މެންޗެސްޓާ (20 އޮކްޓޫބަރު) - އިނގިރޭސި ޕްރިމިއާ ލީގުގައި ރޭ ޓޮޓެންހަމް ހޮޓްސްޕާސް އަތުން މެންޗެސްޓާ ޔުނައިޓެޑް މޮޅުވި މެޗު ނިމުމުގެ ކުރިން، ޔުނައިޓެޑްގެ ތަރި ކްރިސްޓިއާނޯ ރޮނާލްޑޯ، ބެންޗު ދޫކޮށް ޗޭންޖިން ރޫމަށް ދިޔަ މައްސަލަ ބަލާނެ ކަމަށް ޔުނައިޓަޑްގެ ކޯޗު އެރިކް ޓެން ހާގް ބުނެފި އެވެ.
ޔުނައިޓަޑްގެ ދަނޑުގައި ރޭ ޓޮޓެންހަމް އަތުން 2-0 އިން މޮޅުވި މެޗުގައި ޔުނައިޓަޑްގެ ފަހު ދެ ބަދަލުގެ ގޮތުގައި ކްރިސްޓިއަން އެރިކްސަން އާއި އެންތޮނީ އެލަންގާ ކުޅެން އެރުވީތާ މާގިނައިރުތަކެއް ނުވެ، ރޮނާލްޑޯ ވަނީ މެޗުގެ 89 ވަނަ މިނިޓުގައި ބެންޗު ދޫކޮށް ޗޭންޖިން ރޫމާ ދިމާލަށް ގޮސްފަ އެވެ. ބައެއް މީޑިއާ ރިޕޯޓްތައް ބުނާގޮތުން ރޮނާލްޑޯ ވަނީ މާ ގިނައިރުތަކެއް ނުވެ ދަނޑުން ވެސް ގޮސްފަ އެވެ.
ރޮނާލްޑޯ ޗޭންޖިން ރޫމަށްދިޔައިރު، ޔުނައިޓަޑުން ކޮށްފައިވަނީ ތިން ބަދަލެވެ. ބާކީ ދެ ބަދަލު އެ ޓީމަށް ކުރެވެން އޮތެވެ.
މެޗު ނުނިމެނީސް ރޮނާލްޑޯ ޗޭންޖިން ރޫމަށް ދިޔަކަން ފާހަގަކޮށް، ރޭގެ މެޗަށް ފަހު ޓެން ހާގާ މީޑިއާ އިން ސުވާލުކުރުމުން އޭނާ ބުނީ ފަހުން އެ މައްސަލަ ބަލާނެ ކަމަށެވެ. އަދި މި ވަގުތު އެކަމާ ގުޅޭ އިތުރު ވާހަކައެއް ދައްކަން ބޭނުންނުވާ ކަމަށެވެ.
"ތިކަން އަހަރެން ބަލާނީ މާދަމާ. މިއަދަކު ނޫން. މިއީ މި މެޗުން ލިބުނު މޮޅުގެ އުފާފާޅުކުރަންވީ ވަގުތު. އަހަންނާ ރޮނާލްޑޯ ދިމާވި. އެކަމަކު، އަހަރެން އެއްވެސް ވާހަކައެއް ނުދައްކަން،" ޓެން ހާގް ބުންޏެވެ.
އިނގިރޭސި ޕްރިމިއާ ލީގުގައި މި ހަފުތާގައި ނިއުކާސަލްއާ ދެކޮޅަށް ޔުނައިޓަޑް ކުޅުނު މެޗުގައި ރޮނާލްޑޯ ބަދަލު ކުރުމުން ވެސް އޭނާ ވަނީ ހިތްހަމަނުޖެހުން ފާޅުކޮށްފަ އެވެ.
ޕްރީ ސީޒަންގެ ތެރޭގައި ވެސް، ރޮނާލްޑޯ ވަނީ ޔުނައިޓަޑުން ކުޅުނު މެޗެއް ނިމުމުގެ ކުރިން ސްޓޭޑިއަމް ދޫކޮށް ގޮސްފަ އެވެ. އެ ފަހަރު، އެހެން ކުޅުންތެރިންތަކެއް ވެސް އެގޮތަށް އަމަލުކުރި އެވެ. އެކަމާ ގުޅިގެން، ޓެން ހާގް ވަނީ ހިތްހަމަނުޖެހުން ފާޅުކޮށްފަ އެވެ.
