މެލްބަން، އޮސްޓްރޭލިއާ (އޮކްޓޫބަރު 15) - މިދިޔަ އަހަރު ވިސާ މައްސަލައިގައި އޮސްޓްރޭލިއާ އިން ޑީޕޯޓްކޮށްލި ސާބިއާގެ ޓެނިސް ތަރި، ނޮވަކް ޖޮކޮވިޗް އަށް ވިސާ ދޭން އޮސްޓްރޭލިއާ ސަރުކާރަށް ޕްރެޝަރު ކުރުމަކީ ކުރެވޭނެ ކަމެއް ނޫން ކަމަށް އޮސްޓްރޭލިއަން އޯޕަން ހިންގާ ކޮމިޓީން ބުނެފި އެވެ.
މިދިޔަ އަހަރު އޮސްޓްރޭލިއާ އިން ޖޮކޮވިޗް ޑީޕޯޓްކޮށްލީ، ވިސާ ފޯމުގައި ހުރި މައުލޫމާތު ދިމާނުވާތީ އެވެ. އޮސްޓްރޭލިއާ އިން ޖޮކޮވިޗް ޑީޕޯޓްކޮށްލީ ތިން އަހަރުގެ މުއްދަތަށެވެ.
އޮސްޓްރޭލިއަން އޯޕަންގައި ވާދަކުރަން ޖޮކޮވިޗް، 34، އޮސްޓްރޭލިއާ އަށް ދިޔަ ތަނުން އެއާޕޯޓުގައި މަޑުކޮށް އޭނާގެ ވިސާ އެންމެ ފުރަތަމަ ކެންސަލްކޮށްލި މައްސަލަ ކޯޓަށް ހުށަހަޅައިގެން އޭނާ ކާމިޔާބު ހޯދިއެވެ. އެ ފަހަރު ޖޮކޮވިޗްގެ ވިސާ ބަލައިނުގަންނަން ނިންމީ ޖޮކޮވިޗް ކޮވިޑް ވެކްސިން ޖެހިކަމުގެ މައުލޫމާތު ދީފައިނުވާތީ އެވެ. ކޯޓުން ޖޮކޮވިޗަށް މައްސަލަ ކާމިޔާބުވީ ވެކްސިން މައުލޫމާތު ދީފައިނުވި ނަަމަވެސް ޖޮކޮވިޗް އަށް 2020 ވަނަ އަހަރުގެ ޑިސެމްބަރު 16 ވަނަ ދުވަހު ކޮވިޑް ޖެހިފައިވާތީ، މެޑިކަލް އެގްޒެމްޕްޝަންގެ ތެރެއިން ވިސާ ލިބޭ ގޮތަށް އޮތުމުންނެވެ.
އެކަމަކު، ޖޮކޮވިޗްގެ ވިސާ އެޕްލިކޭޝަނުގައި ދީފައި ހުރި މައުލޫމާތު ދިމާނުވާތީ އަލުން އެ މައްސަލަ ކޯޓަށް ވައްދައި، އޮސްޓްރޭލިއާ ސަރުކާރުން ކާމިޔާބު ހޯދި އެވެ. އަދި ޖޮކޮވިޗް ޑީޕޯޓްކޮށްލި އެވެ.
މިދިޔަ އަހަރުގެ މުބާރާތުގައި ނުކުޅެވި ޖޮކޮވިޗް ތިން އަހަރަށް އޮސްޓްރޭލިއާ އަށް ނޭރޭ ގޮތަށް ޑީޕޯޓްކޮށްލި ނަމަވެސް އޭނާ ހުރީ އަންނަ އަހަރުގެ މުބާރާތުގައި ކުޅެވޭނެ ކަމުގެ އުންމީދުގަ އެވެ.
އޮސްޓްރޭލިއަން އޯޕަންގެ ޗީފް، ކްރެއިގް ޓިލޭ ވަނީ ޖޮކޮވިޗްގެ ވިސާ ކަންކަން ހަމަޖައްސައި، އެ ހުރިހާ މަރުހަލާއެއް ނިންމަން ޖެހޭނީ އޭނާ އަމިއްލަ އަށް ކަމަށެވެ. އަދި މި ކަމުގައި އޮސްޓްރޭލިއާ ސަރުކާރަށް "ޕްރެޝަރު" ކުރަން އެއްވެސް ބަޔަކަށް ފުރުސަތެއް ނެތްކަން ޓިލޭ ވަނީ ފާހަގަކޮށްފަ އެވެ.
ދާދި ފަހުން ޓިލޭ ވަނީ ޖޮކޮވިޗާ ބައްދަލުވެސް ކޮށްފަ އެވެ. އަދި މުބާރާތުގައި ޖޮކޮވިޗް ފެންނަން އެދޭކަން ހާމަކޮށް، ޓިލޭ އެދިފައިވަނީ ޖޮކޮވިޗްގެ ގާނޫނީ ޓީމުން މިކަމަށް އަވަސް ހައްލެއް ހޯދުމަށެވެ.
މި ވަގުތު ދުނިޔޭގެ ޓެނިހުގެ ރޭންކިން ހަތް ވަނައިގައި އޮތް ޖޮކޮވިޗަކީ އޮސްޓްރޭލިއަން އޯޕަންގެ ރެކޯޑް ހޯލްޑަރެވެ. އޭނާ ވަނީ ނުވަ ފަހަރު އެ މުބާރާތް ކާމިޔާބުކޮށްފަ އެވެ.
އަންނަ ޖެނުއަރީ މަހު ބާއްވާ އޮޮސްޓްރޭލިއަން އޯޕަން އިންތިޒާމްކުރާ ފަރާތުން މި ފަހަރު މުޅި މުބާރާތަށް ޓާގެޓް ކުރަނީ އެއް މިލިއަން ސަޕޯޓަރުންނަށެވެ. އެ މުބާރާތުގައި ރަޝިއާ އާއި ބެލަރޫސްގެ ކުޅުންތެރިންނަށް ނިއުޓްރަލް (އެއްވެސް ގައުމަކަށް ނިސްބަތްނުވާ) ކުޅުންތެރިއެއްގެ ގޮތުގައި ބައިވެރިވުމުގެ ފުރުސަތު ވަނީ ދީފަ އެވެ.
