފަ އެވެ. ބްރައިޓަން ދަނޑުގައި ޗެލްސީ ބަލިވީ 4-1 އިންނެވެ. އަދި ޖެހިޖެހިގެން ދެ ވަނަ ހަފްތާގައި ރެލިގޭޝަންގައި އޮތް ޓީމެއްގެ އަތްދަށުވި ލިވަޕޫލް މި ފަހަރު ބަލިވީ އަމިއްލަ ދަނޑުގައި 2-1 އިން ލީޑްސް ޔުނައިޓެޑް އަތުންނެވެ.
ރޭގެ މޮޅާ އެކު ސިޓީ އެއް ވަަނަ އަށް ޖެހިލީ 12 މެޗުން 29 ޕޮއިންޓް ހޯދައިގެންނެވެ. ދެ ވަނައިގައި އޮތް އާސެނަލަށް 11 މެޗުން 28 ޕޮއިންޓް ލިބިފައިވާއިރު، ތިން ވަނައިގައި އޮތް ޓޮޓެންހަމަށް ވަނީ 13 މެޗުން 26 ޕޮއިންޓް ލިބިފަ އެވެ. ޓޮޓެންހަމް ރޭ ވަނީ އިތުރު ވަގުތުގައި ގޯލު ޖަހައި 3-2 އިން ބޯންމައުތު ބަލިކޮށްފަ އެވެ.
އަނިޔާގެ ސަބަބުން އާލިން ބްރައުޓް ހާލަންޑް ނުލައި ސިޓީން ރޭގެ މެޗު ކުޅުނުއިރު، އެ ޓީމުން ޖެހި ހަމައެކަނި ލަނޑު ދެ ވަނަ ހާފު ފެށިގެން ހަތަރު ވަނަ މިނިޓްގައި ޖެހީ ކެވިން ޑިބްރޭނާ އެވެ. މިއީ ހިލޭ ޖެހުމަކުން ޑިބްރޭނާ ޖެހި ގޯލެކެވެ. މި މެޗުގައި ލެސްޓާ އިން ވެސް ގޯލެއް ޖެހޭތޯ ގިނަ އެޓޭކްތަކެއް ކުރި އެވެ. އެކަމަކު، އެކަން ކާމިޔާބުވާ ގޮތެއްނުވި އެވެ.
ބްރައިޓަންގެ ކޯޗު ޑި ޒާބީ (ކ) އާއި ޗެލްސީގެ ކޯޗު ޕޮޓާ ރޭގެ މެޗުގެ ކުރިން.
ބްރައިޓަން ދަނޑުގައި ރޭ ޗެލްސީން ފުރަތަމަ ހާފު ނިންމާލަން ޖެހުނީ ތިން ގޯލު ފަހަތުގައި އޮވެގެންނެވެ. މެޗު ފަށައިގެން ފަސް ވަނަ މިނިޓްގައި ލެއަންޑްރޯ ޓްރޮސާޑް ވަނީ ގޯލެއް ޖަހައި ބްރައިޓަން އަށް ލީޑުނަގައިދީފަ އެވެ. އޭގެ ފަހުން ބްރައިޓަން އިން ޖެހި ދެ ގޯލަކީ ވެސް ޗެލްސީގެ ކުޅުންތެރިން އަތުން ބައިިކޮޅަށް ވަން ގޯލުތަކެކެވެ. ކޯނަރެއްގައި ޗެލްސީގެ ރުބެން ލޮފްޓަސް ޗީކް ފައިގައި ޖެހިފައި ބައިކޮޅަށް ވަންއިރު، ފުރަތަމަ ހާފު ނިމުމުގެ ކުރިން ބްރައިޓަންގެ އެސްޓޫޕީނިއަން ނެގި ހުރަހެއް ބައިކޮޅަށް ވަނީ ޗެލްސީގެ ޓްރެވޯ ޗަލޯބާ ފައިގައި ޖެހިފަ އެވެ.
ޗެލްސީން ދެ ވަނަ ހާފު ފެށީ ގޯލްކީޕަރު ކެޕާ އަރިއްޒަބަލާގާގެ ބަދަލުގައި އެޑޮއާޑް މެންޑީ ކުޅެން އަރުވައިގެންނެވެ. އަދި މި ހާފް ފެށިގެން ތިން މިނިޓް ތެރޭ ކައި ހަވާޓްޒް ވަނީ ގޯލެއް ޖަހައި، އުންމީދެއް ހޯދައިދީފަ އެވެ. އެކަމަކު، އޭގެ ފަހުން ގޯލެއް ޖަަހަން ޗެލްސީން ކުރި އެއްވެސް މަސައްކަތެއް ކާމިޔާބުނުވިއިރު، މެޗުގެ އިތުރު ވަގުތުގައި ޗެލްސީގެ ކީޕަރު މެންޑީ އަތުން ދޫވި ބޯޅައެއް ބްރައިޓްންގެ ޕަސްކާލް ގްރޮސް ވަނީ ގޯލަަށް ފޮނުވާލައި އެ ޓީމަށް ހަތަރު ވަނަ ލަނޑެއް ޖަހައިދީފަ އެވެ.
