ރަޝިއާއިން ނިޔުކްލިއާ ހަތިޔާރު ބޭނުންކުރުން ވާނީ "މުޅި އިންސާނިއްޔަތާ ދެކޮޅު އަމަލަކަށް" ކަމަށް ޖަޕާނުގެ ބޮޑު ވަޒީރު ފުމިއޯ ކިޝީޑާ ވިދާޅުވެއްޖެ އެވެ.
"ނިޔުކްލިއާ ހަތިޔާރު ބޭނުން ކުރާނެ ކަމަށް ބުނެ ރަޝިއާއިން ދެމުންދާ އިންޒާރުތަކާ މެދު ސީރިއަސްކޮށް ވިސްނަން ޖެހޭ. އެއީ ބައިނަލްއަގްވާމީ މުޖުތަމައުގެ ސަލާމަތާއި ސުލްހައަށް އޮތް ބޮޑު ނުރައްކަލެއް. އެއީ އެއްވެސް ހާލަތެއްގައި ބަލައިގަނެވޭނެ ކަމެއް ނޫން،" ކިޝީޑާ ވިދާޅުވި އެވެ.
ދުނިޔޭގެ ތާރީހުގައި ނިޔުކްލިއާ ބޮމެއްގެ އަސަރު ކުރި ހަމައެކަނި ގައުމަކީ ޖަޕާނެވެ. ދެ ވަނަ ބޮޑު ހަނގުރާމައިގެ ފަހުކޮޅު އެމެރިކާއިން ޖަޕާނަށް ނިޔުކްލިއާ ހަމަލާދިނެވެ.
އޯގަސްޓު 6، 1945 ގައި ހިރޯޝިމާ ސިޓީއަށް ނިޔުކްލިއާ ބޮމެއް ވައްޓާލުމުން 140،000 މީހުން މަރުވި އެވެ. އަންނަ އަހަަރުގެ މޭ މަހު އެ ސިޓީގައި ޖީ7 ގައުމުތަކުގެ ވެރިން ބައްދަލުކުރައްވާނެ އެވެ.
ހިރޯޝިމާއަށް ނިޔުކްލިއާ ބޮން ވައްޓާލިތާ ތިން ދުވަސް ފަހުން، ނަގަޒާކީ ސިޓީއަށް ވެސް ނިޔުކްލިއާ ހަމަލާދިނެވެ.
އޮސްޓްރޭލިއާއަށް ކުރެއްވި ދަތުރެއްގެ ތެރެއިން ނޫސްވެރިންނަށް މައުލޫމާތު ދެއްވަަމުން ކިޝީޑާ ވިދާޅުވީ އޭގެ ފަހުން ނިޔުކްލިއާ ހަމަަލާއެއް ނުދީ 77 އަހަރު ވޭތުވެފައިވާ އިރު، އެކަން އެގޮތުގައި ބާއްވަން ޖެހޭ ކަމަށެވެ.
"އެއްވެސް ހާލަތެއްގައި ނިޔުކްލިއާ ހަތިޔާރު ބޭނުންކޮށްފި ނަމަ، އެކަން ވާނީ މުޅި އިންސާނިއްޔަތާ ދެކޮޅަށް ހިންގާ އަމަލަކަށް. އެފަދަ އަމަލެއް ހިންގުމުގެ ފުރުސަތު ބައިނަލްއަގްވާމީ މުޖުތަމައިން ނުދޭނެ."
މިދިޔަ ފެބްރުއަރީ މަހު ރަޝިއާއިން ޔޫކްރެއިންގައި ފެށި ހަނގުރާމައިގެ ތެރެއިން ރަަޝިއާގެ ރައީސް ލެޑިމިއަ ޕުޓިން ތަކުރާރުކޮށް ވިދާޅުވަމުން ދަނީ ނިޔުކްލިއާ ހަތިޔާރު ބޭނުންކުރަން ފަސްނުޖެހޭނެ ކަމަށެވެ.
