އިޒްރޭލުން ވެރިވެގަނެގެން އުޅޭ ހުޅަނގު އައްސޭރީގައި އިޒްރޭލް ސިފައިން ހިނގި އޮޕަަރޭޝަނެއްގައި ފަލަަސްތީނުގެ ހަ މީހުން މަރާލައިފި އެވެ.
އިޒްރޭލުން ބުނީ އޮޕަރޭޝަން ހިންގީ "ޓެރަރިސްޓުންނާ ދެކޮޅަށް" ކަމަށެވެ. އެގޮތުން ޓާގެޓު ކުރީ ދާދި ފަހުން އުފެދުނު "ލަޔަންސް ޑެން" ގްރޫޕަށް ކަމަށް ބުންޏެވެ.
ހުޅަނގު އައްސޭރީގެ ނަބްލޫސްގައި ސިޓީގައި ހިންގި އޮޕަރޭޝަނުގައި މަރުވި ފަސް މީހުންނަކީ އެ ގްރޫޕްގެ މެމްބަރުން ކަމަށް އިޒްރޭލުން ބުނެ އެވެ. މަރުވި ހަ ވަނަ މީހާގެ ގަޔަށް ބަޑި ޖެހީ އިޒްރޭލް ސިފައިންގެ ގަޔަށް ގާ އުކުމުން ކަމަށް ވެސް ބުންޏެވެ.
އިޒްރޭލުން ތުހުމަތު ކުރާ ގޮތުގައި އޮކްޓޯބަރު މަހުގެ ކުރީކޮޅު އިޒްރޭލް ސިފައިންގެ މީހަަކު މަރާލި ހަމަލާ ދިނީ "ލަޔަންސް ޑެން" ގްރޫޕުންނެވެ.
އުމުރުން 21 އަހަރުގެ ސްޓާފް ސާޖަންޓް އިޑޯ ބަަރުޗް މަރާލި ހަމަލާއަށް ފަހު ފާއިތުވި ދެ ހަފުތާގައި ނަބްލޫސް ސިޓީ އޮތީ ލޮކްޑައުންކޮށްފަ އެވެ.
އަންގާރަ ދުވަހު އެކަނިވެސް ފަލަސްތީނުގެ ހަ މީހުން މަރާލާފައިވާ އިރު، މި އަހަރުގެ ތެރޭގައި މަރާލި މީހުންގެ އަދަދު 100 އިން މައްޗަށް އަރާފައިވާ ކަމަށް ބީބީސީއިން ބުނެ އެވެ.
ތަފާސްހިސާބުން ހާމަވާ ގޮތުގައި މި އަހަރަކީ 2015 ވަނަ އަހަރަށް ފަހު ހުޅަނގު އައްސޭރީގައި ދިރިއުޅޭ ފަލަސްތީން މީހުންނަށް އެންމެ ބޮޑަށް ނުރައްކާވަމުންދާ އަހަރު ކަމެވެ.
މެޖޯރިޓީ މީހުން މަރާލީ އިޒްރޭލް ސެކިއުރިޓީ ފައުޖުންނެވެ. އިޒްރޭލުގެ އާއްމުން ހަތިޔާރު ބޭނުންކޮށް ދިން ހަމަލާތަކުގައި ވެސް ފަލަސްތީން މީހުން މަރުވެފައިވެ އެވެ.
އިންސާނީ ހައްގުތަކަށް ވަކާލާތު ކުރާ ގްރޫޕްތަކުން ކަންބޮޑުވުން ފާޅުކުރާ އިރު، މަރުވި މީހުންގެ ފަސްބައިކޮށްފައި އެއް ބަޔަކީ ކުޑަކުދިންނެވެ. މަރުވި އެންމެ ހަގު ކުއްޖާގެ އުމުރަކީ 14 އަހަރެވެ.
އެހެން ނަމަވެސް އިޒްރޭލް ސިފައިން ބިރު ދައްކައި ފަހައި ދުވަން ފެށުމުން، ހަތް އަހަރުގެ ކުއްޖަކު ކުއްލި ގޮތަކަށް ހިތް ހުއްޓިގެން ވެސް މަރުވި އެވެ.
