ބާމިންހަމް (އޮކްޓޫބަރު 21) - އެސްޓަން ވިލާގެ ކޯޗުކަމުން ސްޓީވެން ޖެރާޑް ވަކިކޮށްފި އެވެ.
އެސްޓަން ވިލާގެ ކޯޗުކަމާ ޖެރާޑް، 42، ހަވާލުވީ މިދިޔަ އަހަރުގެ ނޮވެމްބަރު މަހު, ތިން އަހަރާ ބައިގެ ކޮންޓްރެކްޓެއްގަ އެވެ. އެކަމަކު، އަހަރެއް ވެސް ނުވަނިސް އެ ޓީމުން މި ވަނީ ޖެރާޑް ވަކިކޮށްފަ އެވެ.
ޖެރާޑަށް އެސްޓަން ވިލާގެ ކޯޗުކަމުގެ ވަޒީފާ ގެއްލުނީ އިނގިރޭސި ޕްރިމިއާ ލީގުގައި ރޭ ރަށުންބޭރުގައި ފުލަމް އަތުން 3-0 އިން ބަލިވި މެޗަށް ފަހު އެވެ. އެސްޓަން ވިލާ އިން ބުނީ މިއީ ކްލަބްގެ ބޯޑު މެމްބަރުންގެ އިއްތިފާގުން މި ވަގުތުގެ ހާލަތަށް ބަލާފައި ނިންމި ނިންމުމެއް ކަމަށެވެ.
ފުލަމް އަތުން ބަލިވި މެޗަށް ފަހު ބީބީސީ އަށް ދިން އިންޓަވިއުގައި ޖެރާޑް ވަނީ އެސްޓަން ވިލާގެ މެނޭޖްމަންޓުން އޭނާ ވަކިކުރަން ނިންމައިފިނަމަ އެ ނިންމުން ބަަލައިގަންނާނެ ކަމުގެ އިޝާރާތެއް ދީފަ އެވެ. އަދި އެސްޓަން ވިލާގައި އޭނާ އަށް ރަނގަޅު މަސައްކަތެއް ކުރަން ދިމާވި އެންމެ ބޮޑު ހުރަހަކީ އެއް ލެވަލެއްގައި ކުޅެ، ނަތީޖާ ނެރުމުގައި ދެމެހެއްޓެނިވި ގޮތެއްގައި ތަފާތު ނުދެއްކުމެވެ.
ޖެރާޑްގެ މި އިންޓަވިއު އަށް ދެ ގަޑިއިރު ނުވަނިސް އެސްޓަން ވިލާ އިން ބަޔާނެއް ނެރުމަށް ފަހު ވަނީ ޖެރާޑް މަގާމުން ވަކިކޮށްފައިވާކަން އިއުލާނުކޮށްފަ އެވެ.
ސްކޮޓްލެންޓްގެ ރޭންޖާސް ދޫކޮށްލުމަށް ފަހު، މިދިޔަ އަހަރު އެސްޓަން ވިލާއާ ހަވާލުވެ އެ ޓީމުގެ ކޯޗަކަށް އެގާރަ މަސް ދުވަހު ހުރިއިރު، ޖެރާޑް ވަނީ އެ ޓީމަށް ޖުމްލަ 40 މެޗުގައި އިރުޝާދުދީފަ އެވެ. އެ މެޗުތަކުގެ ތެރެއިން އެސްޓަން ވިލާ މޮޅުވީ 13 މެޗުންނެވެ. އަދި 19 މެޗުން ބަލިވިއިރު، މިއީ އޭނާގެ ވަޒީފާ ގެއްލުމުގެ އެންމެ ބޮޑު ސަބަބެވެ.
ކުރިން ލިވަޕޫލްގެ ކެޕްޓަނަކަށް ހުރި، ޖެރާޑް، ކޯޗިން ކެރިއަރު ފެށީ 2018 ވަނަ އަހަރު ރޭންޖާސް އިންނެވެ. އޭގެ ކުރިން އޭނާ ވަނީ ލިވަޕޫލްގެ 18 އަހަރުން ދަށުގެ ޓީމަށް ކޯޗުކޮށްދީފަ އެވެ.
ޖެރާޑަކީ އިނގިރޭސި ޕްރިމިއާ ލީގުގެ މި ސީޒަނުގައި ވަޒީފާ ގެއްލުނު ހަތަރު ވަނަ ކޯޗެވެ. މީގެ ކުރިން ބޯންމައުތުން އެ ޓީމުގެ ކޯޗަކަށް ހުރި ސްކޮޓް ޕާކާ، ޗެލްސީގެ ކޯޗަކަށް ހުރި ތޯމަސް ޓުޗެލް އަދި ވުލްވްސްގެ ކޯޗަކަށް މަސައްކަތް ކުރަމުން އައި ބްރޫނޯ ލާޖްގެ ވަޒީފާ ވަނީ ގެއްލިފަ އެވެ.
