މުދުލާއި ހިދުމަތުން ނަގާ ޓެކްސް ބޮޑުކުރުމަށް އެ ގާނޫނަށް ސަރުކާރުން ހުށަހަޅާފައިވާ އިސްލާހުގެ ބިލު އޮތް ގޮތަށް ފާސްކުރުމަށް މަޖިލިސް ކޮންޓްރޯލްކުރާ އެމްޑީޕީން ނެރެފައިވާ ތްރީލައިން ވިޕާ ދެކޮޅަށް އެ ޕާޓީގެ މެމްބަރުންގެ މެދުގައި ހިޔާލުތަފާތުވެ، މިއަދުގެ މުޅި މަޖިލީހުގެ ކޮމިޓީ ހޫނުވެއްޖެ އެވެ.
ޓެކްސް ބޮޑުކުރުމަށް ސަރުކާރުން ނިންމާފައިވާއިރު، ރައްޔިތުންގެ މަޖިލީހުގައި ތިއްބަވާ އެމްޑީޕީގެ ބައެއް މެންބަރުން ވަނީ ޓެކްސް ބޮޑުކުރުމަށް ތާއީދުނުކުރައްވާ ކަން ވެސް ހާމަކުރައްވައިފަ އެވެ.
މިއަދުގެ މުޅި މަޖިލީހުގެ ކޮމިޓީގައި ވެސް އެމްޑީޕީގެ ބައެއް މެމްބަރުން ވަނީ ކަމާގުޅޭ ފަރާތްތަކާއެކު މަޝްވަރާކޮށް، ޓެކްސް ބޮޑުކޮށްގެން ނުކުމެދާނެ ނަތީޖާތަކާއި އަމިއްލަ ފަރުދުންނާއި ވިޔަފާރިތަކަށް ކުރާނޭ އަސަރު ރަނގަޅަށް ވަޒަންކުރަންޖެހޭ ކަމަށް ވިދާޅުވެފަ އެވެ.
އެ ވާހަކަތަކާ ވިދިގެން މެދު ހެންވޭރު ދާއިރާގެ މެމްބަރު އަލީ އާޒިމް ވަނީ ރައްޔިތުންގެ އަތުން ނަގާ ޓެކްސް ބޮޑުކުރަން ސަރުކާރުން ހުށަހެޅުމުން ކަމާބެހޭ ފަރާތްތަކާއެކު މަޖިލީހުން މަޝްވަރާކޮށްލަން ވެސް ޖާގައެއް ނެތް ކަމަށް ތުހުމަތު ކުރައްވައިފަ އެވެ.
އޭނާ ތުހުމަތު ކުރެއްވި ގޮތުގައި، ކުރީ ދުވަހުގެ ކޮމިޓީ ހިނގަމުން ދަނިކޮށް، ކޯރަމް ގެއްލުވާލައި، އެމްޑީޕީ ޕާލިމަންޓަރީ ގުރޫޕުގެ ބައްދަލުވުމެއް ބާއްވައި، ތްރީލައިން ވިޕެއް ނެރެފައިވާ ކަމަށެވެ.
"...ތްރީލައިން ވިޕެއް މި ނެރުނީ މި [ބިލު] އޮތް ގޮތަށް ފާސްކުރަން. ކީއްކުރަންތޯ ދެން މިތަނަށް މީހުން ގެނެސްގެން މަޝްވަރާ ކުރަންވީ؟ މަޝްވަރާކުރުމުގެ ބޭނުމެއް އޮތް ކަމަކަށް ނުފެނޭ އަޅުގަނޑުކަށް. މަޝްވަރާކުރެވޭނީ މަޝްވަރާ ކުރެވޭނެ ޖާގަ އޮވެގެން،" އާޒިމް ވިދާޅުވި އެވެ.
އެއާއެކު ރައީސް އިބްރާހިމް މުހައްމަދު ސޯލިހުގެ ފެކްޝަންގެ ބައެއް މެމްބަރުން ވަނީ އަޑުގަދަކުރަން ފަށައިފަ އެވެ.
ކޮމިޓީ ހޫނުވާން ފެށުމުން، ރިޔާސަތުގައި އިންނެވި މަޖިލީހުގެ ރައީސް މުހައްމަދު ނަޝީދު ވިދާޅުވީ، މެމްބަރުންގެ އެދުމުގެ މަތީން ކަމާގުޅޭ އިދާރާތަކުގެ ބޭފުޅުން ކޮމިޓީއަށް މައުލޫމާތު ދިނުމަށް ވަޑައިގެންނެވުމަށް އެދި ސިޓީ ފޮނުވިފައިވާ ކަމަށެވެ.
"މެމްބަރުން އެއްވެސް ގޮތަކަށް ކަންބޮޑުވެވަޑައިނުގަންނަވާ. ކަމާގުޅޭ މާހިރުން މިކަން މިވާ ގޮތެއް އޮޅުންނުފިލުވައި މި ބިލު މިތަނުން ފާސްވެގެން ނުދާނެ،" ނަޝީދު ވިދާޅުވި އެވެ.
ސަރުކާރުގެ ފަރާތުން އިހަވަންދޫ ދާއިރާގެ މެންބަރު މުހައްމަދު ޝިފާއު ހުށަހެޅުއްވި ބިލުގައި ވަނީ މުދަލާއި ހިދުމަތުން ނަގާ ޓެކްސް (ޖީއެސްޓީ) އަށް ޕަސެންޓަށް އަދި ޓޫރިޒަމް ދާއިރާއިން ނަގާ ޓެކްސް ޓީޖީއެސްޓީ 12 ޕަސެންޓަށް ބޮޑުކުރުމަށެވެ.
މިހާރު ޖީއެސްޓީން ނަގަނީ ހަ ޕަސެންޓް އެވެ. އަދި ޓީޖީއެސްޓީއަށް ނަގަނީ 12 ޕަސެންޓެވެ.
ޓެކްސް ބޮޑުކުރަން ސަރުކާރުން ނިންމީ ދުނިޔޭގެ އިގުތިސޯދަށް މިހާރު ކުރިމަތިވެފައިވާ ހީނަރުކަމުގެ އަސަރު ރާއްޖޭގެ އިގުތިސޯދަށް ވަރަށް ބޮޑަށް ކުރަމުންދަތީ، އާމްދަނީ އިތުރުކުރަން ކަމަށް ބުނެ އެވެ.
