ސައުދީ އަރަބިއްޔާ އާއި އެމެރިކާގެ ގުޅުން މުރާޖައާ ކުރުން ރަނގަޅު ކަމަށް ސައުދީއިން އެމެރިކާއަށް ކަނޑައަޅާފައި ހުންނަ ސަފީރު އަމީރާ ރީމާ ބިންތި ބަންދާރް ވިދާޅުވެއްޖެ އެވެ.
ތެޔޮ އުފެއްދުން މަދު ކުރަން އޯޕެކް ޕްލަސް ގައުމުތަކުން ނިންމުމުން، އެމެރިކާއިން ބުނީ ސައުދީއާ އެކު އޮތް ގުޅުން މުރާޖައާ ކުރަން ބޭނުންވާ ކަމަށެވެ.
"މިއީ މީގެ ފަސް އަހަރު ކުރިން ނޫނީ މީގެ 10 އަހަރު ކުރިން އޮތް ރަސްކަމެއް ނޫން. އެހެންވީމާ ކުރިން އެނެލައިޒްކޮށްފައި ހޯދި އެއްވެސް މަައުލޫމާތެއްގެ އަގެއް މިހާރު ނުހުންނާނެ،" ރީމާ ވިދާޅުވި އެވެ.
"އަޅުގަނޑުމެންގެ އާބާދީ ވަރަށް ޒުވާން. އަަޅުގަނޑުމެންގެ ލީޑަރުން ވެސް ވަރަށް ޒުވާން. މީގެ ކުރިން ދުނިޔެއާ އެކު މުއާމަލާތް ނުކުރާ ފަދަ ގޮތަކަށް ކަންކަން ކުރިއަށް ގެންދަން އަޅުގަނޑުމެންގެ ވިސްނުން އެބަ ހުރި."
އެމެރިކާގެ ރައީސް ކަމަށް ޖޯ ބައިޑެން ވަޑައިގެންނެވުމާ އެކު ދެ ގައުމުގެ ގުޅުމަށް އަސަރު ކުރަން ފެށި އެވެ. އެންމެ ބޮޑު ކަމަކަށް ފާހަގަވީ އެމެރިކާއިން ސައުދީއަށް ހަތިޔާރު ވިއްކުން މެދުކަނޑާލުމެވެ.
އޭގެ އިތުރުން ޓެރަރިސްޓުންގެ ބްލެކްލިސްޓުންގެ ޔަމަނުގެ ހޫތީން އުނިކުރުމާއި، ނޫސްވެރިޔާ ޖަމާލް ހަޝޮގްޖީގެ މަރާ ގުޅޭ ޖާސޫސީ ރިޕޯޓް އާއްމު ކުރުމާއި، އިރާނުގެ ނިޔުކްލިއާ އެއްބަސްވުން އިއާދަކުރަން މަސައްކަތް ކުރުމުން ވެސް ސައުދީއިން ހިތްހަމަނުޖެހުނެވެ.
ގިނަ ދުވަސްތަކެއް ވަންދެން ވަލީ އަހުދު އަމީރު މުހައްމަދު ބިން ސަލްމާންއާ މުއާމަލާތް ކުރެއްވުމަށް ވެސް ބައިޑެން ދެކޮޅު ހެއްދެވި އެވެ. އެކަމަކު އެންމެ ފަހުން މި އަހަރު ސައުދީއަށް ކުރެއްވި ދަތުރުގައި ދެ ބޭފުޅުން ބައްދަލުކުރެއްވި އެވެ.
އޭގެ ފަހުން ދެ ގައުމުގެ ގުޅުން ރަނގަޅު މިސްރާބަކަށް ދަނިކޮށް، އަނެއްކާވެސް އެމެރިކާއިން ހިތްހަމަނުޖެހުނީ ތެލުގެ މައްސަލައިގަ އެވެ. އެމެރިކާއިން ބުނީ އޯޕެކް ޕްލަސްއިން ނިންމީ ސިޔާސީ ނިންމުމެއް ކަމަށެވެ.
"މިއީ އެއްވެސް ސިޔާސީ ކަމެއް ހުރި ނިންމުމެއް ނޫން. އެ ނިންމުން ބިނާވަނީ އިގްތިސާދީ ހާލަތުގެ މައްޗަށް. އެއީ ކުރިއަށް އޮތް 40، 50 އަހަރަށް ބަލާފައި ނިންމި ނިންމުމެއް،" ރީމާ ވިދާޅުވި އެވެ.
