މެންޗެސްޓާ (އޮކްޓޫބަރު 27) - މެންޗެސްޓާ ޔުނައިޓެޑުގެ ކެޕްޓަން ހެރީ މެގުއާ އަކީ ކުލަބަށް މުހިންމު ކުޅުންތެރިއެއް ކަމަށާއި، އޭނާ އަށް އިތުބާރުކުރާ ކަމަށް ކޯޗު އެރިކް ޓެން ހާގް ބުނެފި އެވެ.
ކޯޗު ޓެން ހާގް މެގުއާގެ ދިފާއުގައި ވާހަކަދައްކާފައި މިވަނީ ގިނަ ބައެއްގެ ފާޑުކިޔުން މެގުއާ އަށް އަމާޒުވެފައިވާ ދަނޑިވަޅެއްގަ އެވެ. އަނެއްކޮޅުން، މެގުއާ އަނިޔާގައި ހުރި ދުވަސްވަރު ކުލަބުގެ ނަތީޖާތައް ރަނގަޅުވެ، ޑިފެންސް ލައިނުގެ ކުޅުންވެސް ރަނގަޅުކަން ފާހަގަކޮށް ސަޕޯޓަރުން ވަނީ މެގުއާ އަށް ފުރުސަތު ނުދޭން އެދި ހިޔާލު ފާޅުކޮށްފަ އެވެ.
މިދިޔަ ސެޕްޓެމްބަރު މަހު ގައުމީ ޓީމަށް ކުޅެނިކޮށް އަނިޔާވި މެގުއާ މިހާރު ހުރީ އަނިޔާއިން އެއްކޮށް ރަނގަޅުވެ ކުޅުމުގެ ތެރެއަށް އެނބުރި އަންނަން ފިޓުކޮށެެވެ.
މި ދަނޑިވަޅުގައި ޑިފެންޑަރު ރަފައެލް ވަރާން އަށް އަނިޔާވެ، ކުޅުމާއި ދުރުގައި ހުންނަން ޖެހުމުން މެގުއާ އަށް އަނެއްކާ ވެސް ޓީމުގެ ފުރަތަމަ އެގާރައިން ފުރުސަތު ލިބުން ގާތެވެ.
ޓެން ހާގު ބުނީ މެގުއާ އަކީ ކެޕްޓަނަށް ވިޔަސް ފުރަތަމަ އެގާރައިން ފުރުސަތު ހޯދަން އެހެން ކުޅުންތެރިންނެކޭ އެއްގޮތަށް މަސައްކަތް ކުރަން ޖެހޭނެ ކަމަށެވެ.
މެގުއާ އަށް މި ދަނޑިވަޅުގައި ކުލަބުގައި މެޗުތަކެއް ލިބުންވެސް މުހިންމެވެ. ސަބަބަކީ ވޯލްޑް ކަޕަށް މަހަކަށްވުރެ މަދު ދުވަސްކޮޅެއް އޮތްއިރު، ކޯޗު ގަރެތު ސައުތް ގޭޓް ފައިނަލް ސްކޮޑު އިއުލާންކުރުމުގެ ކުރިން މެގުއާގެ ފިޓްނަސް ރަނގަޅު ކަން ދެއްކުމަށް ކުލަބު މެޗުތަކުން ފުރުސަތު ލިބޭނެތީ އެވެ.
"އަހަންނަށް އިނގޭ މެގުއާ އަށް މި ދަނޑިވަޅުގައި މެޗުތަކެއް ބޭނުންވާކަން. ކުރިއަށް އޮތީ ވޯލްޑް ކަޕް. އެހެންވީމަ މެގުއާ ބޭނުންވާނެ ގައުމީ ޓީމުން ޖާގަ ހޯދަން މެޗުތަކެއް ކުޅެން. އަހަރެން ވަކި ހާއްސަކަމެއް އޭނާ އަށް ނުދޭނަން. ކޮންމެ މެޗަކަށްވެސް އަހަރެން ފުރުސަތު ދޭނީ އެންމެ އެކަށީގެންވާ ކުޅުންތެރިއާ އަށް." މި ސީޒަންގެ ކުރިން ޔުނައިޓެޑާ ހަވާލުވި ޓެން ހާގް ބުންޏެވެ.
މެގުއާ އަށް އަމާޒުވަމުންދާ ފާޑުކިޔުންތަކަށް ރައްދުދެމުން ޓެން ހާގް ބުނީ މެގުއާ އަކީ ކުލަބަށް މުހިންމު ކުޅުންތެރިއެއް ކަމަށާއި، އަބަދުވެސް އޭނާގެ އިތުބާރު މެގުއާ އަށް އޮންނާނެ ކަމަށެވެ.
ޓެން ހާގު ބުނީ ވަރާން އަށް އަނިޔާވި ދަނޑިވަޅުގައި މެގުއާ ފިޓުވުމަކީ ލިބުނު ހިތްހަމަޖެހުމެއް ކަމަށެވެ.
"މެގުއާގެ ފެންވަރާ މެދު އަހަރެން ޝައްކެއް ނުކުރަން. އޭނާ އަކީ ޓީމަށް އަބަދުވެސް މުހިންމު ކުޅުންތެރިއެއް. ޔުނައިޓެޑްގެ އަމާޒަށް ވާސިލްވުމަށް މެގުއާގެ ދައުރު ވަރަށް މުހިންމު ވާނެކަމަށް އަހަރެން ގަބޫލުކުރަން" ޓެން ހާގު ބުންޏެވެ.
މެންޗެސްޓާ ޔުނައިޓެޑަށް ކުރިއަށް އޮތީ ޔުއެފާ ޔޫރޮޕާ ލީގުގައި މިރޭ މޮލްޑޯވާގެ ޗެމްޕިއަން ޝެރިފް ޓިރަސްޕޯލްއާ ދެކޮޅަށް ނުކުންނަ މެޗުގައި މެގުއާ ފުރަތަމަ އެގާރައިގައި ކުޅުމުގެ ފުރުސަތު ބޮޑެވެ. މި ވަގުތު ޔުނައިޓެޑު އޮތީ ޔުރޮޕާ ލީގުގެ ގްރޫޕް އީގެ ދެވަނައިގަ އެވެ. ޔުނައިޓެޑަށް ވުރެ ތިން ޕޮއިންޓް އިތުރަށް ހޯދައިގެން އެއްވަނައިގައި އޮތީ ރެއާލް ސޮސިއެޑާޑާ އެވެ.
