މިއުނިކް (އޮކްޓޫބަރު 22) - ޖަރުމަނު ލީގުގައި މިރޭ އެންމެ ފަހުގެ ޗެމްޕިއަން ބަޔާން މިއުނިކުން ހޮފެންހައިމް ދަނޑުގައި 2-0 އިން މޮޅުވިއިރު، އަމިއްލަ ދަނޑުގައި ކުޅުނު ޑޯޓްމަންޑުން ސްޓުޓްގާޓްގެ މައްޗަށް 5-0 އިން ކުރިހޯދައިފި އެެވެ.
އޮގަސްޓް މަހުގެ ފަހުން ފުރަތަމަ ފަހަރަށް ލީގުގައި ޖެހިޖެހިގެން ދެ މެޗުން މޮޅުވި ބަޔާން ދެ ވަަނައިގައި އޮތީ އެއް ވަނައިގައި އޮތް ޔޫނިއަން ބާލިން އަށް ވުރެ އެއް މެޗު އިތުރަށް ކުޅެ އެއް ޕޮއިންޓް މަދުން ހޯދައިގެންނެވެ. ޔޫނިއަން ބާލިން އެއް ވަނައިގައި އޮތީ 10 މެޗުން 23 ޕޮއިންޓާ އެކު އެވެ، ދެ ވަނައިގައި އޮތް ބަޔާން އަށް ވަނީ 11 މެޗުން 22 ޕޮއިންޓް ލިބިފަ އެވެ.
ލީގުގެ ފުލުގައި އޮތް ބޮކުމް ބަލިކޮށް ޔޫނިއަން ބާލިން އަށް މާދަމާރޭ ލީގުގެ އެއް ވަނައިގައި ހަތަރު ޕޮއިންޓުގެ ލީޑެއް ނެގޭނެ އެވެ.
ހޮފެންހައިމްގެ އޮޒާން ކަބަކް (ކ) ކައިރިން ބޯޅަ ހިފައިގެންދާން ބަޔާންގެ މުސިއާލާ މަސައްކަތް ކުރަނީ
ބަޔާނުން މިރޭގެ މެޗުގައި ލީޑުނެގީ ޒުވާން މިޑްފީލްޑަރު ޖަމާލް މުސިއާލާ ޖެހި ގޯލުންނެވެ. މެޗުގެ 17 ވަނަ މިނިޓްގައި މުސިއާލާ ގޯލު ޖެހީ ކޯނަރެއްގައި ބަޔާންގެ ލެއޯން ގޮރެޓްޒްކާ ތަނަަވަސްކޮށްދިން ފުރުސަތެއްގެ ބޭނުން ހިފައިގެންނެވެ.
ފުރަތަމަ ހާފު ނިމުމުގެ ކުރިން ބަޔާނުން ދެ ވަނަ ގޯލެއް ޖެހި އެވެ. މި ލަނޑު ޖެހީ ސާޖް ގްނަބްރީ ހުސްކޮށްލާފައި ދިން ބޯޅައަކުން އެރިކް މެކްސިމް ޗޮޕޫ-މޯޓިން އެވެ.
އަމިއްލަ ދަނޑުގައި ކުޅުނު ޑޯޓްމަންޑުން ވަނީ މިރޭ ފުރަތަމަ ހާފުގައި ސްޓުޓްގާޓް ކައިރިން ތިން ގޯލުގެ ލީޑެއް ނަަގައިފަ އެވެ. މި ލަނޑުތައް ޖެހީ ޖޫޑް ބެލިންހަމް، ނިކްލަސް ސޫލާ އަދި ޖިއޯ ރޭނާ އެވެ. ދެ ވަނަ ހާފްގައި ކުޅެން އަރައި، ބެލިންހަމް ވަނީ އިތުރު ގޯލެއް ޖަހައިފަ އެވެ. ިމި ސީޒަނުގައި ބެލިންހަމް މިހާތަނަށް ވަނީ ހަތް ގޯލު ޖަހައިފަ އެވެ.
ޑޯޓްމަންޑްގެ އަނެއް ގޯލު ޖެހީ އަރަމުން އަންނަ ކުޅުންތެރިޔާ، ޔޫސެފާ މޫކޯކޯ އެވެ.
މިރޭގެ ތިން ޕޮއިންޓާ އެކު ޑޯޓްމަންޑް އޮތީ ޖަރުމަނު ލީގުގެ ފަސް ވަނައިގައި 11 މެޗުން 19 ޕޮއިންޓް ހޯދައިގެންނެވެ.
