ރާއްޖޭގެ ފަތުރުވެރިކަމުގެ އެއް ބާނީ ކަމަށްވާ ހެލްތު މިނިސްޓަރުގެ މަގާމުގައި ހުންނެވި އަހްމަދު ނަސީމަށް ނިޝާން މުލީގޭ ޝަރަފުގެ އިއްޒަތް މިރޭ އަރުވައިފި އެވެ.
އެމަނިކުފާނަށް މި އިއްޒަތް އެރުވީ ގައުމީ އިނާމު ދިނުމަށް މިރޭ ދަރުބާރުގޭގައި ބޭއްވި ހާއްސަ ރަސްމިއްޔާތުގައި ރައީސް އިބްރާހިމް މުހައްމަދު ސޯލިހު އެވެ. ރައީސް ސޯލިހުގެ ގަރާރަކުން އެމަނިކުފާނަށް މި އިއްޒަތް އެރުވިއިރު އެމަނިކުފާނަކީ ރައީސްގެ ކެބިނެޓުގައި ހެލްތު މިނިސްޓަރެވެ.
މި އިއްޒަތް އެމަނިކުފާނަށް އެރުވީ ރާއްޖޭގެ ފަތުރުވެރިކަމުގެ ބާނީއަކަށްވެފައި، އެ ސިނާއަތް ކުރިއަރާނެ ކަމުގެ އެއްވެސް އަލިމަގެއް ފެންނަން ނެތް ދުވަސްވަރެއްގައި އިސްނަންގަވައިގެން އެކަމަށް ކުރެއްވި މަސައްކަތްޕުޅުތަކާއި، ވެވަޑައިގެންނެވި ގުރްބާނީގެ އަގު ވަޒަންކުރެއްވުމުގެ ގޮތުންނާއި، ތަފާތު އެކި މަގާމުތަކުގައި ހުންނަވައިގެން، ދިވެހި ދައުލަތަށާއި ދިވެހި ގައުމަށް 37 އަހަރަށްވުރެ ދިގު މުއްދަތެއްގައި ކޮށްދެއްވާފައިވާ އަގުހުރި ހިދުމަތްތަކުގެ އަގު ވަޒަންކުރެއްވުމުގެ ގޮތުން ކަމަށް ރައީސްގެ ގަރާރުގައި ބުނެފައިވެ އެވެ.
ނަސީމު ފުރުއްވި މަގާމުތަކުގެ ތެރޭގައި ފޮރިން މިނިސްޓަރު ކަމާއި މިނިސްޓްރީ އޮފް އެކްސްޓާނަލް އެފެއާޒްގެ ސެކެޓްރީ ކަމާއި، ހާއްސަ ވަކީލު ކަމުގެ މަގާމުވެސް ހިމެނެ އެވެ.
މި ޝަރަފު އެރުވުމުގެ ކުރިން ނަސީމުގެ ހިދުމަތްތަކުގެ މައްޗަށް އެކުލަވާލާ ދެއްކި ވީޑިއޯ ރިޕޯޓެއްގައި ނަސީމް ވަނީ ފަތުރުވެރިކަމުގެ ސަބަބުން ދިވެހި ރާއްޖެއަށް ބޮޑު އިންގިލާބެއް އައިކަން ފާހަގަކުރައްވާ އެކަމަށް ނިހާޔަތައް އުފާ ކުރައްވާ ކަމަށް ވިދާޅުވެފަ އެވެ.
ނިޝާނު މުލީގެ ޝަރަފުގެ އިއްޒަތް އެރުވުނު ހެލްތު މިނިސްޓަރު ނަސީމަށް ރައީސް ސޯލިހު ވަނީ ތަހުނިޔާ ދަންނަވާފަ އެވެ. ފަތުރުވެރިކަމަކީ ރާއްޖޭގެ ކުރިއަށް ގެންގޮސް ފުޅާ ކުރެއްވޭނެ ސިނާއަތެއް ކަން އެނގިވަޑައިގެން ނަސީމު މަސައްކަތް ފެއްޓެވި ކަމަށާއި އެ ސިނާއަތް ކުރިއެރުވުމަށް އެމަނިކުފާނު ބުރަ މަސައްކަތްތަކެއް ކުރެއްވި ކަމަށް ރައީސް ވިދާޅުވި އެވެ.
ކޮވިޑުއާ ގުޅޭ ގޮތުން ބޭއްވި ނޫސްވެރިންގެ ބައްދަލުވުމެއްގައި މިނިސްޓަރު ނަސީމް ވާހަކަ ދައްކަވަނީ
"ސަރުކާރަށް 37 އަހަރަށް ވުރެ ގިނަ ދުވަހުގެ މުއްދަތެއްގައި ހިދުމަތް ކުރެއްވި. އަދި ސަރުކާރުގެ ވަރަށް ގިނަ އިސް މަގާމުތައް ފުރުއްވި،" ނަސީމުގެ ހިދުމަތްތަކަށް ވަރަށް ބޮޑަށް ތައުރީފު ކުރައްވައި ރައީސް ސޯލިހު ވިދާޅުވި އެވެ.
ހަވާލުކުރެއްވި ކޮންމެ ކަމެއް ވެސް ވަރަށް ފަރުވާތެރިކަމާއި އިހުލާސްތެރިކަމާއެކު ނަސީމް ކުރައްވާ ކަމަށާއި ސަރުކާރުން އޭރު ފެށި ބޮޑެތި ބައެއް މަޝްރޫއުތައް ހިންގެވުމުގައި ވަރަށް މުހިންމު ދައުރެއް އޭނާ އަދާކުރެއްވި ރައީސް ސޯލިހު ވިދާޅުވި އެވެ.
"އޭގެ ތެރެއިންވެސް އެންމެ މުހިންމު އެއް މަޝްރޫޢަކީ، ރާއްޖޭގެ މަސްދޯނިފަހަރުގައި އިންޖީނު އެޅުމުގެ މަޝްރޫޢު. އެ މަސައްކަތްވެސް އެންމެ އިސްކޮށް ހުންނަވައިގެން ކުރިއަށް ގެންދެވީ ނަސީމުގެ ބެއްލެވުމުގެ ދަށުން. އެ ނޫނަސް ނަސީމުގެ ކިތަންމެ ހިދުމަތެއް މި ޤައުމަށް ލިބިފައިވާކަން، ވީޑިއޯ ރިޕޯޓުން ވެސް އެނގިއްޖެ،" ރައީސް ވިދާޅުވި އެވެ.
ހެލްތު މިނިސްޓަރުގެ މަގާމުގައި މިހާރު ނަސީމް ކުރައްވަމުން ގެންދަވާ ހިދުމަތްތަކީ ފާހަގަކޮށްނުލާ ދޫކޮށްލެވޭނެ ޚިދުމަތެއް ނޫން ކަމަށް ފާހަގަ ކުރައްވައި ރައީސް ވިދާޅުވީ "ކޯވިޑް-19ގެ ދަތި އުނދަގޫ ދުވަސްވަރު ވެސް ރެޔާއި ދުވާލު [ނަސީމް] ކުރައްވަމުން ގެންދެވި ބުރަ މަސައްކަތް އަޅުގަނޑަށް ވަނީ ފެނިފައި" ކަމަށެވެ.
