ބާލިން (އޮކްޓޫބަރު 17) - ޖަރުމަން ލީގުގައި ރޭ ބޮރޫޝިއާ ޑޯޓްމަންޑް އަތުން 2-0 އިން މޮޅުވެ، ތާވަލްގެ އެއް ވަނައިގައި އޮތް ޔޫނިއަން ބާލިން ލީޑު ފުޅާކުރިއިރު، ފްރައިބާގް އަތުން އެންމެ ފަހުގެ ޗެމްޕިއަން، ބަޔާން މިއުނިކުން 5-0 އިން ބޮޑު މޮޅެއް ހޯދައިފި އެވެ.
ތާވަލްގެ އެއް ވަނައިގައި ފަސް ހަފުތާ ހޭދަކޮށްފައިވާ ޔޫނިއަން ބާލިން އިން އަމިއްލަ ދަނޑުގައި ރޭ ޑޯޓްމަންޑް އަތުން މޮޅުވީ މެޗުގެ ފުރަތަމަ ހާފުގައި ޔަނިކް ހަބޭރާ ކާމިޔާބުކުރި ދެ ލަނޑުންނެވެ.
ޔޫނިއަން ބާލިން، އެއް ވަނައިގައި އޮތީ 23 ޕޮއިންޓާ އެކު އެވެ. ދެ ވަނައިގައި އޮތީ 19 ޕޮއިންޓާ އެކު ބަޔާން މިއުނިކެވެ. ތިން ވަނައިގައި 18 ޕޮއިންޓް ހޯދައިގެން އޮތީ ފްރައިބާގެ އެވެ.
"ޓީމު މިހާރު އޮތް ހިސާބަށް ބަލާއިރު ވަރަށް ހިތްހަމަޖެހޭ،" މެޗަށް ފަހު ޔޫނިއަން ބާލިންގެ ކޯޗު އާސް ފިޝާ ބުންޏެވެ.
"އެކަމަކު، އަހަރެން ކުރިން ވެސް ބުނިހެން، މިއީ އަދި ސީޒަންގެ ވަރަށް ކުރީކޮޅު. ދިހަ މެޗުން 23 ޕޮއިންޓް ލިބުމަކީ ކުރިއަށްދާން ލިބޭ ފުރުސަތެއް. މި ގޮތަށް މަސައްކަތް ކޮށްގެން ކުރިއަށް ދެވޭނީ."
ޔޫނިއަން ބާލިން އާއި ޑޯޓްމަންޑް ރޭ ކުޅުނު މެޗުގެ ތެރެއިން.--- ފޮޓޯ: އޭއެފްޕީ
އަމިއްލަ ދަނޑުގައި ރޭ ފްރައިބާގް އަތުން މޮޅުވެ ތާވަލްގެ ދެ ވަނަ އަށް ބަޔާން ޖެހިލިއިރު، އެ ޓީމަށް ލަނޑު ޖަހައިނީ ސާޖް ގްނަބްރީ އާއި އެރިކް މެކްސިމް ޗޯޕޫ މޯޓިން އާއި ލެރޯއީ ސާނޭ އާއި ސަޑިއޯ މާނޭ އަދި މާސެލް ސަބިޓްޒާ އެވެ.
މެޗަށް ފަހު ބަޔާންގެ ކޯޗު ހޫލިއަން ނާގަލްސްމަން ވަނީ އޭނާގެ ޓީމުން ދެއްކި ކުޅުމާ މެދު ހިތްހަމަޖެހުން ފާޅުކޮށްފަ އެވެ.
"ހުރިހާ ކުޅުންތެރިން ވެސް މި މެޗުގައި ވަރަށް ރަނގަޅު ކުޅުމެއް ދެއްކި. ނަތީޖާ އިން އެކަން ފެނޭ،" ނަގެލްސްމަން ބުންޏެވެ.
މި ފަހަރު ލީގުގައި ބަޔާންގެ ރެކޯޑް ދަށްވުމުން އެ ޓީމުގެ ކޯޗުގެ މަގާމުގައި ނާގަލްސްމަން އަށް ދެމިހުރެވިދާނެތޯ ސުވާލު އުފެއްދި އެވެ. އެކަަމަކު، މެޗަކަށް ފަހު މެޗެއް ކުރިއެރުން ހޯދަމުން އައިސް ނާގަލްސްމަން ވަނީ މަގާމުގައި ދެމި ހުރުމަށް އަލުން ސަޕޯޓަރުންގެ އިތުބާރު ހޯދައިފަ އެވެ.
