އެމެރިކާގެ ކުރީގެ ރައީސް ޑޮނަލްޑް ޓްރަމްޕްގެ އެޑްވައިޒަރުކަން ކުރެއްވި ސްޓީވް ބެނަން ކޮންގްރެސްގެ ހުރުމަތް ކެނޑިކަމަށް ސާބިތުވެ، ހަތަރު މަހަށް ޖަލަށް ހުކުމްކޮށްފި އެވެ.
އުމުރުން 68 އަހަރުގެ ބެނަންގެ މައްޗަށް ދެ ދައުވާގައި ކުށް ސާބިތުވީ މިދިޔަ ޖުލައި މަހު އެވެ. އެއީ 2021 ވަނަ އަހަރުގެ ޖެނުއަރީ ހަ ވަނަ ދުވަހު ކެޕިޓަލް އިމާރާތުގައި ހިނގި ހަމަނުޖެހުން ބަލަމުން ދިޔަ ކޮންގްރެސްގެ ކޮމިޓީއަށް ލިޔެކިޔުމާއި މައުލޫމާތު ދޭން ދެކޮޅު ހެއްދެވުމުންނެވެ.
ހަތަރު މަހުގެ ޖަލު ހުކުމުގެ އިތުރުން 6،500 އެމެރިކާ ޑޮލަރުގެ ޖޫރިމަނާއެއް ދައްކަން ޖެހޭނެ ކަމަށް ކޯޓުން ކުރި ހުކުމުގައި ބުންޏެވެ. ބެނަން ވަނީ ދައުވާތަކަށް އިންކާރު ކުރައްވައިފަ އެވެ.
މައްސަލަ އިސްތިއުނާފް ކުރަން ލިބޭ މުއްދަތުގައި އޭނާ ހުންނަވާނީ މިނިވަންކޮށެވެ. ބެނަން ވިދާޅުވީ ވީ އެންމެ އަަވަހަކަށް އިސްތިއުނާފަށް ހުށަހަޅުއްވާނެ ކަމަށެވެ.
ބެނަންއަކީ 2016 ވަނަ އަހަރު ޓްރަމްޕް ހިންގެވި ކާމިޔާބު ރިޔާސީ ކެމްޕެއިނުގައި މުހިއްމު ބައިވެރިއެކެވެ. ޓްރަމްޕްގެ ވެރިކަމުގައި އޭނާ ހުންނެވީ ވައިޓް ހައުސްގެ ޗީފް ސްޓްރެޓެޖިސްޓުގެ މަގާމުގަ އެވެ.
ކޮންގްރެސްގެ ހުރުމަތް ކެނޑި މައްސަލައިގެ އިތުރުން މަކަރާއި ހީލަތް ހެދުމާއި، އޮޅުވާލުމާއި، މަނީ ލޯންޑަރިންގެ ދައުވާތަކެއް ބެނަންއާ ދެކޮޅަށް ނިއު ޔޯކްގައި އުފުލާފައިވެ އެވެ.
