ޗާގޮސް އައިލެންޑްސްއަކީ ރާއްޖޭގެ ތަނެއް ނޫން ކަމަށް ބުނެވޭނެ ޖާގައެއް ނެތް ކަމަށާއި އެ ތަނަކީ މިވަގުތު ވަކި ގައުމެއްގެ ތަނެއް ނޫން ކަމަށް ރައްޔިތުން މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ނަޝީދު މިމޭރުމުން ވާހަކަ ދައްކަވާފައި މިވަނީ ޗާގޮސްގެ މައްޗައް މޮރިޝަސްގެ ސިޔާދަތީ ބާރު ފޯރުވުމަށް އެ ގައުމުން ކުރަމުންދާ މަސައްކަތުގައި ރާއްޖެއިން އެ ގައުމާ އެކު އޮތް ކަމަށް ސަރުކާރުން ބުނެފައިވާ ދަނޑިވަޅެެއްގަ އެވެ. ނަމަވެސް މިވަގުތު އިނގިރޭސިން ބަލަހައްޓަމުން ގެންދާ ޗާގޮސް އައިލެންޑްސް މޮރިޝަސް އަށް ދިނުމަށް މީގެ ކުރިން އދ ގައި ނެގި ވޯޓުގައި ރާއްޖެއިން ވޯޓު ދީފައިވަނީ އެ ގައުމާ ދެކޮޅަށެވެ.
ސަރުކާރުގެ ނިންމުން މިގޮތަށް ބަދަލުވުމާ އެކު އެއީ ރާއްޖޭގެ ކަނޑުގެ ސަރަހައްދުން ބައެއް ދޫކޮށްލުމަށް ދިވެހި ސަރުކާރުން އެ އެއްބަސްވީ ކަމަށްވެސް ނަޝީދު ވަނީ އިއްޔެ ތުހުމަތުކުރައްވާފަ އެވެ.
މި މައްސަލައިގައި މިއަދު ކުރެއްވި ޓުވީޓެއްގައި ނަޝީދު އިތުރަށް ވިދާޅުވެފައިވަނީ އިހުޒަމާނުގައި ފޯޅަވައްސަކީ މީހުން ދިރިއުޅުނު ތިޔާގި ރަށެއް ކަމަށާއި 1500 ގެ އަހަރުތަކަށްފަހު ކުރެހި ދިވެހިރާއްޖޭގެ ޗާޓުތަކުގައި އައްޑޫގެ ދެކުނުން އޮތް އަތޮޅަކީ ފޯޅަވަހި ކަމަށެވެ.
"1560 ވަނަ އަހަރު 9 ވަނަ ހަސަން ރަސްގެފާނުގެ ސިޓީއެއްގައި އެ ރަދުން ބަޔާންކުރައްވަނީ ފޯޅަވަހީގެ 7 ރަށް އެއީ ރާއްޖޭގެ ރަށްރަށް ގޮތުގައި," ފޯޅަވައްސަކީ ރާއްޖޭގެ ބައެއް ކަމަށް ވަކާލާތުކުރައްވާ ނަޝީދު ވިދާޅުވި އެވެ.
މީގެ އިތުރުން ދިވެހި ނެވިން ރާއްޖޭގެ ސަރަހައްދު ބަޔާން ކުރަނީ ފޯޅަވައްސާ އެކު ކަމަށާއި ފޯޅަވައްސަކީ ރާއްޖޭގެ ރަށެއް ކަމަށް ބުނުމަށް އެތަކެއް ތާރީހީ އަދި ސަގާފީ ގުޅުމުގެ ހެކި އެބެހުރި ކަމަށް ވެސް އެމަނިކުފާނު ވިދާޅުވި އެވެ.
މައްސަލައިގެ ފަސްފަހަތް
މޮރިޝަސް އިން ޗާގޮސް ގެ މައްޗަށް ސިޔާދަތީ ބާރު ހޯދުމަށް އިންޓަނޭޝަނަލް ކޯޓް އޮފް ޖަސްޓިސްގައި ކުރި ދައުވާ އެގައުމާއި އެއްކޮޅަށް ނިމި 2019 ވަނަ އަހަރު އެ ކޯޓުން ވަނީ ޗާގޮސް ވީ އެންމެ އަވަހަކަށް މޮރިޝަސް އާއި ހަވާލުކުރުމަށް އިނގިރޭސިވިލާތަށް އަންގާފަ އެވެ. ނަމަވެސް މިހާތަނަށް އެ ނިންމުމަށް އިނގިރޭސިވިލާތުން އިޖާބަދީފައެއް ނުވެ އެވެ.
2019 ވަނަ އަހަރުގެ މެއި 22 ގައި ގައި އދ އިން އެ ނިންމުމަށް ތާއީދުކޮށް ހަ މަސް ދުވަހުގެ ތެރޭގައި ޗާގޮސް މޮރިޝަސް އާއި ހަވާލުކުރުމަށް 116 ގައުމުގެ ވޯޓާއި އެކު ފާސްކުރި ގަރާރުގައި ރާއްޖެއިން ވޯޓުލީ ދެކޮޅަށެވެ.
މި މައްސަލައިގައި ރާއްޖޭގެ ސްޓޭންޑް ބަދަލުވިކަން އިނގުނީ މިހާރު ކަނޑުގެ ސަރަހައްދުގެ މައްސަލައިގައި ރާއްޖެއިން މޮރިޝަސްއާ ދެކޮޅަށް ވަކާލާތުކުރައްވަމުން އެޓާނީ ޖެނެރަލް ވަނީ ރާއްޖެއިން މިހާރު ކުރިން ބުނި ގަރާރާއި އެއްކޮޅަށް ވޯޓުދޭން ނިންމާފައިވާ ކަމަށް ވިދާޅުވުމުންނެވެ.
ނަމަވެސް އެ މައްސަލައިގެ ސްޓޭންޑަށް އައި ބަދަލުގެ ސަބަބުން ކަނޑުގެ ސަރަހައްދުގެ މައްސަލައިގައި ޖަވާބުދާރީވަމުން އައިސްފައިވާ އެއްވެސް ކަމަކަށް ނުވަތަ ސްޓޭންޑަށް އެއްވެސް ބަދަލެއް ނުގެންނާނެ ކަމަށް ސަރުކާރުން ވަނީ ތަކުރާރުކޮށް ވިދާޅުވެފަ އެވެ.
އަދި ޗާގޯސްގެ ސިޔާދަތީ ބާރު މޮރިޝަސް އަށް ލިބުމަށް ރާއްޖެއިން ތާއިދުކޮށް އެ ގައުމާއި އެއްކޮޅަށް ވޯޓުލާން ނިންމީ، ރާއްޖެއަކީ އިސްތިއުމާރުކުރުމާ ދެކޮޅު ގައުމަކަށްވެފައި ގައުމުތަކުގެ ސިޔާދަތީ ބާރު އޮތުމަށް ތާއިދުކުރާ ގައުމަކަށް ވާތީ ކަމަށްވެސް ސަރުކާރުން ވަނީ ބުނެފަ އެވެ.