މިއީ ބްރައިޓަން ދޫކޮށް މިދިޔަ މަހު ޗެލްސީއާ ހަވާލުވި ކޯޗު ގްރަހަމް ޕޮޓާގެ އިރުޝާދުގެ ދަށުން ކުޅުނު 10 މެޗުގެ ތެރެއިން ޗެލްސީ ބަލިވި ފުރަތަމަ ފަހަރެވެ. އަނެއްކޮޅުން، ޕޮޓާ އަށް ފަހު ބްރައިޓަންއާ ހަވާލުވި އިޓަލީގެ ކޯޗު ރޮބާޓޯ ޑި ޒާބީގެ ކޯޗުކަމުގައި އެ ޓީމުން ކުޅުނު ހަ މެޗުގެ ތެރެއިން ހޯދި ފުރަތަމަ މޮޅެވެ.
އަމިއްލަ ދަނޑުގައި ރޭ ލިވަޕޫލުން މެޗު ފަށަން ޖެހުނީ ވެސް ހިތްދަތިކޮށެވެ. ފަސް ވަނަ މިނިޓްގައި ލީޑްސް ޔުނައިޓެޑުން ލީޑުނެގީ ލިވަޕޫލްގެ ޖޯ ގޯމޭޒް ހެދި ގޯހެއްގެ ފައިދާނަގައި ޖެރާޑް މޮރޭނޯ ޖެހި ގޯލުންނެވެ. މެޗުގެ 14 ވަނަ މިނިޓްގައި އެންޑީ ރޮބަޓްސަން ނެގި ހުރަހެއް ގޯލަަށް ފޮނުވާލައި، ސަލާހު ލިވަޕޫލަށް އެއްވަރުކޮށްދިނެވެ.
ރޭގެ މެޗުގެ ތެރެއިން ލިވަޕޫލްގެ ވާޖިލް ވެން ޑައިކް.
އޭގެ ފަހުން ލިވަޕޫލުން ވަނީ ދެ ވަނަ ގޯލެއް ޖަހަން ގިނަ ހަމަލާތަކެއް ފޮނުވާލައިފަ އެވެ. ލިވަޕޫލްގެ ޑާވިން ނޫނޭޒް އާއި ރޮބާޓޯ ފިރްމީނޯ އަށް ލިބުނު ފުރުސަތުތަކުން ފޮނުވާލި ބޯޅަތައް ލީޑްސްގެ ކީޕަރު އިލާން މެލިއޭ ވަނީ މަތަކޮށްފަ އެވެ. ލީޑްސް މޮޅުވި ގޯލު މެޗުގެ 89 ވަނަ މިނިޓްގައި ކާމިޔާބުކުރީ ކްރައިސެންސިއޯ ސަމާވިލް އެވެ. އޭރިއާތެރެއިން ލިބުނު ކުޑަޖާގައެއްގެ ތެރެއިން ސަމާވިލް ވަނީ ގޯލުގެ ދުރު ކަނަށް ބޯޅަ ފޮނުވާލައިފަ އެވެ.
މިއީ ލިވަޕޫލްގެ ޑިފެންޑަރު ވާޖިލް ވެން ޑައިކް ލީގުގައި އަމިއްލަ ދަނޑުގައި ކުޅުނު 70 މެޗުގެ ތެރެއިން ބަލިވި ފުރަތަމަ ފަހަރެވެ. އަދި މިއީ ރޭގެ މޮޅާ އެކު ރެލިގޭޝަން ޒޯން ބޭރަށް ޖެހިލި ލީޑްސް އިން މި ފަހަރު ލީގުގައި ރަށުންބޭރުގައި ހޯދި ފުރަތަމަ މޮޅެވެ.
ނިއުކާސަލް ޔުނައިޓެޑުން ވަނީ ރޭ އެސްޓަން ވިލާ އަތުން 4-0 އިން މޮޅުވެ، ބަލިނުވެ އަށް ވަނަ މެޗު ނިންމާލައި، ލީގުގެ ހަތަރު ވަނަ އަށް ޖެހިލައިފަ އެވެ. އެ ޓީމަށް ވަނީ 13 މެޗުން 24 ޕޮއިންޓް ލިބިފަ އެވެ. ޗެލްސީ ފަސް ވަނައިގައި އޮތީ 12 މެޗުން 21 ޕޮއިންޓާ އެކު އެވެ. ރޭގެ ބައްޔާ އެކު ލިވަޕޫލް ނުވަ ވަނައިގައި އޮތީ 12 މެޗުން 16 ޕޮއިންޓް ހޯދައިގެންނެވެ.
