ރަޝިއާ އާއި އެމެރިކާގެ ޑިފެންސް މިނިސްޓަރުން ފޯނު މެދުވެރިކޮށް ޔޫކްރެއިން ހަނގުރާމައާ ގުޅޭ ގޮތުން މަޝްވަރާ ކުރައްވައިފި އެވެ.
މިދިޔަ ފެބްރުއަރީ މަހު ހަނގުރާމަ ފެށި ފަހުން ދެ ގައުމުގެ މެދުގައި މިގޮތަށް ސީދާ މަޝްވަރާތައް ކުރީ މަދު ފަހަރަކު ކަމަށް ރިޕޯޓުތައް ބުނެ އެވެ.
ހުކުރު ދުވަހު ފޯނު މެދުވެރިކޮށް މަޝްވަރާ ކުރެއްވީ އެމެރިކާގެ ޑިފެންސް ސެކެޓްރީ ލޮއިޑް އޯސްޓިން އަދި ރަޝިއާގެ ޑިފެންސް މިނިސްޓަރު ސާގެއި ޝޮއިގޫ އެވެ.
ދެ ގައުމުން ވެސް ބުނީ މަޝްވަރާތަކުގައި ޔޫކްރެއިންގެ ހާލަތު ފާހަގަކުރި ކަމަށެވެ. ރިޕޯޓުތައް ބުނާ ގޮތުން ދެ ގައުމުގެ ޑިފެންސް މިނިސްޓަރުން އެންމެ ފަހުން މިގޮތަށް މަޝްވަރާ ކުރެއްވީ މޭ 13 ގަ އެވެ.
ޕެންޓަގަންއިން ބުނީ އެމެރިކާއިން އިސްކަންދިނީ ހަނގުރާމައިގެ ތެރެއިން މަޝްވަރާއަށް އޮތް ފުރުސަތުތައް ދެމެހެއްޓުމުގެ މުހިއްމު ކަމާ ގުޅޭ ގޮތުން ވާހަކަ ދެއްކުމަށް ކަމަށެވެ.
ރަޝިއާގެ ޑިފެންސް މިނިސްޓްރީން ބުނީ އެ ގައުމުން އިސްކަންދިނީ ޔޫކްރެއިން ހަނގުރާމައާ ގުޅިގެން ފެންމަތިވެފައިވާ ބައިނަލްއަގްވާމީ ސަލާމަތާ ގުޅޭ ކަންކަމަށް ކަމަށެވެ.
މިދިޔަ މޭ މަހު ކުރި މަޝްވަރާގައި އެމެރިކާއިން ގޮވާލީ ވަގުތުން ވަގުތަށް ހަމަލާތައް މެދުކަނޑާލުމަށެވެ. އެކަމަކު މި ފަހަރުގެ މަޝްވަަތާގައި އެ ވާހަކަ ދައްކާފައެއް ނުވެ އެވެ.
ޑިފެންސް މިނިސްޓަރުންގެ މަޝްވަރާތައް ބޭއްވި އިރު، ރަޝިއާއިން ނިޔުކްލިއާ ހަތިޔާރު ބޭނުން ކުރަން ފަސްނުޖެހޭނެ ކަމަށް ރައީސް ލެޑިމިއަ ޕުޓިން ގެންދަވަނީ ވިދާޅުވަަމުންނެވެ.
