ބެއިރޫތު، ލުބްނާން (އޮކްޓޯބަރު 13) - އެމެރިކާ މެދުވެރިވެގެން އެކުލަވާލި އިޒްރޭލާއި ލުބްނާންގެ ކަނޑުގެ ބޯޑަރު އެއްބަސްވުމަށް ލުބްނާންގެ ރައީސް މިޝޭލް އައޫން ރުހުން ދެއްވަައިފި އެވެ.
ބުދަ ދުވަހު އިޒްރޭލުގެ ބޮޑު ވަޒީރު ޔެއާ ލަޕީދް ވިދާޅުވީ އެއްބަސްވުމުގެ ސަބަބުން ލުބްނާންގެ ހިޒުބްﷲ އާ ހަމަަނުޖެހުން ހިނގުމުގެ ފުރުސަތު ކުޑަވާނެ ކަމަށެވެ.
ޓީވީ މެދުވެރިކޮށް ދެއްވި ހިތާބެއްގައި ލުބްނާންގެ ރައީސް މިޝޭލް އައޫން ވިދާޅުވީ އެ އެއްބަސްވުމަކީ "ތާރީހީ ކާމިޔާބެއް" ކަމަށާއި ކުރިން ސުވާލު އުފެދިފައި އޮތް 860 އަކަކިލޯމީޓަރުގެ ސަރަހައްދެއް މިހާރު ލުބްނާނަށް ޔަގީންވެފައިވާ ކަމަށެވެ.
"ލުބްނާނުން އެންމެ އަކަކިލޯމީޓަރެއް ވެސް އިޒްރޭލަށް ދުލެއް ނުކުރޭ،" އައޫން ވިދާޅުވި އެވެ.
ކަނޑުގެ ބޯޑަރާ ގުޅޭ އެއްބަސްވުމަކަށް ދިޔަ ނަމަވެސް، ލުބްނާނުން އިޒްރޭލާ އެކު ޑިޕްލޮމެޓިކް ގުޅުން ގާއިމް ނުކުރާ ކަމަށް އެމަނިކުފާނު ފާހަގަކުރެއްވި އެވެ.
ނަވާރަ ސަތޭކަ ސާޅީސް އަށް ވަނަ އަހަރު އިޒްރޭލް އުފެދުނު ފަހުން ލުބްނާނާއި އިޒްރޭލާ ދެމެދު ގުޅުން ގޯހެވެ. ޓެކްނިކަލް ގޮތްތަކުން ބަލާއިރު، އެ ދެ ގަައުމުގެ މެދުގައި ހަނގުރާމައެއް އެބަ އޮތެވެ.
އެހެންވެ، އެއްބަސްވުމަކަށް އާދެވުމުން ދުނިޔޭގެ ވެރިން ވަނީ މަރުހަބާ ކިޔައިފަ އެވެ. އެއްބަސްވުމަކާ ހަމައަށް ދެވުނީ ގިނަ ހިޔާލު ތަފާތުވުންތައް ހައްލުކޮށްގެންނެވެ.
އެންމެ ބޮޑު މައްސަލައަކަށް ދިމާވީ ކާރިޝް ގޭސް ފީލްޑެވެ. އިޒްރޭލުން ބުނީ އެ ތަން އޮތީ އިޒްރޭލުގެ ކަނޑުގެ ސަރަހައްދުގައި ކަމަށާއި އެ ތަނާ މެދު މަޝްވަރާ ނުކުރެވޭނެ ކަމަށެވެ.
ރިޕޯޓުތައް ބުނާ ގޮތުން އެ ފީލްޑްގެ ބައެއް އޮތީ ލުބްނާންގެ ސަރަހައްދުގައި ކަމަށް ލުބްނާން ސަރުކާރުން ބުންޏެވެ. ހިޒްބުﷲ އިން ވެސް ބުނީ އެ ތަނުގައި އިޒްރޭލުން ގޭސް އުފައްދަން ފަށައިފި ނަމަ ހަމަލާ ދޭނެ ކަމަށެވެ.
އެކަމަކު ހިޒްބުﷲ އިން ފަަހުން ބުނީ ލުބްނާން ސަރުކާރުން އެއްބަސްވުމަށް ރުހުން ދީފި ނަމަ އެކަން ބަލައިގަންނާނެ ކަމަށެވެ.
