ސައުދީ އަރަބިއްޔާގެ ސަރުކާރަށް ފާޑުކިޔައި ޓްވީޓްތަކެއް ކުރުމުން ރިޔާދުގައި ހައްޔަރު ކުރި އެމެރިކާ މީހަކު 16 އަހަރަަށް ޖަލަށް ހުކުމްކޮށްފި އެވެ.
އުމުރުން 72 އަހަރުގެ ސާދް އިބްރާހިމް އަލްމާދީއަކީ އެމެރިކާ އާއި ސައުދީ އަރަބިއްޔާގެ ޕާސްޕޯޓު އޮންނަ މީހެކެވެ. އޭނާ ހައްޔަރު ކުރީ މިދިޔަ ނޮވެމްބަރު މަހު އާއިލާ ދެކިލުމަށް ފްލޯރިޑާއިން ރިޔާދަށް ދިޔަަ ތަނުންނެވެ.
އޭނާގެ ފިރިހެން ދަރިފުޅު އިބްރާހިމް އަލްމާދީ ބުނީ ބައްޕަގެ މައްސަލައިގައި ނޫސްތަކަށް މައުލޫމާތު ނުދިނުމަށް އެމެރިކާ ސަރުކާރުން ލަފާދިން ނަމަވެސް، ބައްޕަ ޖަލުގައި ހުރެ މަރުވާ މަންޒަރު ދެކެން ބޭނުން ނުވާ ކަމަށެވެ.
އޭނާ ތުހުމަތު ކުރީ ބައްޕަ ބަންދުކޮށްފައި ހުރީ އިންސާނިއްޔަތާ ހިލާފު ގޮތަކަށް ކަމަށެވެ. ހަމަނުޖެހުން އުފެއްދުމާއި ޓެރަރިޒަމަށް ފަންޑު ކުރުމުގެ ކުށް ކޯޓުން ސާބިތު ކުރީ 14 ޓްވީޓެއް ހެކީގެ ގޮތުގައި ބަލައިގެން ކަމަށް ވެސް ބުންޏެވެ.
ބީބީސީއިން ބުނީ އެ ޓްވީޓުތަކުގައި ހިމެނެނީ މައްކާ އާއި ޖިއްދާގެ ބައެއް ގަދީމީ ތަންތަން ނައްތާލުމާ ދެކޮޅު ހިޔާލާއި، ސައުދީ އަރަބިއްޔާގައި ފަގީރުކަން އޮތް މިންވަރާ މެދު ކަަންބޮޑުވުމާއި، މަރާލާފައިވާ ނޫސްވެރިޔާ ޖަމާލް ހަޝޮގްޖީގެ ވާހަކަ ކަމަށެވެ.
އިބްރާހިމް އަލްމާދީ އެންމެ ބޮޑަށް ކަންބޮޑުވުން ފާޅުކުރީ އޭނާގެ ބައްޕަގެ މައްސަލައަށް އެމެރިކާ ސަރުކާރުން ސަމާލުކަން ނުދޭތީ އެވެ. އޭނާ ބުނީ އެމެރިކާ ރައްޔިތަކު ހައްޔަރު ކުރާ ގައުމެއްގެ ގޮތުން، އެމެރިކާ ސަރުކާރުން އަމަލު ކުރާ އުސޫލު ތަފާތު ކަމަށެވެ.
އެގޮތުން ރަޝިއާ ނުވަތަ އިރާނުގައި އެމެރިކާ މީހަކު ހައްޔަރުކޮށްފި ނަމަ ވަގުތުން ފިޔަވަޅު އެޅި ނަމަވެސް، ސައުދީ އަރަބިއްޔާގައި އެކަން ކުރުމުން ތަފާތު ކަމަށް ބުންޏެވެ.
"ސައުދީ އަރަބިއްޔާގައި އެމެރިކާ މީހަކު ހައްޔަރުކޮށްފި ނަމަ، އެ މީހަކަށް ވުރެ ބޮޑަށް މުހިއްމު ވާނީ ތެޔޮ ފީފާއެއް،" އޭނާ ބުންޏެވެ.
އެމެރިކާގެ އިސް އޮފިޝަލަކު ބުނީ ސާދްގެ މައްސަލަ އެމެރިކާ ސަރުކާރުން ސައުދީ ސަަރުކާރަށް ހުށަހަޅާފައިވާ ކަމަށެވެ.
