އެތައް މިލިއަން ޑޮލަރެއްގެ އަގުހުރި ޕްރޮޖެކްޓުތައް ހޯދުމަށް ސްރީލަންކާގެ އޮފިޝަލުންނަށް ރިޝްވަތު ދިން ކަމުގެ ތުހުމަތުގައި އޮސްޓްރޭލިއާގައި ދެ ފިރިހެނުން ހައްޔަރުކޮށްފި އެވެ.
އޮސްޓްރޭލިއާގެ ފުލުހުން އެ ދެ މީހުން ހައްޔަރު ކުރީ ގިނަ ގައުމުތަކަކާ ގުޅިގެން ހިންގި ދިގު ތަހުގީގަކަށް ފަހު ސެޕްޓެމްބަރު މަހު އެވެ. އެއީ އޮސްޓްރޭލިއާގެ ދެ ރައްޔިތުންނެވެ.
އުމުރުން 67 އަހަރާއި 71 އަހަރުގެ އެ ދެ މީހުން ވަޒީފާ އަދާކުރި ކުންފުންޏަށް ވެސް ތުހުމަތުތައް ކުރެވެ އެވެ. އެގޮތުން ދެކުނު އޭޝިއާގެ ގައުމުތަކުގައި ގަވާއިދު ހިލާފަށް އަމަލު ކުރި ކަމަށް ބެލެވެ އެވެ
އޮސްޓްރޭލިއަން ފެޑެރަލް ޕޮލިހުން ބުނީ އެ މީހުން ވަނީ 2009 އާއި 2016 އާ ދެމެދު 190،000 ޑޮލަރުގެ ރިޝްވަތު ސަރުކާރުތަކުގެ އޮފިޝަލުންނަށް ހަމަަޖައްސައިދީފައި ކަމަށެވެ.
އެ މީހުން ނިސްބަތްވާ އެސްއެމްއީސީއަކީ އޮސްޓްރޭލިއާގައި މައި އޮފީސް ހުންނަ އިންޖިނިއަރިން ކުންފުންޏެވެ. އޮސްޓްރޭލިއާއިން އެ ކުންފުނީގެ ތަހުގީގު ހިންގީ އެމެރިކާ، ކެނެޑާ، އިންޑިއާ އަދި ބައެއް އެހެން ގަައުމުތަކުގެ އިދާރާތަކާ ގުޅިގެންނެވެ.
އެސްއެމްއީސީއަކީ އުފެދުނީ 1949 ވަނަ އަހަރެވެ. އޭގެ ފަހުން ކުންފުނި ފުޅާވެ ގިނަ ގައުމުތަކަށޤ ފެތުރި 5،400 އަށް ވުރެ މުވައްޒަފުން މިހާރު ހިމެނެ އެވެ.
ވޯލްޑު ބޭންކުން 2017 ވަނަަ އަހަރު އެސްއެމްއީސީ އާއި އެ ކުންފުނީގެ ހަތަރު ސަބްސިޑަޔަރީ ކުންފުނި އިންޑިއާ، ބަންގްލަދޭޝް އަދި ސްރީލަންކާގައި ޕްރޮޖެކްޓުތަކަށް ބިޑް ކުރުން ވަގުތީ ގޮތުން މަނާކުރި އެވެ.
ވޯލްޑު ބޭންކުން ބުނީ އެގޮތަށް ނިންމީ ސްރީލަންކާ އާއި ބަންގްލަދޭޝްގައި ޝައްކު ކުރެވޭ ގޮތްތަކަކަށް ފައިސާ ދިނުމާ އެ ކުންފުންޏާ ގުޅުން ހުރި ކަމަށް ބެލެވޭތީ އެވެ.
