ފ. މަގޫދޫގައި އެއާޕޯޓެއް އެޅުމަށް 231 މިލިއަން ރުފިޔާއަށް ދައުލަތުގެ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީއާ މިއަދު ހަވާލުކޮށްފި އެވެ.
މަގޫދޫ އެއާޕޯޓު ހެދުމުގެ ޕްރޮޖެކްޓު އެމްޓީސީސީއާ ހަވާލު ކުރީ 550 ދުވަހުގެ ތެރޭގައި ނިންމާ ގޮތަށެވެ. އެހެންކަމުން އެ ޕްރޮޖެކްޓު ނިންމަންޖެހޭނެ ތާރީހަކީ އޭޕްރީލް 21، 2024 އެވެ.
ގާތްގަނޑަކަށް 800 މީހުން ދިރިއުޅޭ މަގޫދޫގައި އެއާޕޯޓު އެޅުމުގެ މަޝްރޫއު އެމްޓީސީސީއާ ހަވާލު ކުރީ މީގެ ކުރިން އެ އެއާޕޯޓަށް ބޭނުންވާ ބިން ހިއްކުމުގެ ޕްރޮޖެކްޓު ވެސް ހަވާލު ކުރީ ހަމަ އެ ކުންފުންޏަށެވެ. އެ ޕްރޮޖެކްޓުގެ ދަށުން ގޮނޑުދޮށް ހިމާޔަތް ކުރުމުގެ މަސައްކަތް ވެސް ކުރާނެ އެވެ. އެއީ 206 މިލިއަން ރުފިޔާގެ ޕްރޮޖެކްޓެކެވެ.
މަގޫދޫގައި އެއާޕޯޓެއް އެޅުމަށް އެންމެ ފުރަތަމަ އިއުލާންކުރީ ކުރީގެ ރައީސް އަބްދުالله ޔާމީންގެ ވެރިކަމުގެ ފުރަތަމަ ކޮޅުގަ އެވެ. ނަމަވެސް ފަހުން އެ އެއާޕޯޓް އެ އަތޮޅުގެ ވެރިކަން ކުރާ ނިލަންދޫގައި އަޅަން ސިޔާސަތަށް 2016 ވަނަ އަހަރު ބަދަލު ގެނަ އެވެ.
ނިލަންދޫގައި އެއާޕޯޓެއް އަޅަން ސާވޭތަކެއް ކުރިއެއްކަމަކު ދައުރު ނިމުނުއިރު ވެސް އެ މަސައްކަތް ކުރިޔަކަށް ނުދެ އެވެ. އޭގެ ފަހުން އަނެއްކާ ވެސް މަގޫދޫގައި އެއާޕޯޓު އަޅަން ނިންމީ މި ސަރުކާރުންނެވެ.
