"އިންސާނިއްޔަތަށް އެހީވާން" ޓްވިޓާ ގަންނާނެ ކަމަށް ބިލިއަނަރު އެލޮން މަސްކް ބުނެފި އެވެ.
މަސްކް ކުރި ޓްވީޓެއްގައި ބުނީ ކުންފުނި ގަންނަނީ "ފައިސާ ގިނަކުރަން ނޫން" ކަމަށާއި އެކަން ކުރަނީ "އިންސާނިއްޔަތަށް އެހީވާން" ކަމަށެވެ.
ކުރިން އެއްބަސްވި ގޮތަށް 44 ބިލިއަން ޑޮލަރަށް ޓްވިޓާ ގަންނަން ޖެހެނީ ހުކުރު ދުވަހުގެ ކުރިންނެވެ. އެގޮތަށް އަމަލު ނުކޮށްފި ނަމަ ކޯޓުގައި ޝަރީއަތް ފަށާނެ އެވެ.
ޓްވިޓާގައި އިޝްތިހާރު ކުރާ ފަރާތްތަކާ މުހާތަބުކޮށް މަސްކް ކުރި ޓްވީޓުތަކުގައި ބުނީ އޭނާ ކުންފުނި "ނަގާފައިވާ" ކަމަށެވެ. އެކަމަކު އެކަން ރަސްމީކޮށް އިއުލާނުކޮށްފައެއް ނުވެ އެވެ.
ޓްވިޓާ ގަންނަން ނިންމި ސަބަބާ ބެހޭ ގޮތުން ޓްވީޓް ކުރުމުގެ ކުރިން، މަސްކް ވަނީ ސިންކެއް ހިފައިގެން ޓްވިޓާގެ މައި އޮފީހަށް އޭނާ ވަންނަ މަންޒަރު ފެންނަ ވީޑިއޯއެއް ވެސް ޓްވީޓުކޮށްފަ އެވެ.
ވިޔަފާރި ދުނިޔޭގައި "ކިޗެން ސިންކިންގެ" މާނައަކީ ކުންފުންޏަކަށް އިންގާލީ ބަދަލު ގެނައުމެވެ. އެ ވީޑިއޯއިން މަސްކް ދެނީ އެ މެސެޖުކަމެއް ސާފެއް ނޫނެވެ.
މަސްކްގެ ޓްވިޓާ ބަޔޯގައި މިހާރު ލިޔެފައި ވަނީ "ޗީފް ޓްވިޓް" އެވެ. އޭނާ ބުނީ ޓްވިޓާ ވާން ޖެހޭނީ ހުރިހާ އެންމެންނަށް މަރުހަބާ ކިޔާ ޕްލެޓްފޯމަކަށް ކަމަށެވެ.
"ޓްވިޓާއަކީ އެއްވެސް ނަތީޖާއެއް ކުރިމަތިނުވެ، އެ މީހަކު ހިތު ހުރި އެއްޗެއް، ހިތު ހުރި ގޮތަކަށް ހާމަކުރެވޭނެ ތަނަކަށް ވެގެން ނުވާނެ،" މަސްކް ބުންޏެވެ.
ޓްވިޓާ ގަންނަަން ނިންމައި އެންމެ ފުރަތަމަ ވާހަކަ ދެއްކި އިރު މަސްކް ބުނީ އޭނާ ބޭނުންވަނީ ސްޕޭމް އެކައުންޓްތައް ޑިލީޓުކޮށް، ހިޔާލު ފާޅުކުރުމުގެ މިނިވަންކަން ލިބިދޭ ޕްލެޓްފޯމަކަށް ހަދަން ކަމަށެވެ.
އެކަަމަކު އޭގެ ދުވަސްކޮޅެއް ފަހުން، އެ ހުށަަހެޅުން އަނބުރާ ގެންދިޔައީ ފޭކު އެކައުންޓުތަކުގެ އަދަދާ ބެހޭ ގޮތުން ޓްވިޓާއިން ސައްހަ މައުލޫމާތު ނުދޭ ކަމަށް ބުނެ އެވެ.
ޓްވިޓާ ހިންގުމުގައި އިސްކޮށް އުޅޭ މީހުން އެ ތުހުމަތު ދޮގުކުރި އެވެ. އެ މީހުން ބުނީ މަސްކް ހުށަހެޅުން އަނބުރާ ގެންދިޔައީ މާ އަގުބޮޑުވުމުން ކަމަށެވެ.
ކުރިން އެއްބަސްވި ގޮތަށް އަމަލު ކުރަން ޖެހޭނެ ކަމަށް ކަނޑައަޅައި ދިނުމަށް އެދި ޓްވިޓާއިން ކޯޓަށް މައްސަލަ ހުށަހެޅި އެވެ. ކޯޓުން ބުނީ އޮކްޓޯބަރު 28 ކުރިން ގޮތެއް ނިންމަން ޖެހޭނެ ކަމަށެވެ.
