ބާސެލޯނާ (އޮކްޓޫބަރު 10) - ސްޕެނިޝް ލަ ލީގާގައި ސެލްޓަ ވީގޯ އަތުން 1-0 އިން މޮޅުވެ، ލީގު ތާވަލްގެ އެއްވަނަ މަގާމު ބާސެލޯނާ އިން އަލުން ހޯދައިފި އެވެ.
ބާސާގެ ދަނޑުގައި ރޭ ކުުޅުނު މެޗުގެ ހަމައެކަނި ލަނޑު 17 ވަނަ މިނިޓުގައި ޖެހީ ބާސެލޯނާގެ ޒުވާން މިޑްފީލްޑަރު ޕެޑްރީ ރޮޑްރިގޭޒް އެވެ.
މި މެޗުން މޮޅުވުމާ އެކު، އަންނަ ހަފުތާގައި ބާސެލޯނާ އާއި ރެއާލް މެޑްރިޑް ކުރިމަތިލާ މެޗަށް ބާސެލޯނާ ނުކުންނާނީ ތާވަލްގެ އެއް ވަނައިގެ ގޮތުގަ އެވެ. ބާސެލޯނާ އާއި ރެއާލް ވެސް އޮތީ 22 ޕޮއިންޓާ އެކު އެވެ.
ރޭގެ މެޗުގައި ބާސެލޯނާ އިން ހޯދީ ފަސޭހަމޮޅެއް ނޫނެވެ. މެޗުގެ ފަހުކޮޅު ސެލްޓާގެ ތަޖުރިބާކާރު ފޯވަޑް އިއާގޯ އަސްޕާސް ފޮނުވާލި ނުރައްކާތެރި ހަމަލާއެއް ބާސެލޯނާގެ ކީޕަރު މާކް އަންދްރޭ ޓަ ސްޓޭގަން ވަނީ ދިފާއުކޮށްފަ އެވެ. އަދި މެޗުގެ އިތުރު ވަގުތުގައި ގޮންސާލޯ ޕަސިއެންސިއާ ފޮނުވާލި ހަމަލާއެއް އަމާޒުވީ ގޯލުގެ ހުރަސް ދަނޑިއަށެވެ.
މެޗަށް ފަހު ބާސެލޯނާގެ ކޯޗު ޒަވީ ހެނާންޑޭޒް ވަނީ އެ ޓީމުން ދެ ވަަނަ ހާފުގައި ދެއްކި ކުޅުމާ މެދު ހިތްހަމަނުޖެހުން ފާޅުކޮށްފަ އެވެ.
ޒަވީ ބުނީ ޗެމްޕިއަންސް ލީގުގައި ބުދަ ދުވަހުގެ ރޭ އިންޓަ މިލާންއާ ދެކޮޅަށް ނުކުންނައިރު، ބާސެލޯނާ އިން ކުޅުން ރަނގަޅުކުރަންޖެހޭ ކަމަށެވެ.
"މި މެޗުގެ ދެ ވަނަ ހާފުގައި މި ކުޅުނު ގޮތަށް ކުޅެގެން، (ބުދަ ދުވަހު) އިންޓައާ ދެކޮޅަށް ކުޅޭ މެޗުން މޮޅުވާން ވަރަށް އުނދަގޫވާނެ. ފެންވަރު ހިފަހައްޓަން ޖެހޭ އެބަ،" ޒަވީ ބުންޏެވެ.
"މި މެޗުގައި އަހަރަމެންނަށް ލިބުނު ފައިދާއަކީ ގޯލުގައި މޮޅު ގޯލްކީޕަރެއް ހުރުން. ޖުމްލަކޮށް ބަލާއިރު ކުޅުން ރަނގަޅުކުރަންޖެހޭ."
ޒަވީ ބުނީ ބާސެލޯނާގެ ލީޑު ފުޅާކުރަން ލިބުނު ފުރުސަތުތަކުގެ ބޭނުން ހިފުނުނަމަ، މެޗުގެ އޮއިވަރު ވަރަށް ތަފާތުވާނެ ކަމަށެވެ.
"ދެވަނަ ލަނޑެއް ޖެހުނުނަމަ، އަހަރަމެންނަށް ތަންކޮޅެއް ފަސޭހަވާނެ. އެކަމަކު ދެވަނަ ހާފުގައި އިންޓެންސިޓީ ދަށްކޮށްލެވުނީ. އެއީ މައްސަލައަކީ،" ޒަވީ ބުންޏެވެ. -- އޭއެފްޕީ
