އިރާނުގެ ސިޔާސީ ކުށްވެރިންނާއި ނޫސްވެރިން އަދި އެހެން ގައުމުތަކު ރައްޔިތުން އާއްމު ގޮތެއްގައި ބަންދުކުރާ އެވިން ޖަލުގއި ހޮނިހިރު ދުވަހު އަލިފާން ރޯވެއްޖެ އެވެ.
ސޯޝަލް މީޑިއާގައި އާއްމުވެފަައިވާ ވީޑިއޯތަކުން ފެންނަނީ ތެހްރާނުގައި ހުންނަ ޖަލުގައި އަލިފާން ރޯވެފައިވާ އިރު، ދުންތައް އަރާ މަންޒަރެވެ. ވީޑިއޯތަކުން ބަޑީގެ އަޑުފަށްގަނޑާއި ގޮވުންތަކުގެ އަޑު އިވެ އެވެ.
ދައުލަތުގެ މީޑިއާއިން އޮފިޝަލަކާ ހަވާލަދީ ބުނީ ހާލަތު ކޮންޓްރޯލްކޮށްފައިވާ ކަމަށެވެ. އެކަމަކު އޭގެ ފަހުން އާއްމުވި ވީޑިއޯތަކުން ވެސް ފެންނަނީ އަލިފާން ރޯވެފައި އޮތް މަންޒަރެވެ.
އިރާނުގައި ސަރުކާރާ ދެކޮޅަށް މުޒާހަރާ ކުރާތާ މަހެއް ވާން ގާތްވަނީ އެވެ. މުޒާހަރާ ފެށުނީ ބުރުގާ ނާޅާ ހުރުމުން ފުލުހުން ހައްޔަރު ކުރި އަންހެނަކު މަރުވި މައްސަލައިގަ އެވެ.
ޖަލުގަައި ހިނގަމުންދާ ހާދިސާ އާއި މުޒާހަަރާތަކާ ގުޅުން ހުރި ކަމެއް އަދި ސާފެއް ނޫނެވެ. އެހެން ނަމަވެސް މުޒާހަރާއިން ހައްޔަރު ކުރި އެތައް ސަތޭކަ ބަޔަކު ބައިތިއްބާފައި ތިބީ އެ ޖަލުގަ އެވެ.
ދައުލަތުގެ މީޑިއާއިން ހަބަރު ފެތުރީ މުޒާހަރާއާ ޖަލުގެ ހާދިސާއާ ގުޅުމެއް ނެތް ކަމަށެވެ. އޮފިޝަލުން ބުނީ އަަލިފާން ރޯވީ "ކުށްވެރިން އަމަލުތަކުން" ކަމަށެވެ. އަށް މީހުންނަށް އަނިޔާވި ކަމަށް އޮފިޝަލް ބުންޏެވެ.
