ބާމިންހަމް (އޮކްޓޫބަރު 22) - އިނގިރޭސި ޕްރިމިއާ ލީގުގެ ފުލުގައި އޮތް ނޮޓިންހަމް ފޮރެސްޓުން 1-0 އިން ލިވަޕޫލް ބަލިކޮށްފި އެވެ.
މިއަދުގެ މެޗު ފެށިއިރު، ފޮރެސްޓް އޮތީ ލީގުގެ 20 ވަނައިގަ އެވެ. އެކަމަކު، ލިވަޕޫލް އަތުން މޮޅުވެގެން، ފޮރެސްޓް ލީގުގެ 19 ވަނަ އަށް ޖެހިލީ 12 މެޗުން ނުވަ ޕޮއިންޓް ހޯދައިގެންނެވެ. ފޮރެސްޓް މޮޅުވުމާ އެކު ލެސްޓާ އެންމެ ފުލަށް ވެއްޓުނުއިރު، އެ ޓީމަށް 11 މެޗުން ލިބުނީ އަށް ޕޮއިންޓެވެ.
ލިވަޕޫލަށް މި މެޗުން މޮޅުވެގެން، ފަސް ވަނަ އަށް އެރުމުގެ ފުރުސަތު އޮތް ނަމަވެސް މި ވަގުތު އޮތީ ލީގުގެ ހަތް ވަނައިގައި 11 މެޗުން 16 ޕޮއިންޓާ އެކު އެވެ. ލީގުގައި މި ފަހަރު ލިވަޕޫލަށް އަދި ރަށުންބޭރުގައި މޮޅެއް ނުލިބެ އެެވެ.
ނޮޓިންހަމް ދަނޑުގައި ކުޅުނު މެޗުގައި ލިވަޕޫލަށް ފުރަތަމަ ހާފުގައި ލީޑުނަގަން ގިނަ ފުރުސަތުތަކެއް ލިބުނެވެ. އެ ގޮތުން ފަބިއޯ ކަވާލިއޯ އާއި މުހައްމަދު ސަލާހު ޖެހި ބޯޅަތައް ފޮރެސްޓްގެ ކީޕަރު ޑީން ހެންޑަސަން މަތަކުރިއިރު، ވާޖިލް ވެން ޑައިކް އަށް ލިބުނު ފުރުސަތުން ގޯލާ ސީދާކޮށް ބޯޅަ ފޮނުވާލުމުގެ ބަދަލުގައި ރޮބާޓޯ ފިރްމީނޯ އަށް ދީގެން ޖަހަން މަސައްކަތް ކުރުމުން ފުރުސަތު ގެއްލުނީ އެވެ.
ފުރަތަަމަ ހާފުގައި ކައުންޓަ އެޓޭކުގައި ފޮރެސްޓްގެ ޖެސީ ލިންގާޑް ޖެހި ބޯޅަ އަމާޒުވީ ލިވަޕޫލްގެ ކީޕަރު އެލިސަން ބެކާ އަަތަށެވެ.
ފޮރެސްޓްގެ އަވޮނިޔީ (ކ) އަށް ލިބުމުުގެ ކުރިން ލިވަޕޫލްގެ އެލިސަން ބޮލުން ބޯޅަ ފޮނުވާލަނީ.-- ފޮޓޯ: ގެޓީއިމޭޖަސް
މި މެޗުގައި ފޮރެސްޓުން ޖެހި ހަމައެކަނި ގޯލު ކާމިޔާބުކުރީ 55 ވަނަ މިނިޓްގައި ނައިޖީރިއާގެ ފޯވާޑް ޓައިވޯ އަވޮނިޔީ އެވެ. ލިވަޕޫލްގައި ހަ އަހަރު ހޭދަކޮށް، 2021 ވަނަ އަހަރު އެ ޓީމު ދޫކޮށްލި އަވޮނިޔީ މި ގޯލު ޖެހީ އޭރިއާތެރެއިން ފުރަތަމަ ޖެހި ބޯޅަ ދަނޑީގައި ޖެހިފައި ނުކުތުމުން ރީބައުންސް ބޯޅަ ގޯލަށް ފޮނުވާލައިގެންނެވެ.
ލީޑުފުޅާކުރަން ފޮރެސްޓްގެ ރިޔާން ޔޭޓްސް އޭރިއާތެރެއިން ޖެހި ބޯޅަ ކީޕަރު އެލިސަން ވަނީ މަތަކޮށްފަ އެވެ.
ނަތީޖާ ހަމަހަމަަ ކުރަން ލިވަޕޫލަށް ގިނަ ފުރުސަތުތަކެއް ލިބުނުއިރު، ޓްރެންޓް އަލެކްސަންޑަ އާނޯލްޑާއި ވެން ޑައިކް ހުސްކޮށް އަރައި ބޮލުން ޖެހި ބޯޅަތައް ހުއްޓުވީ މެންޗެސްޓާ ޔުނައިޓެޑްގެ ލޯން އެއްބަސްވުމެއްގެ ދަށުން ފޮރެސްޓަށް ކުޅެމުން އަންނަ ހެންޑަސަން އެވެ.
އަނިޔާގެ ސަބަބުން ލިވަޕޫލްގެ އުރުގުއޭ ފޯވާޑް، ޑާވިން ނޫނޭޒާއި ސްޕެއިންގެ މިޑްފީލްޑަރު ތިއާގޯ އަލްކަންޓާރާ މި މެޗުގައި ނުކުޅެ އެވެ.
މިދިޔަ ސީޒަން އެއްކޮށް ލީގުގައި ލިވަޕޫލް ބަލިވީ ދެ މެޗުންނެވެ. އެކަމަކު، މި ސީޒަނުގައި މިހާތަނަށް ކުޅުނު 11 މެޗުގެ ތެރެއިން ތިން މެޗުން ވަނީ ބަލިވެފަ އެވެ.
އަނެއްކޮޅުން، މިއީ 23 އަހަރަށް ފަހު އިނގިރޭސި ޕްރިމިއާ ލީގުގައި ވާދަކުރާ ފޮރެސްޓަށް ލީގުގެ ވަރުގަދަ ޓީމެއް އަތުން ލިބުނު ފުރަތަމަ މޮޅެވެ. އެ ޓީމުން މި މޮޅާ އެކު ލީގުގެ ކުރިއަށް ހުރި މެޗުތަކަށް ކޮންފިޑެންސް ރަނގަޅުވާނެ އެވެ.
