ރާއްޖޭގެ ސިއްހީ ދާއިރާއާ ގުޅުންހުރި މުހިންމު ދިރާސާތަކުގެ މައުލޫމާތު ހިމެނޭ "ކޮމްޕެންޑިއަމް އޮފް ހެލްތް ރިސާޗް އިން މޯލްޑިވްސް 2018-2021" ގެ ނަމުގައި ފޮތެއް އާންމު ކޮށްފި އެވެ.
ހެލްތް މިނިސްޓްރީން ބުނީ މިފަދަ ފޮތެއް ޝާއިއު ކުރުމުގެ މައިގަނޑު މަގުސަދަކީ ފާއިތުވި ހަތަރު އަހަރުގެ ތެރޭގައި ރާއްޖޭގައި ކުރެވިފައިވާ ސިއްހީ ދިރާސާތަކުގެ މައުލޫމާތު ފަސޭހަކަމާއެކު އެއް ފޮތަކުން އާންމުންނަށް ފޯރުކޮށްދިނުން ކަމަށެވެ.
އަދި ސިއްހީ ދިރާސާކުރާ ފަރާތްތަކުގެ މަސައްކަތް ގައުމީ ފެންވަރުގައި ދައްކާލުމުގެ އިތުރުން އެފަރާތްތަކުން ކުރާ މަސައްކަތްތަކުގެ އަގުވަޒަންކުރުން ކަމަށްވެސް މިނިސްޓްރީން ބުންޏެވެ.
މި ފޮތުގައި 30 އަށް ވުރެ ގިނަ ސިއްހީ ދިރާސާތަކުގެ އެބްސްޓްރެކްޓް ހިމެނެ އެވެ.
މީގެ ތެރޭގައި:
- ބަލިތަކުން ރައްކާތެރިވުން
- ބަލިތަކަށް ފަރުވާދިނުން
- ސިއްހީ ހިދުމަތްތައް ފަދަ މައުލޫތަކަށް ހެދިފައިވާ ދިރާސާތައް
- ކޮވިޑާ ގުޅޭގޮތުން ފާއިތުވި 2 އަހަރުގެ ތެރޭގައި ހެދިފައިވާ ދިރާސާތައް
ހެލްތު މިނިސްޓްރީން ބުނީ މި ފޮތުގެ ޒަރިއްޔާއިން ސިއްހީ ދިރާސާކުރާ ފަރާތްތަކަށާއި ދިރާސާކުރުމަށް ޝައުގުވެރިވާ ފަރާތްތަކަށް އިތުރު ހިތްވަރެއް ލިބިގެންދާނެ ކަމަށެވެ.
އަދި ކުރިއަށްއޮތް ތަނުގައި ރާއްޖެއަށް ބޭނުންތެރި، ފެންވަރު ރަނގަޅު ދިރާސާތަކެއް ހެދުމަށް މަގުފަހިވެގެންދާނެ ކަމަށް ވެސް މިނިސްޓްރީން ބުންޏެވެ.
