އިރާނުގައި ހިނގަމުންދާ ހަމަނުޖެހުންތަކުގައި ސަލާމަތީ ފައުޖުގެ 20 އަށް ވުރެ ގިނަ މެމްބަރުން މަރުވެއްޖެ އެވެ.
ސަލާމަަތީ ފައުޖުގެ ގޮތުގައި އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރްޖީސީ)، ބާސިޖް ޕެރެމިލިޓަރީ ފައުޖު އަދި ފުލުހުން ހަރަކާތްތެރިވެ އެވެ.
އެ ފައުޖުތަކުން މިހާތަނަށް ޖުމްލަ 20 މީހުން މަރުވެފައިވާ އިރު، ހޮނިހިރު ދުވަހު އެކަނިވެސް ދެ މީހުން މަރުވި އެވެ. އެއީ އައިއާރްޖީސީ އާއި ބާސިޖްގެ ދެ މެމްބަރުންނެވެ.
މީގެ ހަތަރު ހަފުތާ ކުރިން އިރާނުގައި މުޒާހަރާ ފެށީ ބުރުގާ ނާޅައި ހުރުމުން ހައްޔަރު ކުރި އުމުރުން 22 އަހަރުގެ އަންހެނަކު މަރުވި މައްސަލައިގަ އެވެ.
މަހްސާ އާމިނީ މަރުވީ ފުލުހުންގެ އަނިޔާތަކުގެ ސަބަބުން ކަމަށް އާއިލާއިން ތުހުމަތު ކުރެ އެވެ. އެކަމަކު ފުލުހުން އެކަން ދޮގުކުރެ އެވެ.
މުޒާހަރާތައް ހަމަނުޖެހުމަށް ބަދަލުވެ، ހޮނިހިރު ދުވަހު އެކަނި ވެސް އާއްމުންގެ ތިން މީހުން މަރުވި އެވެ. އަމިއްލަ ޖަމިއްޔާތަކުން ބުނީ މަރުވި އާއްމުންގެ އަދަދު 150 އަށް ވުރެ މަތިވާނެ ކަމަށެވެ.
