ހައިކޯޓުގެ ފަނޑިޔާރު ޝުއައިބް ހުސައިން ޒަކަރިއްޔާ މަގާމުން ރިޓަޔާ ކުރައްވަން ނިންމަވާފައިވާ ކަމަށް ޖުޑީޝަލް ސާވިސް ކޮމިޝަން (ޖޭއެސްސީ)އިން މިއަދު ބުނެފި އެވެ.
އެ ކޮމިޝަނުން މިއަދު ބުނީ އޭނާ މަގާމުން ރިޓަޔާ ކުރައްވަން ނިންމެވީ "އުމުރުން 55 އަހަރުވުމުން އަމިއްލައަށް އެދިގެން ވަކިވާ ފަނޑިޔާރުންނަށާއި، 55 އަހަރު ނުވިނަމަވެސް އަމިއްލައަށް އެދިގެން ސިއްހީ ސަބަބުތަކަށްޓަކައި މަގާމުން މުސްކުޅިކުރާ ފަނޑިޔާރުންނަށް އިނާޔަތް ދިނުމުގައި އަމަލުކުރާނެ ގޮތުގެ ގަވައިދު" ގެ ދަށުން އަމިއްލައަށް އެދިލައްވައިގެން ކަމަށެވެ.
ފަނޑިޔާރު ޝުއައިބު މަގާމުން ރިޓަޔާ ކުރައްވާ ސަބަބު އެ ބަޔާނުގައި ބުނެފައެއްނުވެ އެވެ.
ފާއިތުވީ 23 އަހަރު ޝުއައިބު ވަނީ ފަނޑިޔާރު ކަމުގެ މަގާމު އަދާ ކުރައްވާފަ އެވެ. އަދި ހައިކޯޓުގެ ފަނޑިޔާރުކަމަށް އައްޔަންކޮށްފައިވަނީ 2011 ވަނަ އަހަރު އެވެ. މަގާމުން މުސްކުޅިކުރައްވަން ނިންމެވިއިރު ފަނޑިޔާރު ކަމުގައި 20 އަހަރަށް ވުރެ ގިނަ ދުވަސް ހޭދަކުރައްވާފައިވާ ކަމަށް ޖޭއެސްސީން ބުނެފައިވެ އެވެ.
އެ ކޮމިޝަނުން ނިންމާފައިވަނީ އަންނަ ނޮވެމްބަރު 22، އިން ފެށިގެން ފަނޑިޔާރު މަގާމުން މުސްކުޅި ކުރެއްވުމަށެވެ.
