އެމެރިކާގެ ކެލިފޯނިއާ ސްޓޭޓުގައި ސިލްސިލާކޮށް މީހުން މެރުމުގެ ތުހުމަތުގައި ފިރިހެނަކު ހައްޔަރުކޮށްފި އެވެ.
ހައްޔަރު ކުރި މީހާއަށް ތުހުމަތު ކުރެވެނީ އުތުރު ކެލިފޯނިއާގައި ހަ މީހުން މަރާލި ކަމަށެވެ. ފުލުހުން ބުނީ އޭނާ ހައްޔަރު ކުރީ ލިބުނު މައުލޫމާތުގެ އަލީގައި ކަމަށެވެ.
ކެލިފޯނިއާގެ ސްޓޮކްޓޮން ސަރަހައްދުގެ ފުލުހުންގެ ވެރިޔާ ސްޓޭންލީ މެކްފެޑަން ވިދާޅުވީ އާއްމުންގެ ފަރާތުން ލިބުނު މައުލޫމާތާއި ފުލުހުންގެ ތަހުގީގުން ކުރި މަސައްކަތުން ތުހުމަތު ކުރެވޭ މީހާއަށް ފާރަލައި އޭނާގެ ހަރަކާތްތައް ބަލައި، ހޮނިހިރު ދުވަހުގެ ހެނދުނު ސިޓީގެ މަގުތަކުގައި ކާރެއް ދުއްވަމުން ދަނިކޮށް އޭނާ ހިފަހައްޓަައި ހައްޔަރު ކުރި ކަމަށެވެ.
ފުލުހުން އެ މީހާ ހުއްޓުވި އިރު، އޭނާ ހުރީ ކަޅު ހެދުން ލައިގެން ކަރުގައި މާސްކެއް އަަޅުވައިގެންނެވެ. އަދި އޭނާގެ އަތުގައި ބަޑިއެއް ވެސް އޮތެވެ. މެކްފެޑަން ވިދާޅުވީ ފުލުހުން އޭނާ ހުއްޓުވި ވަގުތު ވެސް އޭނާ އުޅުނީ މީހަކު މަރާލުމުގެ "މިޝަންއެއްގައި" ކަމަށެވެ.
"އިތުރު މަރެއް ހިނގުމުގެ ކުރިން ހުއްޓުވިއްޖެކަން އަޅުގަނޑުމެންނަށް ޔަގީން،" އޭނާ ވިދާޅުވި އެވެ.
މެކްފެޑަން ވިދާޅުވީ ތުހުމަތުގައި ހައްޔަރު ކުރީ އުމުރުން 43 އަހަރުގެ ވެސްލީ ބްރައުންލީ ކަމަށެވެ. ބަޑި ޖަހައި މީހުން މެރުމުގެ ހާދިސާތައް ފެށީ މިދިޔަ އަހަރު އެވެ. އެންމެ ފަހުން މީހަކު މަރާލީ ސެޕްޓެމްބަރުގަ އެވެ. އެ ހުރިހާ ކޭސްއެއް ގުޅެނީ އެކަކާ ކަމަށް ދެނެގަތީ ފޮރެންސިކް ހެކީގެ އެހީގަ އެވެ.
ހަމަލާތަކުގައި ޖުމްލަ ހަ މީހުން މަރުވި އެވެ. އޭގެ ތެރެއިން ފަސް މީހުން މަރުވީ ސްޓޮކްޓޮން ސަރަހައްދުގަ އެވެ. ހަތް ވަނަ އަންހެން މީހެއްގެ ގަޔަށް ބަޑި ޖެހި ނަމަވެސް، އޭނާ މަރެއް ނުވެ އެވެ.
ތުހުމަތު ކުރެވޭ މީހާގެ ސީސީޓީވީ ފުޓޭޖް ފުލުހުން އާއްމު ކުރީ އޮކްޓޯބަރު ހަތަރު ވަނަ ދުވަހު އެވެ. ހަމަލާތަކަކީ "ސީރިއަލް ކިލާ" ނުވަތަ ސިލްސިލާކޮށް މީހުން މަރާ ގާތިލެއްގެ މަސައްކަތް ކަމަށް ފުލުހުން ބުންޏެވެ. އޭނާ އެ އަމަލު ހިންގި ސަބަދު އަދި ނޭނގެ އެވެ.
