އިރާނުގެ ފުލުހުން ބަންދުކޮށްފައި ހުއްޓާ މަރުވި އުމުރުން 22 އަހަރުގެ މަހްސާ އާމިނީގެ އާއިލާއަަށް މަރުގެ އިންޒާރު ލިބެމުންދާ ކަމަށް ތުހުމަތުކޮށްފި އެވެ.
މަހްސާ އާމިނީ ހައްޔަރު ކުރީ ބުރުގާ ނާޅާ ހުރުމުންނެވެ. އިރާނުގައި އަންހެނުން ބުރުގާ އެޅުން މަޖުބޫރެވެ. އާއިލާއިން ބުނީ އޭނާ މަރުވީ އަނިޔާ ކުރުމުން ކަމަށެވެ.
އެ އާއިލާއިން ބީބީސީއަށް ބުނީ އިރާނުގެ އޮފިޝަލުން އާއިލާއަށް ޕްރެޝަރު ކުރަމުން ދަނީ ބޭރުގެ ނޫސްތަކާއި ޖަމިއްޔާތަކަށް މައުލޫމާތު ދިނުން ހުއްޓުވަން ކަމަށެވެ.
އާއިލާއަށް ލިބެމުންދާ އިންޒާރުތަކާ ހެދި ފުރާނައަށް ނުރައްކާ އެބަ އޮތް ކަމަށް އެ މީހުން ބުނެ އެވެ. އެގޮތުން މުޒާހަރާގައި ބައިވެރިވާ ނަމަ މަރުވެދާނެކަމުގެ އިންޒާރު ދީފައިވެ އެވެ.
މަހްސާ އާމިނީގެ މަރާ ގުޅިގެން މީގެ ހަތަރު ހަފުތާ ކުރިން ފެށި މުޒާހަރާތައް ހަމަނުޖެހުމަށް ބަދަލު ގިނަ އަދަދެއްގެ މީހުން މިހާތަނަށް މަރުވެއްޖެ އެވެ.
އިރާނުގެ ފޮރެންސިކް އޯގަނައިޒޭޝަނުން ހުކުރު ދުވަހު ބުނީ "މަހްސާ އާމިނީ މަރުވީ ބޮލާއި، މުހިއްމު ގުނަވަންތަކާއި، އަތާއި ފަޔަަށް ލިބުނު ޒަހަމްތަކެއްގެ ސަބަބުން ނޫން" ކަމަށެވެ.
އެ އިދާރާއިން ނެރުނު ބަޔާނުގައި ބުނީ އޭނާ މަރު ގުޅިފައި ވަނީ "އުމުރުން އަށް އަހަރުގައި ސިކުނޑީގެ ޓިއުމަރަކާ ގުޅިގެން ހެދި ސާޖަރީއަކާ" ކަމަށެވެ.
މަހްސާ އާމިނީގެ އާއިލާއިން ފުލުހުންނާ ދެކޮޅަށް ޝަކުވާ ހުށަހަޅާފައިވާ އިރު، އާއިލާއިން ގަބޫލުކުރަނީ އޭނާ މަރުވީ ބޮލަށް އަނިޔާ ކުރުމުން ކަމަށެވެ.
