އެމެރިކާގެ ޖަލެއްގައި ގާތްގަނޑަކަށް 40 އަހަރު ހޭދަކުރި މީހެއްގެ ކުށެއް ނެތްކަން ޑީއެންއޭ ހެކިން ސާބިތުވުމުން، އޭނާ މިނިވަންކޮށްފި އެވެ.
މޯރިސް ހޭސްޓިންގްސް ޖަލުގައި ބަންދުކުރީ 1983 ވަނަ އަހަރު ކެލިފޯނިއާގައި ރޮބޭޓާ ވިޑެމެޔޭ މަރާލައި، އިތުރު ދެ މީހުން މަރާލަން މަސައްކަތް ކުރި މައްސަލައިގަ އެވެ.
އެހެން ނަމަވެސް، މުޅިން އަލށް ހޯދި ޑީއެންއޭ ހެކިން އެނގުނު ގޮތުގައި އެ ކުށް ކުރީ 2020 އަހަރު ޖަލުގައި ބަންދުކޮށްފައި ހުއްޓާ މަރުވި އެހެން ގައިދީއެކެވެ.
އޮކްޓޯބަރު 20، 1988 ގައި ކުށް ސާބިތުވި ކަމަށް ނިންމައި ބަންދުކުރި ހޭސްޓިންގްސް ޖަލުން މިނިވަން ކުރި އިރު، އޭނާގެ އުމުރުން 69 އަހަރެވެ.
ލޮސް އެންޖެލިސް ކައުންޓީ ޑިސްޓްރިކްޓް އެޓޯނީ ޖޯޖް ގެސްކޮން ވިދާޅުވީ އޭނާގެ މައްޗަށް ކުށް ސާބިތުވެފައިވުމަކީ ބޮޑު ނާއިންސާފެއް ކަމަށެވެ.
ރޮބޭޓާ ވިޑެމެޔޭ މަރުވެފައި އޮއްވާ ފެނުނީ އޭނާގެ ކާރުގެ ޑިކީ ތެރެއިންނެވެ. އޭނާއަށް ޖިންސީ ގޯނާކޮށް، ބޮލަށް ބަޑި ޖެހި ކަމަށް ފުލުހުން ބުންޏެވެ.
އެ މައްސަލައިގައި ހޭސްޓިންގްސްއާ ދެކޮޅަށް ދައުވާ އުފުލައި، ޕްރޮސެކިއުޓަރުން ބޭނުންވީ މަރުގެ ހުކުމް އިއްވުމަށެވެ. ފުރަތަމަ ޝަރީއަތުގައި ޖޫރީއަށް ގޮތެއް ނުނިންމުމުން، ދެ ވަނަ ފަހަރަށް ޝަރީއަތްކޮށް، ޖޫރީއިން 1988 ގައި ނިންމީ އުމުރަަށް ޖަލުގައި ބަންދު ކުރުމަށެވެ.
މައްސަލައިގައި ހައްޔަރު ކުރި ވަގުތުން ފެށިގެން ވެސް ހޭސްޓިންގްސް ބުނަމުން ދިޔައީ އޭނާއަކީ ކުށެއް ނެތް މީހެއް ކަމަށެވެ. އެކަމަކު ޑީއެންއޭ ޓެސްޓު ކުރުމަށް ހުށަހެޅުމުން، އިދާރާތަކުން ކުރިން ގަބޫލެއް ނުކުރި އެވެ.
ގިނަ މަސައްކަތަކަށް ފަހު ކުށެއް ނެތް ކަމަށް ބަޔާންކޮށް ކޮންވިކްޝަން އިންޓްގްރިޓީ ޔުނިޓަަށް 2021 ވަނަ އަހަރު މައްސަލަ ހުށަހެޅުމުން ޑީއެންއޭ ޓެސްޓުކޮށް، ކުށެއް ނެތްކަން ސާބިތުވީ މިދިޔަ ޖޫން މަހު އެވެ.
ހޭސްޓިންގްސް މިނިވަން ކުރުމާ އެކު ނޫސްވެރިންނަށް ބުނީ އޭނާގެ ހިތުގައި ރުޅިވެރިކަމެއް ނެތް ކަމަށާއި ބޭނުން ވަނީ އުމުރުގެ ބާކީ އޮތް ބައި އުފަލުގައި އުޅެން ކަމަށެވެ.
ހޭސްޓިންގްސް ބަދަލުގައި ޑީއެންއޭ ދިމާވި މީހާ 2020 ވަނަ އަހަރު މަރުވި އިރު، އޭނާ ބަންދުކޮށްފައި ހުރީ ރޮބޭޓާ ވިޑެމެޔޭ މަރާލި ގޮތާ ދާދި އެއް ގޮތަކަށް ހިންގި ކުށެއް ސާބިތުވެގެންނެވެ. އެ މައްސަަލައިގައި އޭނާ ވަނީ އަންހެނަކު ރަހީނުކޮށް، ކާރުގެ ޑިކީގެ ތެރޭގައި ބާއްވަައިފަ އެވެ.
