ގުއަންޓަނާމޯ ބޭ ޖަލުގައި ބަންދުކޮށްފައި ހުރި އެންމެ އުމުރުން ދުވަސްވީ ގައިދީ ގާތްގަނޑަކަށް 20 އަހަރު ފަހުން މިނިވަންކޮށްފި އެވެ.
އުމުރުން 75 އަހަރުގެ ސައިފުﷲ ޕަރާޗީ ހައްޔަރު ކުރީ އަލް ގައިދާއަށް ހަމްދަރުދީވާ މީހެއް ކަމަށް ތުހުމަތުކޮށް، ސެޕްޓެމްބަރު 11، 2001 ގެ ހަމަލާއަށް ދެ އަހަރު ވީ ފަހުންނެވެ.
އޭނާ އަލް ގައިދާއަށް ފައިސާ ހޭދަކުރި ކަމަށް އެމެރިކާއިން ބުންޏެވެ. އެކަމަކު 20 އަހަަރު ބަންދުކޮށްފަައި ހުރި އިރު ވެސް ދައުވާއެއް ނުއުފުލަ އެވެ. އޭނާ ބުނީ ކުރަނީ ދޮގު ތުހުމަތެއް ކަމަށެވެ.
އެމެރިކާގެ ނޭވީ ނުވަތަ ކަނޑުގެ ސިފައިން އޮޕަރޭޓް ކުރާ ގުއަންޓަނާމޯ ބޭ ޖަލު އުފެއްދީ ސެޕްޓެމްބަރު 11 ގެ ހަމަލާތަކަށް ފަހު 2001 ވަނަ އަހަރު އެވެ.
"ގުއަންޓަނާމޯ ބޭގައި ބަންދުކޮށްފައި ހުރި ޕާކިސްތާނުގެ ރައްޔިތެއް ކަމުގައިވާ ސައިފުﷲ ޕަރާޗާ މިނިވަންކޮށް، އޮކްޓޯބަރު 29، 2022 ވީ ހޮނިހިރު ދުވަހު ވަނީ އެނބުރި ޕާކިސްތާނަށް އައިސްފައި،" ޕާކިސްތާނުގެ ފޮރިން މިނިސްޓްރީން ބުންޏެވެ.
ޕަރާޗާގެ ގާނޫނީ ވަކީލު ކްލައިވް ސްޓެފޯޑް ސްމިތް ވަނީ އޭނާ މިނިވަން ކުރަން ނިންމިތާ އެތައް ދުވަހެއް ފަހުން ނިންމުން ތަންފީޒު ކުރުމުން ފާޑުކިޔައިފަ އެވެ. އޭނާ މިނިވަން ކުރަން ނިންމީ މިދިޔަ އަހަރު އެވެ.
ޕަރާޗާ ހައްޔަރު ކުރީ ޖުލައި 2003 ވަނަ އަހަރު އެމެރިކާގެ އެފްބީއައިއިން ހިންގި ސިއްރު އޮޕަރޭޝަނެއްގައި ތައިލޭންޑުންނެވެ. ޕަރާޗާއަކީ އެމެރިކާއިން ކިޔަވައިގެން ހުރި މީހެކެވެ.
އަފްގާނިސްތާނުގައި އެމެރިކާ ސިފައިން ހިންގި ބަގްރަމް ޖަލުގައި 14 މަސް ބެހެއްޓުމަށް ފަހު އޭނާ ބަދަލުކުރީ ގުއަންޓަނާމޯ އަށެވެ.
އެ ޖަލުގެ މަގްސަދަކީ އެމެރިކާއިން "ޓެރަރިޒަމާ ދެކޮޅަށް ކުރާ ހަނގުރާމައިގައި" ގައިދީން ބަންދު ކުރުމެވެ. އެއީ ލާއިންސާނީ އެތައް އަމަލެއް ހިންގާ ތަނެއްގެ ގޮތުގައި އދ. ގެ އިންސާނީ ހައްގުތަކާ ބެހޭ ތަޖުރިބާކާރުން ސިފަކުރެ އެވެ.
ބަންދުކޮށްފައި ތިބި ގައިދީންގެ ތެރެއިން ދައުވާއެއް އުފުލާފައި ނުވާ މީހުން މިނިވަންކޮށް، ދެން ތިބި މީހުންގެ ޝަރީއަތް އަވަސް ކުރަން އެމެރިކާގެ ރައީސް ޖޯ ބައިޑެންއަށް ދަނީ ޕްރެޝަރު ކުރިމަތިވަމުންނެވެ.
މިދިޔަ އަހަަރު ޕަރާޗާގެ އިތުރުން އުމުރުން 55 އަހަރުގެ ޕާކިސްތާން މީހެއް ކަމުގައިވާ އަބްދުލް ރައްބާނީ އާއި އުމުރުން 41 އަހަރުގެ ޔަމަނުގެ އުސްމާން އަބްދުލް ރަހީމް އުސްމާން މިނިވަން ކުރަން ބައިޑެންގެ ސަރުކާރުން ނިންމި އެވެ.
މިހާރު ވެސް ގުއަންޓަނާމޯ ބޭ ޖަލުގައު 35 މީހުން އެބަ ތިއްބެވެ. އޭގެ ތެރޭގައި ސެޕްޓެމްބަރު 11 ގެ ހަމަލާތައް ރޭވުމުގައި އެންމެ އިސްކޮށް އުޅުނު ކަމަށް ތުހުމަތުވާ ކާލިފް މުހައްމަދު ވެސް ހިމެނެ އެވެ.
