ހައިފާ، އިޒްރޭލް (އޮކްޓޫބަރު 11) - ޔުއެފާ ޗެމްޕިއަންސް ލީގުގައި މިރޭ އިޓަލީގެ ގަދަބާރު، ޔުވެންޓަސް 2-0 އިން ބަލިކޮށް، އިޒްރޭލުގެ މެކަބީ ހައިފާ އިން ތާރީހީ މޮޅެއް ހޯދައިފި އެވެ.
މިއީ 2002 ވަނަ އަހަރު ޗެމްޕިއަންސް ލީގުގައި އަމިއްލަ ދަނޑުގައި މެންޗެސްޓާ ޔުނައިޓެޑް އަތުން 3-0 އިން މޮޅުވި ފަހުން، މި މުބާރާތުގައި އަމިއްލަ ދަނޑުގައި މެކަބީ ހައިފާ އިން ހޯދި ފުރަތަމަ މޮޅެވެ. އަނެއްކޮޅުން، މިއީ ޗެމްޕިއަންސް ލީގުގައި ޔުވެންޓަސްގެ އެންމެ ދަށް ރެކޯޑެއް އޮތް ސީޒަނެވެ. މިއީ އެ ކްލަބްގެ ތާރީހުގައި ވެސް ޗެމްޕިއަންސް ލީގުގެ ފުރަތަމަ ހަތަރު މެޗުގެ ތެރެއިން ތިން މެޗުން ބަލިވި ފުރަތަމަ ފަހަރެވެ.
ޗެމްޕިއަންސް ލީގުގެ ގްރޫޕް އެޗްގެ އެއް ވަނައިގައި އޮތް ޕީއެސްޖީ އާއި ދެ ވަނައިގައި އޮތް ބެންފީކާ އަށް ތިން މެޗުން ހަތް ޕޮއިންޓް ލިބިފައިވާއިރު، މިރޭ އެ ދެ ޓީމު ކުޅޭ މެޗު އޮތީ ޕީއެސްޖީ ދަނޑުގަ އެވެ. ޔުވެންޓަސް އާއި މެކަބީ ހައިފާ ވަނީ ކޮންމެ ޓީމަކުން ހަތަރު މެޗު ކުޅެފަ އެވެ. ޔުވެންޓަސް ތިން ވަނައިގައި އޮތީ ހަތަރެއްގައި އޮތް މެކަބީ ހައިފާއާ އެއްވަރަށް ތިން ޕޮއިންޓް ހޯދައިގެން ކަމުގައި ވިޔަސް ލަނޑުގެ ތަފާތުން ކުރިލިބޭތީ އެވެ.
މެކަބީ ހައިފާގެ ދެ ކުޅުންތެރިން ކައިރިން ޔުވެންޓަސްގެ ޑި މާރިއާ (މ) ބޯޅަ ހިފައިގެންދާން މަސައްކަތް ކުރަނީ
މިރޭގެ މެޗުގެ ހަތް ވަނަ މިނިޓްގައި ޔުވެންޓަސް ކޮޅަށް މެކަބީ ހައިފާގެ ފުރަތަމަ ގޯލު ޖެހީ ޕިއޭރޭ ކޮމޫދު ނެގި ހުރަހަކުން އޮމާރް އަޓްޒިލީ އެވެ. އޭނާ ބޮލުން ޖެހި ބޯޅަ ގޯލަށް ވަނީ ޔުވެންޓަސްގެ ގޯލުގައި ހުރި ޕޮލެންޑްގެ ކީޕަރު ވޮޒްޝިއޭ ޝެޒްނީ އަތުގައި ޖެހިފަ އެވެ.
ފުރަތަމަ ހާފު ނިމުމުގެ ކުރިން މެޗުގެ 41 ވަނަ މިނިޓްގައި އޭރިއާތެރެއިން އަޓްޒިލީ އަށް ލިބުނު ފުރުސަތުގައި އޭނާ ވަނީ މަތީ ކަނަށް ބޯޅަ އަމާޒުކޮށްލައިފަ އެވެ.
ޔުވެންޓަސް އަށް މިރޭގެ މެޗު ފަށައިގެން އެންމެ ބޮޑު މައްސަލައެއް ދިމާވީ ރަނގަޅު ފޯމެއްގައި ހުރި އާޖެންޓީނާގެ ވިންގް، އެންހެލް ޑި މާރިއާގެ ފަލަމަސްގަނޑަށް ލިބުނު އަނިޔާއެއްގެ ސަބަބުން ބަދަލުކުރަން ޖެހުމެވެ. ޑި މާރިއާ އަށް އަނިޔާވީ މެޗުގެ 22 ވަނަ މިނިޓްގަ އެވެ. އޭގެ ދެ މިނިޓް ފަހުން އޭނާ ބަދަލުކުރަން ޖެހުނެވެ.
އެންމެ ފަހުން ޔުވެންޓަސް ކުޅުނު ނުވަ މެޗުގެ ތެރެއިން މޮޅުވީ ދެ މެޗުންނެވެ. އެ ޓީމު މި ވަގުތު އިޓާލިއަން ލީގުގައި އޮތީ އަށް ވަނައިގަ އެވެ. ޔުވެންޓަސްގެ ކޯޗުގެ މަގާމުގައި ހުރި މެސިމޯ އަލެގްރީ އަށް މަގާމު ގެއްލުމުގެ ފުރުސަތު ވަނީ ބޮޑުވެފަ އެވެ.
