އިރާނުގެ ވެރިރަށް ތެހްރާނުގައި ހުންނަ އެވިން ޖަލުގައި ހޮނިހިރު ދުވަހު ރޯވެ ހިނގި ހަމަނުޖެހުމުގައި ހަތަރު ގައިދީން މަރުވެ، 61 މީހުންނަށް އަނިޔާވެއްޖެ އެވެ.
ދައުލަތުގެ ނޫސް އެޖެންސީ އިރްނާއިން ބުނީ ހަތަރު ގައިދީން މަރުވީ ދުމުގެ އަސަރުކޮށްގެން ކަމަށެވެ. މަރުވި މީހުންނަކީ ވައްކަމުގެ ކުށުގައި ހުކުމްކޮށްފައި ތިބި މީހުންނެވެ.
އެވިން ޖަލަކީ ސިޔާސީ ކުށްވެރިންނާއި ނޫސްވެރިން އަދި އެހެން ގައުމުތަކު ރައްޔިތުން އާއްމު ގޮތެއްގައި ބަންދުކުރާ މަރުކަޒެކެވެ.
އިރްނާއިން ބުނީ އަނިޔާވި ގައިދީންގެ ތެރެއިން 10 މީހުންނަށް ހޮސްޕިޓަަލުގައި ފަރުވާދެމުންދާ އިރު، އޭގެ ތެރެއިން ހަތަަރު މީހުންގެ ހާލު ސީރިއަސް ކަމަށެވެ.
ކުރިން އިރްނާއިން ބުނީ ޖަލުގައި އަލިފާން ރޯވީ ގައިދީންނާއި ގާޑުންނާ ދެމެދު ހިނގި ކުރިމަތިލުމަކަށް ފަހު ކަމަށެވެ. އޮފިޝަލުން ވެސް ބުނީ ރޯވީ ގައިދީން ގުދަނެއްގައި ރޯކުރުމުން ކަމަށެވެ.
ސޯޝަލް މީޑިއާގައި އާއްމުވެފަައިވާ ވީޑިއޯތަކުން ފެންނަނީ ތެހްރާނުގައި ހުންނަ ޖަލުގައި އަލިފާން ރޯވެފައިވާ އިރު، ދުންތައް އަރާ މަންޒަރެވެ. ވީޑިއޯތަކުން ބަޑީގެ އަޑުފަށްގަނޑާއި ގޮވުންތަކުގެ އަޑު އިވެ އެވެ.
އިރާނުގައި ސަރުކާރާ ދެކޮޅަށް މުޒާހަރާ ކުރާތާ މަހެއް ވާން ގާތްވަނީ އެވެ. މުޒާހަރާ ފެށުނީ ބުރުގާ ނާޅާ ހުރުމުން ފުލުހުން ހައްޔަރު ކުރި އަންހެނަކު މަރުވި މައްސަލައިގަ އެވެ.
ޖަލުގަައި ހިނގަމުންދާ ހާދިސާ އާއި މުޒާހަަރާތަކާ ގުޅުން ހުރި ކަމެއް އަދި ސާފެއް ނޫނެވެ. އެހެން ނަމަވެސް މުޒާހަރާއިން ހައްޔަރު ކުރި އެތައް ސަތޭކަ ބަޔަކު ބައިތިއްބާފައި ތިބީ އެ ޖަލުގަ އެވެ.
