ޑޯޓްމަންޑް (އޮކްޓޫބަރު 25) - ޗެމްޕިއަންސް ލީގުގައި މިރޭ ބޮރޫޝިއާ ޑޯޓްމަންޑާ ދެކޮޅަށް މެންޗެސްޓާ ސިޓީ ނުކުންނައިރު، ޑޯޓްމަންޑަށް ކުޅެމުންދާ އިންގްލެންޑްގެ ޒުވާން މިޑްފީލްޑަރު ޖޫޑް ބެލިންހަމް އަށް ސިޓީގެ ކޯޗު ޕެޕް ގާޑިއޯލާގެ ތައުރީފު އޮއްސާލައިފި އެވެ.
ޗެމްޕިއަންސް ލީގުގައި މިރޭ ޑޯޓްމަންޑާ ދެކޮޅަށް ރަށުން ބޭރުގައި ސިޓީ ނުކުންނައިރު، އެ ޓީމު ވަނީ ދެ ވަނަ ބުރުގެ ޖާގައެއް ކަށަވަރުކޮށްފަ އެވެ.
ސިޓީއާ ދެކޮޅަށް ޑޯޓްމަންޑް ނުކުންނައިރު، އެ ޓީމުގައި އެންމެ ފޯމުގައި ހުރި ކުޅުންތެރިންގެ ބެލިންހަމް ،19، އެވެ. ސިޓީއާ ދެކޮޅަށް މިހާތަނަށް ކުޅުނު ދެ މެޗުގައި ވެސް ބެލިންގްހަމް ވަނީ ލަނޑު ޖަހައިފަ އެވެ.
މެޗުގެ ކުރިން މީޑިއާއާ ވާހަކަދައްކަމުން ގާޑިއޯލާ ބުނީ ބެލިންހަމް އަކީ "ހުރިހާ ގޮތަކުން ވެސް މޮޅު ކުޅުންތެރިއެއް" ކަމަށެވެ.
"ބެލިންހަމްގެ ކޮލިޓީ އެންމެނަށް ވެސް އެބަފެނޭ،" ގާޑިއޯލާ ބުންޏެވެ.
"ޑޯޓްމަންޑާ ބެލިންހަމް ގުޅުނީ އުމުރުން އެންމެ 17 އަހަރުގައި. އޭނާގެ މޮޅު ކުޅުމެއް ނޫން ހަމައެކަނި ފާހަގަަވަނީ. އޭނާގެ ފަރާތުން ރަނގަޅު ލީޑަޝިޕެއް ވެސް އެބަފެނޭ. މިހާރު އޭނާގެ އުމުރުން 19 އަހަރު އެކަމަކު މިހާރު އޭނާ އަކީ ޓީމުގެ ކެޕްޓަނުންގެ ތެރޭގައި ހިމެނޭ ކުޅުންތެރިއެއް."
އިންގްލެންޑްގެ ގައުމީ ޓީމުން ވެސް ޖާގަ ހޯދާފައިވާ ބެލިންހަމް ޑޯޓްމަންޑާ ގުޅުނީ 2020 ވަނަ އަހަރެވެ. ޑޯޓްމަންޑަށް މިހާތަނަށް ކުޅުނު 107 މެޗުގައި އޭނާ ވަނީ 18 ލަނޑު ޖަހައި، 20 ލަނޑު ޖަހަން ފުރުސަތު ތަނަވަސްކޮށްދީފަ އެވެ.
ގާޑިއޯލާ ބުނީ ޒުވާން ކުޅުންތެރިން ކުރިއެރުވުމަށް، އެންމެ ރަނގަޅު އެއް ކްލަބަކީ ޑޯޓްމަންޑް ކަމަށާއި ބެލިންހަމް ވެސް ކުރިއަށް އަރައިގެން ދިއުމުގައި އެ ކްލަބުގެ ދައުރު ބޮޑު ކަމަށެވެ.
"ބެލިންގްހަމް އިންގްލެންޑްގައި މަޑުކުރިނަމަ ސިޓީ، (މެންޗެސްޓާ) ޔުނައިޓަޑް، ލިވަޕޫލް، ޗެލްސީ، އާސެނަލް ނުވަތަ ޓޮޓެންހަމް ކަހަލަ ކްލަބަކުން އޭނާ އަށް ފުރުސަތު ލިބުނީސް. އެކަމަކު، ފަހަރެއްގައި ޑޯޓްމަންޑްގައި އޭނާ އަށް ލިބުނު ފުރުސަތުތައް، އެ ކްލަބުތަކުގައި އޭނާ އަށް ނުލިބުމުގެ ފުރުސަތު ބޮޑު. ޒުވާން ކުޅުންތެރިޔަކަށް އެންމެ މުުހިންމު ކަމަކީ ކުޅެން ފުރުސަތު ލިބުން،" ގާޑިއޯލާ ބުންޏެވެ.
އަންނަ ސީޒަނުގައި ބެލިންހަމް ހޯދުމުގެ ރޭހުގައި ޔޫރަޕްގެ ނަން މަޝްހޫރު ގިނަ ކްލަބްތަކުން ވާދަކުރާނެ ކަމަށް ބެލެވެ އެވެ.
