ލިވަޕޫލް (އޮކްޓޫބަރު 28) - އިނގިރޭސި ޕްރިމިއާ ލީގުގައި މެންޗެސްޓާ ސިޓީ އަތުން 1-0 އިން ލިވަޕޫލް މޮޅުވި މެޗުގައި އެ ޓީމުގެ ކޯޗު ޔާގެން ކްލޮޕް އަށް ދެއްކި ރަތް ކާާޑާ އެކު އޭނާގެ މައްސަލަ ބަަލައި، 38000 ޑޮލަރުން ޖޫރިމަނާ ކޮށްފި އެވެ.
ސިޓީ އަތުން މި މަހު 16 ވަނަ ދުވަހުގެރޭ ލިވަޕޫލް މޮޅުވި މެޗުގެ ފަހު ވަގުތު ލިވަޕޫލްގެ މުހައްމަދު ސަލާހަށް ސިޓީގެ ބެނާޑޯ ސިލްވާ ފައުލުކުރި ނަމަވެސް ރެފްރީ އެ ފައުލެއްގެ ގޮތުގައި ނުދައްކާތީ ކްލޮޕް ވަރަށް ބޮޑަށް ހިތްހަމަނުޖެހުން ފާޅުކުރި އެވެ. އެކަމާ މެޗުގެ ރެފްރީ އެންތަނީ ޓޭލާއާ ބޭއަދަބީކޮށް މުހާތަބުކުރުމުން ކްލޮޕަށް ރަތް ކާޑު ދެއްކި އެވެ.
އިނގިރޭސި އެފްއޭގެ ޕެނަލުން އެ މައްސަލަ ބަލަން ފަށައި، ޖަވާބުދާރީވާން ދިން ފުރުސަތުގައި ކްލޮޕް ވަނީ އެޕީލްކުރަން ދެކޮޅު ހަދައި، އޭނާ އަށް ދެއްކި ރަތް ކާޑަކީ ވެސް ރަނގަޅު ނިންމުމެއް ކަމަށް ބުނެފަ އެވެ. މި މައްސަލަ ބެލުމަށް ފަހު އިނގިރޭސި އެފްއޭގެ ޕެނަލުން ނިންމީ ކްލޮޕަށް ސަސްޕެންޝަނެއް ދިނުމުގެ ބަދަލުގައި 38000 ޑޮލަރުން ޖޫރިމަނާ ކުރާށެވެ.
ޕެނަލްގެ ނިންމުން ލިޔުމުން އެފްއޭ އަށް ހުށަހެޅުމާ އެކު އިނގިރޭސި އެފްއޭ އިން އެ މައްސަލައިގައި އެޕީލްކުރުމާ މެދު ގޮތެއް ނިންމާނެ އެވެ. އެ ކަންކަމާ މެދު ގޮތެއް އެއްކޮށް ނިމެންދެން ލިވަޕޫލްގެ މެޗުތަކުގައި ކްލޮޕަށް ޓީމަށް އިރުޝާދު ދޭން ބެންޗަށް އައުމުގައި އެއްވެސް ހުރަހެއް ނެތެވެ.
މިދިޔަ އަހަރުގެ ފެބްރުއަރީ މަހު ވެސް އިނގިރޭސި އެފްއޭ އިން ވަނީ ކްލޮޕް 51000 ޑޮލަރުން ޖޫރިމަނާކޮށްފަ އެވެ. އެ ފަހަރު ކްލޮޕް ޖޫރިމަނާކުރީ ލިވަޕޫލާއި ވެސްޓް ހޭމް 1-1 އިން އެއްވަރުވި މެޗުގައި އެ މެޗުގެ ރެފްރީ ކެވިން ފްރެންޑްގެ ނިންމުންތައް ހުރީ އެއް ފަރާތަކަށް ޖެހިފައި ކަމަށް ބުނެ، ރެފްރީއާ މެދު ފާޑުކިޔާފައިވާތީ އެވެ.
