ރޯލާކޯސްޓާ ދުއްވުމުން އެންމެ ފަހުގެ ބައެއް އައިފޯންތަކުން އެމެޖެންސީ ކޯލް ކުރެވޭ މައްސަލައެއް ފާހަގަ ވެއްޖެ އެވެ.
ވޯލް ސްޓްރީޓް ޖާނަލް ނޫހުން ބުނީ އެމެރިކާގެ އެމިއުޒްމަންޓް ޕާކެއްގައި ރައިޑްތަކަށް އެރި ބައެއް މީހުންގެ ފޯނުތަކުން "ކްރޭޝް ޑިޓެކްޝަން ސިސްޓަމް" އެކްޓިވޭޓްވި ކަމަށެވެ.
"ކްރޭޝް ޑިޓެކްޝަން ސިސްޓަމް" އަކީ އައިފޯން 14 އައި އެޕަލް ވޮޗް ސީރީޒް 8، އަލްޓްރާ އަދި އެސްއީއާ އެކު ތައާރަފު ކުރި އާ ފީޗާ އެކެވެ.
އެޕަލް ކުންފުނިން ބުނީ އެ ޓެކްނޮލޮޖީގެ މަގްސަދަކީ އެކްސިޑެންޓެއް ދިމާވެއްޖެ ނަމަ ވީ އެންމެ އަވަހަކަށް އެކަން އަންގަން ޖެހޭ ފަރާތްތަކަށް އެންގުން ކަމަށެވެ.
އައިފޯން 14 އަށް އެ ފީޗާ ތައާރަފް ކުރުމުގެ ކުރިން ގޫގްލްގެ ޕިކްސެލް ފޯނުން ވެސް އެ ފީޗާ ތައާރަފު ކުރި އެވެ.
ރައިޑްތައް ދުއްވި ބައެއް މީހުންގެ ފޯނުތަކުން އެމެޖެންސީ ކޯލްކޮށް، އެލާޓް ފޮނުވި އިރު، އުޅަނދެއްގައި ދަނިކޮށް ފޯނު ވެއްޓުނު ބައެއް މީހުންނަށް ވެސް އެކަން ދިމާވި އެވެ.
އެކްސިޑެންޓެއް ނުވަނީސް އެމެޖެންސީ ހިދުމަތްތަކަށް ގުޅުމުން އެ ފަރާތްތަކުގެ މަަސައްކަތަށް ހުރަސް އެޅެ އެވެ. އަދި ފޯނުގެ ވެރިފަރާތުގެ އާއިލާ އާއި ގާތް މީހުންނަށް އެލާޓް ދިޔުމުން، ނަފްސާނީ ގެއްލުންތައް ވެ އެވެ.
އެމެރިކާގެ ބައެއް އެމިއުޒްމަންޓް ޕާކުތަކުން މިހާރު ވަނީ އެ ފީޗާ ބޭނުންކުރާ ޑިވައިސްތައް ހިފައިގެން އެއްވެސް ރައިޑަކަށް ނޭރުމަށް ނޯޓިސް ބަހައްޓާފަ އެވެ.
