ރައްޔިތުންގެ މަޖިލީހުގެ ގޯތި ތެރޭގައި ފާޅުގައި (މެމްބަރުންތަކެއް ނުވަތަ މެމްބަރަކު) މަސްތުވާތަކެތި ބޭނުންކުރާ ކަމަށް މަރަދޫ ދާއިރާގެ އެމްޑީޕީ މެމްބަރު އިބްރާހީމް ޝަަރީފު ތުހުމަތުކުރެއްވުމުން، މަޖިލީހުގެ ރައީސް މުހައްމަދު ނަޝީދު، އެ ތުހުމަތު މިއަދު ދޮގުކުރައްވައިފި އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި މަރަދޫ ދާއިރާގެ މެމްބަރު އިބްރާހީމް ޝަރީފަށް ރިޔާސަތުން ފުރަތަމަ ރައްދު ދެއްވީ "ގައުމު ސުންނާފަތި ވިޔަސް ވަރިހަމަ ކަމަށް" ވެގެން ތިބޭ ތަނަކަށް ވެގެން ނުވާނެ ކަމަށް ޝަރީފު ވިދާޅުވުމުންނެވެ.
ރައްޔިތުންގެ މަޖިލީހުގެ މަރަދޫ ދާއިރާގެ މެމްބަރު އިބްރާހީމް ޝަރީފު މަޖިލީހުގެ ޖަލްސާއެއްގައި ވާހަކަދައްކަވަނީ.
އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނަށް ބަދަލުގެންނަން ސަރުކާރުގެ ފަރާތުން ވެލިދޫ ދާއިރާގެ އެމްޑީޕީ މެމްބަރު މުހައްމަދު އަބްދުﷲ ޝަފީގު ހުށަހެޅުއްވި ބިލުގެ ބަހުސްގައި ޝަރީފު ވިދާޅުވީ މަޖިލީހުގައި ކަންތައްތައް ވަމުން ދަނީ "ގައުމު ސުންނާފަތިވިޔަސް ވަރިހަމަ ކަމަށް"ވާ ގޮތަކަށް ކަމަށެވެ.
"އިއްޒަތްތެރި މެމްބަރު އަޅުގަނޑަށް ޖެހޭނީ އިއްޒަތްތެރި މެމްބަރު ފުރަތަމަ މަޑުޖައްސައިލަން ނުވަތަ ވާހަކަފުޅު ރަނގަޅު މަގުގައި ބަހައްޓަން ދަންނަވަން،" ޝަރީފުގެ އެ ވާހަކައަށް ރައްދު ދެއްވަމުން ނަޝީދު ވިދާޅުވި އެވެ.
މަޖިލީހުގައި ފާޅުގައި ޑްރަގް ބޭނުންކުރާ ކަމަށް ޝަރީފު ތުހުމަތު ކުރެއްވީ އެހިސާބުންނެވެ. އެހެން ނަމަވެސް އޭނާގެ ތުހުމަތު ވަކި މެމްބަރަކަށް މިއަދު އަމާޒެއް ނުކުރައްވަ އެވެ.
"ތިޔަ ވިދާޅުވި އެއްޗަކަށް އަޅުގަނޑު ދަންނަވަން ޖެހެނީ އަޅުގަނޑު ވަރަށް ހިތާމަކުރަމޭ. މި އިއްޒަތްތެރި މަޖިލީހަކީ ޑްރަގްގެ އައްޑާއަކަށް ވެގެން ނުވާނެ. މަޖިލިސްގެ ގޯތި ތެރޭގައި ފާޅުގައި ޑްރަގް ބޮއިގެން މަސްތުގެ ހާލަތުގައި މިތަނަށް [މަޖިލީހުގެ ތަޅުމަށް] އައިސް މީހުންނާ ދިމާލަށް ހިތުހުރި އެއްޗެއް ގޮވުމުގެ ފުރުސަތު މިތަނުގައި ދެވިގެން ނުވާނެ،" ޝަރީފު ވިދާޅުވި އެވެ.
މަޖިލީހުގައި "ބްރެތު އެނަލައިޒާ"އެއް [ބަނގުރާ ބޮއިގެން ހުރިކަން ނުވަތަ ނޫންކަން ބަލަން ބޭނުންކުރާ އާލާތެއް] ބަހައްޓަން ޖެހޭ ކަމަށް ވެސް އޭނާ ވިދާޅުވި އެވެ.
އެ ހިސާބުން ރިޔާސަތުން ޝަރީފުގެ ވާހަކައަށް ހުރަސް އަޅުއްްވަމުން ނަޝީދު ވިދާޅުވީ ޝަރީފު ކުރައްވާ ކަމަަކީ މަޖިލީހުގެ ގަދަރާއި އިއްޒަތް ނަގައިލަން، ސާބިތުނުހިފޭ ވާހަކަ ދެއްކެވުން ކަމަށެވެ.
"މިތަނުގައި ޑްރަގެއް ނުގެންގުޅޭނެ، މިތަނުގައި މަސްތުވާތަކެއްޗެއް ނުގެންގުޅޭނެ، މިއީ ދިވެހިރާއްޖޭގެ ރައްޔިތުންގެ މަޖިލިސް،" ނަޝީދު ވިދާޅުވި އެވެ.
އެމަނިކުފާނުގެ ވާހަކަފުޅަށް ފަހުގައި ވެސް ޝަރީފު ވިދާޅުވީ އެވާހަަކަފުޅުގެ ހަގީގަތް އެނގޭނީ ބްރެތު އެނަލައިޒަރެއް ބެހެއްޓީމާ ކަމަށެވެ. އޭނާ މިމޭރުމުން މިއަދު ވާހަކަ ދައްކަވާފައި މިވަނީ މިދިޔަ ހޯމަ ދުވަހު ބޭއްވި ޖަލްސާގައި އޭނާއާއި ކާށިދޫ ދާއިރާގެ މެމްބަރު އަބްދުﷲ ޖާބިރާއި ދެބޭފުޅުން، އެއް މެމްބަރަކު އަނެއް މެމްބަރަކަށް ތުހުމަތުތައް ކުރެއްވުމަށް ފަހުގަ އެވެ. އެ ޖަލްސާގައި ޝަރީފު ވަނީ މަސްތުވާތަކެތީގެ ތުހުމަތު ޖާބިރަށް ކުރައްވައިފަ އެވެ.
