ޅ. ނައިފަރުގައި މި ސަރުކާރުން އެޅި 100 ފްލެޓްގައި މަރާމާތުގެ ބޮޑެތި މައްސަލަތަކެއް ހުރެ އެކަން ހައްލު ނުކުރެވި ގިނަ ދުވަސްތަކެއް ވެފައިވާ ކަމަށް ބައެއް ފަރާތްތަކުން މައުލޫމާތު ފަތުރަމުންދަނީ ހަގީގަތް އޮޅޭ ގޮތަށް ކަމަށް ބުނެ އެ ވާހަކަތައް ހައުސިން މިނިސްޓްރީން ދޮގުކޮށްފި އެވެ.
ވިއްސާރައިގެ ސަބަބުން އެ ފްލެޓުތަކަށް ގިނަ ގެއްލުންތަކެއް ލިބި މަރާމާތު ނުކުރާ ކަމަށް ބުނެ އާންމުންގެ ބައެއް މީހުން ސޯޝަލްމީޑިއާގައި ނުރުހުން ފާޅުކޮށްފައިވާ މި ދަނޑިވަޅުގައި ހައުސިން މިނިސްޓްރީއިން މިއަދު ނެރުނު ނޫސް ބަޔާނެއްގައި ބުނެފައިވަނީ އެ ފްލެޓުތައް ހުރި ހަތަރު އިމާރާތް މެނޭޖުކުރުމަށް އެ މިނިސްޓްރީއިން ހަވާލުކޮށްފައިވަނީ ނައިފަރު ކައުންސިލާ ކަމަށެވެ. އަދި، މީގެ ކުރިން ކައުންސިލުން މަރާމާތުކުރުމަށް އެދުމުން އެކަން ކޮށްފައިވާނެ ކަމަށްވެސް ބުނެފައިވެ އެވެ.
އެގޮތުން، ފްލެޓުތަކުގައި މައްސަލަތަކެއް ހުރި ކަމަށް މި އަހަރުގެ މެއި 19 ގައި ނައިފަރު ކައުންސިލުން އެ މިނިސްޓްރީއަށް އެންގުމުން އެ ފްލެޓުތައް އެޅި ކޮންޓްރެކްޓަރާއި މަޝްވަރާކުރުމަށްފަހު އެފަރާތުގެ ޓީމެއް ޖޫން މަހުގެ 10 ވަނަ ދުވަހު ނައިފަރަށް ގޮސްފައިވާ ކަމަށް ހައުސިން މިނިސްޓްރީއިން ވަނީ ބުނެފަ އެވެ.
އަދި، މި މަސައްކަތް ކުރުމަށް ނައިފަރު ކައުންސިލާއި މަޝްވަރާ ކުރުމަށްފަހު ޖޫން މަހުގެ 12 ވަނަ ދުވަހު ތާވަލެއްގެ ދަށުން މަސައްކަތް ފަށާ އެ މަސައްކަތް ނިންމުމަށްފަހު ކައުންސިލްގެ އެޕްރޫވަލް ހޯދައިފާވާ ކަމަށް ބަޔާނުގައި ބުނެފައިވެ އެވެ.
މި މަރާމާތަށްފަހު ނައިފަރު ކައުންސިލުން އިތުރު ބޮޑު މަރާމާތެއް ކުރަން ޖެހިފައިވާކަން މިނިސްޓްރީއަށް އަންގާފައިނުވާ ކަމަށްވެސް ހައުސިން މިނިސްޓްރީއިން ވަނީ ބުނެފަ އެވެ. އަދި، އެފަދަ މައްސަލައެއް ހުށަހެޅިއްޖެ ނަމަ އެކަމެއް ބަލާނެ ކަމުގެ ޔަގީންކަން ވަނީ މިނިސްޓްރީއިން ދީފަ އެވެ.\
ނައިފަރު ފްލެޓްތަކަށް ކުލީގެ ގޮތުގައި ކޮންމެ މަހަކު 5،000 ރ. އަދި މެއިންޓެނެންސް ފީއެއްގެ ގޮތުގައި ކޮންމެ މަހަކު 500ރ. ދައްކަ އެވެ. ފްލެޓްތަކުގައި ދިރިއުޅޭ މީހުން ގަބޫލުކުރާ ގޮތުގައި މެއިންޓެނެންސް ފީއަށް ސަރުކާރަށް ދެވޭ ފައިސާއިން ފްލެޓްތަކަށް ބޭނުންވާ މާރާމާތުތައް ކުރެވެން ވާނެ އެވެ.
