ޓައިވާން އޮންނަން ވާނީ ޗައިނާގެ ހާއްސަ އިދާރީ ޒޯނެއްގެ ގޮތުގައި ކަމަށް ޓެސްލާ ކުންފުނީ ޗީފް އެގްޒެކްޓިވް އެލޮން މަސްކް ބުނުމުން، ޗައިނާ އާއި ޓައިވާނުން ހިޔާލު ފާޅުކޮށްފި އެވެ.
ދުނިޔޭގެ އެންމެ ބޮޑު މަހުޖަނު ފައިނޭންޝަލް ޓައިމްސްއަށް ދިން އިންޓަވިއުގައި ބުނީ ޓައިވާނާއި ޗައިނާގެ ސަރުކާރަށް އެއްބަސްވުމަަކަށް އާދެވިދާނެ ކަމަށް އޭނާ ގަބޫލުކުރާ ކަމަށެވެ.
އެ ވާހަކަތަކާ ގުޅިގެން ޗައިނާއިން އެމެރިކާއަށް ކަނޑައަޅާފައި ހުންނަ ސަފީރު މަސްކްއަށް ތައުރީފް ކުރެއްވި އެވެ. އެކަމަކު ޓައިވާނުގެ ސަފީރު ބުނީ "މިނިވަންކަމަކީ ވިއްކާލާނެ އެއްޗެއް ނޫން" ކަމަށެވެ.
ޓައިވާނުން ދެކޭ ގޮތުގައި އެއީ މިނިވަން ދަައުލަތެކެވެ. އެކަމަކު ޗައިނާއިން ދެކެނީ އެއީ އެ ގައުމުގެ ޕްރޮވިންސެއްގެ ގޮތުގަ އެވެ.
ޗައިނާ އާއި ޓައިވާނުގެ މައްސަލައިގެ ކުރިން މިދިޔަ ހަފުތާގައި މަސްކް ވަނީ ރަޝިއާ އާއި ޔޫކްރެއިން މައްސަލައިގައި ވެސް ހިޔާލު ފާޅުކޮށްފަ އެވެ.
މަސްކްގެ 107.7 މިލިއަން ފޮލޯވަރުން ކައިރީގައި އޭނާ އެދުނީ ހަނގުރާމަ ނިންމޭނެ ކަމަށް ފެންނަ ގޮތްތަކަކަށް ވޯޓު ދިނުމަށެވެ. އޭގެ ތެރޭގައި ޔޫކްރެއިނުގެ ބިމުން ބައެއް ރަޝިއާއަށް ދިނުން ހިމެނެ އެވެ.
