ގުދުސްގެ ޗެކް ޕޮއިންޓެއްގައި ބަޑިން ހަމަލާ ދީ އިޒްރޭލުގެ އަންހެން ސިފައިންގެ މީހަކު މަރާލިކަމުގެ ތުހުމަތުގައި ފަލަސްތީނުގެ ތިން މީހުން ހައްޔަރުކޮށްފި އެވެ.
ބަޑި ޖެހީ އިރުމަތީ ގުދުސްގެ ޗެކް ޕޮއިންޓެއްގަ އެވެ. ސިފައިންގެ އެކަކު މަރުވެ، ތިން މީހުން ޒަހަމްވި އެވެ. އޭގެ ތެރެއިން އެކަކުގެ ހާލު ގޯހެވެ.
އިޒްރޭލުގެ އަސްކަރިއްޔާއިން ބުނީ މަރުވީ އުމުރުން 18 އަހަރުގެ ނޮއާ ލަޒާރް ކަމަށެވެ.
ހަމަލާ ދިނީ ހަފުތާއަކަށް ދެމިގެންދާ ޔަހޫދީންގެ ސުއްކޮތު ޗުއްޓީ ފަށަން ތައްޔާރުވެފައި ވަނިކޮށެވެ. އެއީ އެތައް ހާސް ޔަހޫދީންނެއް ގުދުސްއަށް ޒިޔާރަތް ކުރާ ހަފުތާއެކެވެ.
ހަމަލާގެ ތުހުމަތުގައި ފަލަސްތީނުގެ ތިން މީހުން ހައްޔަރު ކުރި އިރު، ބަޑި ޖެހި ކަމަށް ބެލެވޭ މީހާ އަދި ނުފެނެ އެވެ. އޭނާ ހޯދުމުގެ ބޮޑު އޮޕަރޭޝަނެއް ދަނީ ހިންގަމުންނެވެ.
ޗެކްޕޮއިންޓުގައި ބަޑި ޖެހުމުގެ ގަޑިއިރުތަކެއް ކުރިން އިޒްރޭލުން ވަަނީ އެ މީހުން ވެރިވެގަނެގެން އުޅޭ ފަލަސްތީނުގެ ހުޅަނގު އައްސޭރީގައި ބަޑި ޖަހައި، ދެ ކުދިން މަރާލާފަ އެވެ.
އޭގެ ކުރިން ހުކުރު ދުވަހު ވެސް ހުޅަނގު އައްސޭރީގައި ފަލަސްތީނުގެ އުމުރުން 14 އަހަރާއި 17 އަހަަރުގެ ދެ ކުދިން މަަރާލި އެވެ.
